2 Kurintiya 2 - Bible Zulgo

¹ Aɗaba taŋa, i dehe a a təv kurum asa tsəka, agəra ana i dzala ka, i ta vile a kurum a matsəɓatsəɓ a gəzləŋ asa ya.

² Aɗaba na matsəɓatsəɓ i gəzləŋ kurum ka, iye tekeɗe, matsəɓatsəɓ i gəzləŋ ga mbaŋa. Dite ana, weke na a ta mìŋgehe a arəv asa kuɗa ya? Wura a riŋ tsa.

³ Aɗaba taŋa na i wetse a kurumaha wakita ŋgiɗ ata ya. Taŋa ka, avukw ana i dehe a a təv kurum zləmana ya. Na mege i daha a təv kurum akahər ata ka, ki vilwimiŋ a matsəɓatsəɓ a gəzləŋ ivaɗ. Ama ana ka, say kurum ivaɗ na ki vilwimiŋ a maŋgayaba a gəzləŋ zləmana ya. Ama i sər ndzer, na iye riŋ nda gà maŋgayaba ka, kurum tserdze tekeɗe, ki ndzwim a nda maŋgayaba mbaŋa.

⁴ I təv ana i wetse a kurumaha wakita ata ya ka, nda madzala gà gər ŋa hinne, aɗaba gəzləŋ a wir aà iye a tusswa hinne, haa i tuwa ka, tuwa yemere tsàkw tsàkw hinne mbaŋa asa. I waya tsa na i vile a kurum a matsəɓatsəɓ a gəzləŋ a. Ama i wetse a kurumaha ka, dite ka sərum dər ka, i waya kurum hinne ivaɗ.

Məpəla à bakal a wele ana a ge dukw ana ŋgwala tsiye

⁵ Na wura ika magər kurum aka vəl matsəɓatsəɓ a gəzləŋ a mburma ka, a iye ɗekɗek tsa na a vəl matsəɓatsəɓ ata ya. Ama a vəl ka, a kurum tserdze, kige tsa ŋgulum i gweɗe a, a vəl matsəɓatsəɓ ata ka, a gà asiŋ ŋa ika magər kurum a ivaɗ, tsəka, a sèsiŋ i niw a dukw ana ndzer a ɓav tsa.

⁶ Aɗaba kurum bagwal ŋa, dukw ana ki gwim a wele ata, kà tàtə̀kumar a ka, ide kuɗa na taŋa ya.

⁷ Ama kinehe ka, say pə̀lumar à bakal ŋgar, kà mùmaraha à arəv. Aɗaba na kàa gwimer kataya tsəka, à mìt a à arəv ndeyndey, a miyek a à madzala gà gər ika vatwa Mbulum a fit kweleŋ.

⁸ Aɗaba taŋa, iye ihər i ge a kurum a kamkam: Pə̀lumar à bakal ŋgar, na dite a sir a dər ka, kà wayum ŋgat nda ndzer a.

⁹ I wetse a kurumaha wakita ata, i waya ka, i dzik dər à kurum, aà mesèmete ka, wànà kurum ihər ki gwim a dukw ana i tsikewa a kurum a ya, tsəna, ki gwim a tsiye ya. Araha, kàa tàtə̀kum a wele ata ka, hinne. Ama kinehe ka, say pə̀lumar à bakal ŋgar kuɗa pəra na a zeha ya.

¹⁰ Na kàa pə̀lum à bakal a wele ata ka, iye tekeɗe, i piler a dər mbaŋa. Na bəla aka giŋ duwa biy na i piler a dər a ka, taŋa ka, Yàa pə̀lar dər nda ndzer dukw ŋgar. I pə̀lar dər ka, aɗaba kurum, ika miɗ *Kiristi.

¹¹ I ge dər kataya ka, aɗaba a sèsiŋ tsa na Əbay sitene a sewle aà kwe a ya. Aɗaba kwa ka, kàa mbər mesirekwa wirwir ŋgar ana a gewa ya lele, makàhà ŋa tsa.

Dukw ana Pul a dzala zləmana i Turuwas a

¹² I mah ba ka, i da a Turuwas aà metsìkè bazlam ŋgwal ŋa ana aka gər Yesuw Kiristi ya, a mburma. I ndzeha a fata ka, BATSAH kwa ŋa aka lèmbeɗiŋ aba təv a, a viliŋ vatwa aà metsìkè ŋa parakkà lele.

¹³ I gwa zləmana ka, i lehe aà Titus, damər kwa i fata. Ama ka, aka daha tsa. I fataya ka, iye riŋ nda gà madzala gà gər hinne. Aɗaba taŋa na ŋgwìɗik i miyak à gà mburma Mbulum ana i Turuwas a, i mah ba i fataya tsara, i da aka ahəɗ Makaduniya.

Kà mbàyakwa aà duwa tserdze ka, aɗaba Yesuw Kiristi

¹⁴ Gekwa kəkaaha a Mbulum, aɗaba ana a dza mər a ahər a Yesuw Kiristi, dite ŋgat a ne Batsah mər ŋa, a de à mər a aka miɗ kəla pat. Kamala taŋa ya, a sàs a Mbulum ka, a ɗif a dər a mburma tserdze, dite ka, ku weke ma sər dər, Kiristi na a mba aà duwa tserdze ya. A slər mər, aà metsìkè bazlam ata aka gər Kiristi ya, dite ka, aà gà mburma tə sər ŋgat. Bazlam ata mìi tsik a ya ka, ar kamala wirdè ana a ze hwaŋŋà ya. A zehe a ka, aà gà mburma tserdze, ku mege a ŋga.

¹⁵ Kaɗəŋ, maa ne ka, kamala wirdè ana a ze hwaŋŋà, a tsahən aà Mbulum a, aɗaba ana mər ihər mìi tsik a bazlam Kiristi a mburma ya. Mìi tsik a ka, a gà na Mbulum riŋ ihər a mbele a à ter a ya, nda gà na ti dzeye a ya mbaŋa.

¹⁶ A gà na Mbulum a mbele a à ter a ya ka, wirdè ata a ze aà ter a hwaŋŋà lele, ta gis a bazlam mər, dite ta ŋget a dər mesife ana à ndìv a tsa aà biybiy a. Ama gà na ti dzeye a ya ka, wirdè ata a zehe aà ter a ka, sìwìkìkìkke biy mimete dər mbaŋa. Dite kinehe ana, weke na a sle a aà megemir ata ya?

¹⁷ Ama mər ka, mìi sle a aà mege ŋa, agəra ana Mbulum a slər ahər mər a, tsəka, mìi sle a ɓav tsa. Aɗaba gà mburma hinne, na ti tsikewa bazlam Mbulum a mburma ka, ta fə̀r ahər kamala dukw metsèkèle ya. A sàs a tar aà maŋgata dər nuba. Ama mər ka, mì gewa dər kamala taŋa ya tsa. Mì tsikewa bazlam ŋgar a mburma ka, nda gəzləŋ ilik ika miɗ ŋgar, agəra ana mər ka, gà ɓəzla meslire Kiristi ya.