2 Kurintiya 9 - Bible Zulgo

Pul a waya, ti yaha gər a siŋgwe ka, bise

¹ A ge a ŋgulum tsa na i wetse a kurumaha a wakita aka gər siŋgwe ana ki ti slirwimehe a a gà mburma Mbulum ana ika ahəɗ Yuda ya asa ya.

² Aɗaba i sər ka, a sàs a kurum mazlàkà tar nda gər kurum ndzer dukw ŋgar. Yàa zlə̀b à kurum ika miɗ gà mburma Mbulum ana ɗa ika ahəɗ Makaduniya i faha ya ka, hinne. I gwaɗa a tar ka: «Gà mburma Mbulum ana ika ahəɗ Akaya ya, tàa dza ba aà matsakala ŋa daga də̀z. A sàs a tar, tì zlèk a dər gà mburma Mbulum ana ika ahəɗ Yuda ya.» I təv ana i tsik a tar taŋa ya ka, gà asiŋ ŋa ika magər tar hinne, ta ŋgat metsehe aà mazlàkà tar mbaŋa.

³ Ama kinehe ka, i slirehe a gà damər kwa ata a təv kurum, dite ki yehwim a riŋ à ba gər a siŋgwe ata ya dzekwiŋ, kamala ana i tsik a gà mburma ata, i gwaɗa a tar ka, ki ta gwim a ya. I fataya na maa ndzeha a təv kurum a ka, dukw ana i zlə̀b dər à kurum ika miɗ tar a ka, a ne a ndzer kaɗəŋ, pàrsa iɗəm tsiye.

⁴ Tsəka, na bəla mər nda gà mburma ana ɗa ika ahəɗ Makaduniya i faha ya, maa le aà kurum, ama kàa yahum gər a siŋgwe ata, aka sle tsəka, hwarwa a ta giŋ a i təv tar ka, hinne. Aɗaba Yàa mbər mezlibe à kurum, i gwaɗa a tar ka: «I sər ndzer, ti yehe a gər a siŋgwe ata.» Tsaatsa ka, pàrsa. Ama ka, hwarwa a ta ge a ndeyndey ka, a kurum na ika miɗ tar a mbaŋa.

⁵ Aɗaba taŋa na i dzala ka, i gwa, ŋgulum i wiz a gà damər kwa ata makər a, ti lehehe a a təv kurum dzekwiŋ, na dite ələk mìi ti dehe a ya. A sèsiŋ ka, kurum nda gà tar ata ki yehwimer a gər kamala ana kà tsikwim i sida ya, kù gwaɗum, mìi ta ge a ya. Kamala taŋa ya, ələk i ndzehe a a təv kurum ka, kàa mbər meyehwim aba gər a siŋgwe ata ya. Taŋa na a ti ɗif a dər a mburma parakkà, ti sir a dər ka, kàa vəlum duwa nda gəzləŋ ilik, wura a fàr aka kurum ndzəɗa mifère tsiye.

Mbulum a waya ki vilekwebe a duwa ka, nda maŋgayaba

⁶ Dukw ana a sèsiŋ i tsik a kurum a ya ka, araha: Na wura aka slige hinne tsa dùts pəra ka, dukw ana a ta pele a i bəɗ a tekeɗe, hinne tsa, kwizikw pəra mbaŋa. Na wura aka slige gìllìm hinne ka, a ŋget a dukw mezime hinne mbaŋa.

⁷ Ama siŋgwe ata ka, ku mege weke mə vəl kamala ana a dzala i gər ŋgar a, tsəka, mə vəl nda madzala gà gər ŋa tsa. Dite ka, mə vəl kamala ana wura a fàr aaka ndzəɗa aà məvəla ŋa ya tsa asa mbaŋa. Aɗaba Mbulum a waya ka, wele ana a vile a duwa nda maŋgayaba ya ivaɗ.

⁸ Aɗaba ŋgat ka, a sle a aà məvəla a kurum duwa hinne, dite ki ziwim a gər kurum fàgàr fàgàr, kuɗa duwa a ge a kurum a asa tsa. Kamala taŋa ya, duwa aà kurum hinne ka, ki gwim a dər ŋgwal a gà mìsle ŋgiɗ hinne mbaŋa.

⁹ Ar ka, kamala ana a riŋ mewetse ŋa i wakita Mbulum, ta gwa ka: «Wur ana a vile a ahər fə̀làh fə̀làh a gà ɓəzla matawak a ka, ŋgwal ŋgar ata a ndze a aà biybiy.»*fa*

¹⁰ Taŋa Mbulum na a vile a hwife a gà ɓəzla meslìgè duwa ya, dite dukw mezime ana ti zim a ya tekeɗe, a vile a ter a mbaŋa. A ta vile a kurum a wur duwa kamala ana gər kurum a waya ya mbaŋa. A slil a dər, a ge a ba hinne, dite gà asiŋ gà mìsle ŋgiɗ ta ŋget a duwa hinne i ahər kurum a mbaŋa.

¹¹ A ta pise a kurum a ahəm hinne, aà ka vəlum ahər a gà mìsle ŋgiɗ fə̀làh fə̀làh. Kamala taŋa ya, gà mburma hinne ti ta ge a kəkaaha a Mbulum, agəra dukw ana ki vilwim a ka, mìi de a ter a dərraha nda ahər mər a.

¹² Siŋgwe ata ki vilwim a ya, à zlèk a ka, gà mburma Mbulum ndzer dukw ŋgar. Ama duwa ŋgiɗ a riŋ asa. Aɗaba gà mburma hinne na ti ta ge a kəkaaha a Mbulum agəra taŋa ya mbaŋa asa.

¹³ Məvəla dukw taf kurum ata na à pèt a à ndzer kurum a mburma parakkà, ti sir a dər, gəzləŋ kurum ŋgwal ŋa, kàa gəsum ŋgwal bazlam ata aka gər Yesuw Kiristi ya ka, ndzer kaɗəŋ, dite kàa gəsum ahər ahəm lele asa ya. Na tàa samata, ki gwim a kataya ka, gà mburma hinne ti ti zèmbeɗe a à Mbulum. Ti ti zlibe a dər mbaŋa, agəra ana ki vilwim a ter a gà dukw kurum fə̀làh fə̀làh, dite ki vilwim a a gà asiŋ gà mburma Mbulum ŋgiɗ tserdze mbaŋa ya.

¹⁴ Dukw ana ki ta vilwim a ter a ya ka, a ti ɗif a dər, Mbulum na a ge a kurum a ŋgwal ŋa hinne, a za duwa tserdze ya. I təv ana tàa samata, ŋgat na a ge a kurum ŋgwal kataya ya ka, ti ta weye a kurum hinne, ta heme a a Mbulum aɗaba kurum mbaŋa.

¹⁵ Gekwa kəkaaha a Mbulum aɗaba dukw ana a vəl a kwa ya. Taŋa ka, a za duwa tserdze, biy megèr wusa ŋa ka, nda bazlam asa tsa.