2 Kurintiya 7 - Bible Zulgo

¹ A kurum gà masla gà ana i waya kurum hinne ya. Mbulum aka tsik a kwa i sida ya, a gwa, a ta vile a kwe a gà dukw ata tserdze ya. Aɗaba taŋa, say barakwa dukw ana ŋgwala tsiye, aà ba kwa ya, dite ma ne tsəɗaŋŋa na i təv are Mbulum a. Kà barakwara dukw ana ŋgwala tsa i gəzləŋ kwa ya asa mbaŋa. Mede kwa ana ki tèkwe a ika vatwa Mbulum a, ma ge ka, kamala ana ŋgat a waya ya. Ka hənakwar à gər a bəɗ tiɓìzl lele.

Pul a waya ka, tə sər ba lele

² Gəsum mər nda gəzləŋ kurum lele. Aɗaba mər tekeɗe, maa ge dukw ana ŋgwala tsiye, a wura ika magər kurum a ilik tsidze. Asa ka, wura aka dzeye ika vatwa Mbulum a agəra mər tsa, dite maa zla duwa aà wura ya nda wirwir a ɓav tsa asa mbaŋa.

³ Ka ta gwaɗum, i tsik taŋa ka, biy na i mà a kurum à bakal a ɓav tsa. Ar ka, kamala ana i lah metsike a kurum ndeɗiŋa ya. Mì waya kurum hinne, duwa ilik ma ta mà ba à kwa tsa. Ku mege kàa matakwa, kwa i təv ilik ŋa, ku mege kwa riŋ nda mesife tekeɗe, kwa i təv ilik ŋa hiywe mbaŋa.

⁴ I sər, kurum ka, gà ɓəzla megìse ndzer dukw ŋgar. Aɗaba taŋa, iye ihər i ndze a barbararra, aɗaba kurum ivaɗ. I huɗ mesewere are mər ana mìi sèwèr a ya tekeɗe, i ye a ba tsa, i ŋgeye a ba ivaɗ. Maŋgayaba gà ata a rèhiŋ a gəzləŋ ka, tsìsl lele.

Gà matsəɓatsəɓ nda maŋgayaba

⁵ Maa sèwèr are ka, hinne kaɗəŋ. Ku mege i təv ana mì ndze aka ahəɗ Makaduniya ya tekeɗe, maa ŋgat vatwa aà mesìfìkà ba tsidze. Dukw ana mawùràba ŋa ya, a lewa aà mər ku mege i ŋga, ndaka vatwa ŋgiɗ pampam hinne. Gà mburma ti newa a mər are hinne, ta gewa aà mər maàga. Mì dzalawa gà gər i gəzləŋ mər hinne agəra gà ɓəzla mazazama Mbulum mbaŋa.

⁶ Ama na bəla gà mburma ta gweɗe a, dukw ata mìi sle a asa tsəka, Mbulum na a me a terehe a à arəv a. A mà a məraha à arəv ka, nda mede Titus ana a dara ya.

⁷ Ama mede ŋgar ana a dara ya ɗekɗek tsa. A mà a məraha à arəv ka, nda bazlam ana a tsik a mər a mbaŋa. A tsik a mər ka, meme na kà mùmaraha à arəv a. A gwaɗa a mər asa ka, a sàs a kurum aà meŋgetiŋ asa zləmana ŋa, nda gà na kurum riŋ ihər ki dzelwim a gà gər aka dukw kurum ana ki gwim ŋgwala tsiye ya. Dite a sàs a kurum hinne na ki wiywimiŋ a ba, ki geywim a ika iye ya nda təv gà ɓəzla mene are gà ana ti niŋ a ya. I təv ana i tsaraka taŋa ya ka, i səkah à maŋgayaba hinne asa kuɗa.

⁸ I sər wakita gà ana i wetse a kurumaha akahər ata ya ka, aka vəl a kurum matsəɓatsəɓ a gəzləŋ hinne dukw ŋgar. Ama Yàa dzala aɗəm duwa hinne ɓav tsa. Malahalah ŋa ka, i dzala, i gwa, assàh, i wetse kataya ana, meme kuɗa ya. Aɗaba i samata, wakita ata i wetse a kurumaha ya ka, aka vəl a kurum matsəɓatsəɓ a gəzləŋ zaakwa dukw ŋgar.

⁹ Ama kinehe ka, iye riŋ ihər i ŋgeye a ba. Ama ka, agəra ana i vəl a kurum matsəɓatsəɓ a gəzləŋ a tsa. Iye ihər i ŋgeye a ba ka, agəra ana kà dzalum gà gər aka dukw ata ki gwim ŋgwala tsiye, dite i dəba ŋa ya, kà mbəɗum à gà madzala gà gər kurum kuɗa ya. Aɗaba madzala gà gər kurum ata kà dzalum a ka, kamala ana Mbulum a waya ya. Agəra taŋa, maa ge a kurum dukw ana ŋgwala tsiye nda wakita ata tsidze.

¹⁰ Na bəla wura a riŋ a ge a matsəɓatsəɓ kamala ana a sàs a Mbulum a, i fataya ka, à mbìɗer a à madzala gà gər ŋgwal ŋana ivaɗ. Kamala taŋa ya ka, Mbulum a mbil a à ŋgat. Medzìbe matsəɓatsəɓ ata ka, wura a dzele a dər akaba gà gər tsidze. Ama na bəla wura a ge a matsəɓatsəɓ kamala ana gər ahəɗ a waya ya ka, taŋa na a de a à ŋgat a məməta ana ika miɗ Mbulum a ya.

¹¹ Kaɗəŋ, kì gwim matsəɓatsəɓ kurum ata ka, kamala ana Mbulum a waya ya. Ama kinehe ka, samatum kuɗa kwaŋ, na kà mbəɗum dər à madzala gà gər kurum a. A sàs a kurum meɗife dər parakkà, na kà wayum mege dukw bakal asa tsiye. Ki gwim matsəɓatsəɓ i gəzləŋ kurum, nda magwàɗà ika magər kurum ka, aàla dze ya, na dukw ata a ge ba ya? Aɗaba taŋa, ki gwim magəɗa hinne agəra dukw ata a ge ba ika magər kurum a. Iye riŋ ihər i kiv a kurum a ka, hinne, aɗaba ana a sàs a kurum ki ŋgetwimiŋ a asa ya. A sàs a kurum ka, mege dukw ana Mbulum a waya ya, na kà tàtə̀kum a wele ata a ge bakal a ya. Taŋa dukw ata tserdze ya, a dara ka, i təv Mbulum a. Kamala taŋa ya, kà pàtum dər parakkà, aɗaba ana gər kurum aà mege dukw ata asa tsidze ya.

¹² Aɗaba taŋa, wakita ata i wetse a kurumaha ya ka, i wetse aɗaba wele ana a ge bakal ata ya, kige tsa, agəra wele ana ta ge ihər bakal a ya ɓav tsa asa. Ama i wetse ka, dite mə vəl a kurum vatwa ika miɗ Mbulum parakkà, ku weke ma sər dər ka, kà wayum mər ndzer nda gəzləŋ ilik.

¹³ Aɗaba taŋa na kinehe arəv a mà a məraha ya. Arəv aka mà a məraha lele kaɗəŋ. Ama ka, taŋa ɗekɗek tsa. Mì ŋgaya ba ndeyndey ka, aɗaba Titus ana maŋgayaba i gəzləŋ ŋgar hinne ya. A ŋgaya ba ka, agəra ana kurum tserdze kà mùmaraha à arəv a.

¹⁴ Aka ana i sləraha ŋgat a təv kurum a ka, Yàa zlə̀b à kurum ika miɗ ŋgar. Ama kinehe, mezlibe gà ata i zlə̀b à kurum a ka, a ne aka iye hwarwa taf masakəŋa tsa. Aɗaba gà dukw ana mì tsikewa a kurum tserdze ya ka, ndzer, pàrsa iɗəm tsa. Kamala taŋa ya, mezlibe mər ana mì zlə̀b à kurum ika miɗ Titus a tekeɗe, ar ka, ndzer mbaŋa.

¹⁵ Aka ana a daha a təv kurum a ka, kàa gəsum ŋgat lele, nda magəɗa ŋa, nda gà medzedzere i ba kurum hinne. Kurum tserdze na a gəs ahər ahəm a. Ama kinehe, a samata dukw ana ki gwimer ŋgwal ŋa ya ka, a səkah à mawàyà kurum hinne asa ivaɗ.

¹⁶ I ŋgaya ba hinne ka, aɗaba i sər, kurum ka, gà ɓəzla ndzer kaɗəŋ.