2 Kurintiya 4 - Bible Zulgo

Kwa ka, ndzəɗa kwa a riŋ tsa, Mbulum na mala ndzəɗa ya

¹ Mbulum a ge a mər ŋgwal ŋa hinne. A vəl a mər mege megemir aaha a ahər, na dite mìi tsik a bazlam ŋgwal ŋana a mburma ya. Aɗaba taŋa na mìi zle a ihər madzala gà gər mər a tsidze ya.

² Maa niw gà dukw ana mburma ta ge a nda wirwir kìtsèh kìtsèh, a ndeɗe aka mər a hwarwa ya tserdze. Mər ka, mìi kèhe a dukw ana mìi ge a ya tsa. Dite mìi bene a mburma, kige tsa mìi mbìɗ a à bazlam Mbulum tsa asa mbaŋa. Ama mìi ɗif a ka, à ndzer ŋana parakkà ivaɗ. Mì waya ka, ku weke mà sər dər, bazlam ana mìi tsik a ya ka, ika miɗ Mbulum ndzer, pàrsa iɗəm tsa.

³ Gà asiŋ gà mìsle ŋgiɗ ka, tì dze a zləm a bazlam ŋgwal ŋa aaha mər ihər mìi ɗif a dər a mburma ya tsa. A ne i təv tar ka, kamala ana are tar makàhà ŋa nda petek a. Ama ku mege kataya tekeɗe ka, sərum dər, a ne makàhà ŋa ka, i təv gà na ti dzeye a ya ɗekɗek pəra, na ti tsereke a tsiye.

⁴ Tə tsaraka bazlam ŋgwal ŋa ata tsəka, aɗaba ana Əbay sitene, mala makwàrà gər ahəɗ aaha, aka ge à tar guluf i huɗ metsehe tar, dite ta gəs tsiye. Aɗaba a waya tsa na ta ŋget a a dzaydzay ana à div a i təv tar a ya. Dzaydzay ata a dara ka, i huɗ ŋgwal bazlam ata aka gər ndzəɗa Yesuw Kiristi ana tì zlibe a dər a. Aɗaba Mbulum nda gər ŋgar a pàt à ba ka, nda təv Kiristi.

⁵ I təv ana mìi tsik a bazlam ŋgwal ŋa ata ya ka, mìi tsik a aka gər ba mər ŋa tsa. Mìi tsik a ka, aka gər Yesuw Kiristi. Mì gwaɗawa a tar ka, ŋgat na Batsah ŋa ika gər gà mburma tserdze ya. Mər mì ne ka, gà ɓəzla meslire kurum pəra, aɗaba Yesuw.

⁶ I təv ana Mbulum a ge gər ahəɗ akahər ata ya ka, a gwa: «Dzaydzay mà də̀v i luvuŋ.» Ama Mbulum ŋa ka, taŋa ilik hiywe na a vəl dzaydzay ŋgar ata à div a i gəzləŋ mər a mbaŋa. A ge dər kataya ka, aà məpàtà à ndzəɗa ŋgar ana tì zlibe a dər, à div a ika miɗ Kiristi ya. Aɗaba taŋa na mər ihər mìi tsik a bazlam ŋgwal ŋa ata a mburma ya.

⁷ Mər ka, ndzəɗa mər a riŋ tsa. Mì ne ka, kamala mesigire dwaɗwa ana mbùrùf a keɗe a bise ya. Ama kəla ka, Mbulum aka tike ŋgwal dukw ata a gəzləŋ mər. Aɗaba a sasar gà mburma tə sər dər ndzer, ndzəɗa ana a za duwa tserdze biy megemir Mbulum a, a dara ka, i təv ŋgar a, tsəka, a dara i təv mər a tsa.

⁸ Gà mesewere are ŋgiɗ pampam ta ŋgiɗits a mər hinne, ama ka, tàa ndəv à gà mesife mər kweleŋ tsa. Mì sər dukw ana mìi ge a ya asa tsa, a wise a mər a gər hinne, ama mìi gis a gəzləŋ hiywe.

⁹ Gà ɓəzla mene are mər hinne tar riŋ ta ge a mər a matawak, ama Mbulum aka miyak à mər tsa. Tar riŋ ihər ta peze a mər a bəɗ, ama maa hitse aà mbulum hiywe, maa mata ɓav tsa.

¹⁰ Ti yehe a vatwa aà məbatsa mər kəla pàt, kamala ana ta kəɗ Yesuw Kiristi ya mbaŋa. Ama mìi ndze a nda mesife, na dite mburma ti sir a dər ka, Yesuw ŋgat a riŋ nda mesife hiywe ya.

¹¹ I huɗ mandza aà bəra mər ana mìi ndze a ya, mər ka, i ɗa məməta agəra ana mìi zezem a Yesuw a. Ama ba mər aaha ndzəɗa iɗəm tsa, tsèfek tsèfek à mìt a mba ya ka, aka mət zukw tsa. Kamala taŋa ya, mburma ti sir a mesife Yesuw ka, nda təv mər.

¹² Kamala megweɗe ya, mər ka, i ɗa məməta hiywe. Ama kurum ka, mesife awiya ŋana a riŋ a ge a megemir i təv kurum.

¹³ A riŋ mewetse ŋa i wakita Mbulum ka, a gwa: «I tsik bazlam Mbulum a mburma ka, agəra ana i gəs ŋgat nda gəzləŋ a.»*fa* Ama mər ka, maa gəs Mbulum nda gəzləŋ mər ɓəŋɓəŋ lele, kamala wele ata a wetse ya mbaŋa. Aɗaba taŋa na mər tekeɗe, mìi ɗif a à bazlam ŋgar a mburma ya.

¹⁴ Mər ka, mì sər, Mbulum ana a mbəlara à Yesuw BATSAH kwa ŋa i məməta ya ka, a ta mbil à mər a kamala ana a mbəl à Yesuw a mbaŋa. A ti dzik akaba a kwa aka miɗ ŋgar nda gà kurum tserdze.

¹⁵ Mbulum a vəl a mər megemir ata ka, aɗaba kurum, dite a ta mbele a à gà mburma hinne, aɗaba ŋgwal ŋgar ana a ge a ter a ya. Kamala taŋa ya, gà na tar riŋ ta ger a kəkaaha, tì zèmbeɗe a à ŋgat a ka, tì sìkèh a aka miɗ aka miɗ lele mbaŋa.

Vavakwa dukw ana wura aka ŋgatar ilik zukw tsiye

¹⁶ Aɗaba taŋa na ki zlèkwe a ihər madzala gà gər kwa tsidze ya. Aɗaba ku mege ndzəɗa ba kwa mà nikiɗ tekeɗe ka, Mbulum a vile a kwe a ndzəɗa awiya ŋa a gəzləŋ, aà mazazama vatwa ŋgar kəla pat.

¹⁷ Gà mesewere are ana kwa ihər ki sèwèrekwe a kinehe ya ka, ti ndze a tsa, tì ndìv a mba. Ki ta ŋgetekewe a dər ka, mezlibe ana batsah ŋa ya. Mezlibe ata ka, a ti zè a dukw tserdze, dite a ndze a ka, aà biybiy. Agəra taŋa na ki fìrekwe a aà gà mesewere are ata ka, kamala ana mawura ba ŋa tsiye ya.

¹⁸ Aɗaba kàa tikekwa madzala gà gər kwa aka dukw ana a ŋgeter a ba tsiye, tsəka, aka dukw ana mburma a ŋgeter a nda are ya tsa. Aɗaba gà dukw ana mburma ta ŋgeter a nda are ya ka, ti ndze a aà biybiy tsa. Ama ka, gà dukw ana mburma ta ŋgeter a nda are tsiye ivaɗ, na a ndze a aà biybiy a.