2 Kurintiya 13 - Bible Zulgo

Pul a be a tar à ɗaf mandəvandəv ŋa

¹ Kinehe ka, iye riŋ i dehe a a təv kurum məmakər ŋa mba asa. Yàa daha ka, i ta ge a seriye gà na ta gewa dukw ana ŋgwala tsiye. I ta ge a ka, kalkal kamala ana wakita Mbulum a tsik a, a gwa ka: «Na wura a de a à mìsle ŋgiɗ aka miɗ seriye ka, say na bəla gà mburma sula, kige tsa makər tàa ŋgatar aka mege bakal ŋa ɗegìrgìr ndzer a, tsəka, ti sle a aà mada à ŋgat aka miɗ seriye tsa.»*fa*

² Aka ana i daha a təv kurum masula ŋa ya ka, Yàa be à ɗaf a gà na ta ge bakal a, nda gà asiŋ ŋa ana ika magər kurum tserdze ya mbaŋa. Kinehe, Yàa ndzeha a təv kurum zukw tsəka, i be a kurumehe a à ɗaf asa mbaŋa. Aɗaba i gwaɗa a kurum: Na Yàa màra asa ka, i ti tètìk a a gà mburma ata tserdze ya.

³ Wànà a sàs a kurum ana, na ki sirwim a dər ka, *Kiristi na a fàfəl a kurum nda bazlam gà ya tsiye? Yaw, na kataya ka, i ɗif a kurum a dər kaɗəŋ. Aɗaba i təv ana ŋgat a ge a megemir i təv kurum a ka, ŋgat mbile ŋa tsa. Ama ŋgat ka, a ge a nda ndzəɗa ana i təv kurum a ivaɗ.

⁴ I təv ana tə ndwandway ŋgat aà dizl magə̀làwà ŋa ya ka, aka həna à gər ŋgar a bəɗ kaɗəŋ, a ne à ba ŋgar kamala ana ŋgat mbile ŋa ya. Ama kinehe ka, aka mbəlara i məməta ya, a riŋ a ndze a nda mesife, aɗaba ndzəɗa Mbulum kuɗa. Mər mandza ŋa ka, i təv ilik ŋa nda gà ŋgat. Kamala taŋa ya, mər tekeɗe, mì həna à gər a bəɗ, mì ne à ba mər gà mbile ŋa mbaŋa. Ama mər mìi ndze a kəla ka, nda mesife ŋgar mbaŋa. I təv ana maa ndzeha a təv kurum a ka, mìi ge a megemir nda ndzəɗa ana Mbulum a vəl a mər a.

⁵ Kinehe ka, dzikwim à ba kurum nda təv megìse dzekwiŋ. Kà samatum lele, aà ka sərum dər, wànà kàa gəsum Yesuw ana, nda ndzer a? Aɗaba kurum kà sərum, Yesuw Kiristi ka, ŋgat mandza ŋa i gəzləŋ kurum ana, wànà kà sərum tsiye? Na kataya tsəka, kàa dzawum ika vatwa ŋgar a.

⁶ Ama ku mege meme tekeɗe, i dzala ka, ki sirwim a dər ndzer, mər ka, maa dzawa ika vatwa Mbulum a tsidze. Mər ka, gà ɓəzla meslire Mbulum nda ndzer.

⁷ Ama a sàs a mər na mìi ne a à ba mər gà ŋgwal ŋa, dite aà gà mburma ta gwa aà mər, tar ka, gà ɓəzla meslire Mbulum a tsa kəla. Aɗaba dukw ana mər mì waya ya ka, mìi heme a a Mbulum, na dite ki gwim a dukw bakal asa tsiye. Ki gwim a ka, dukw ana ŋgwal ŋa ya, ku mege mì ne i təv gà mìsle ŋgiɗ ka, gà ɓəzla meslire Mbulum nda ndzer tsa tekeɗe ya.

⁸ I huɗ meheme mər ana mì hamawa a Mbulum kamala taŋa ya ka, mì waya mìi ge a ka, dukw ana ndzer a, tsəka, mìi nis a à dukw ana ndzer a tsa ivaɗ.

⁹ Na bəla kurum ka, gà ndzəɗa ŋa ika vatwa Mbulum, ama mər ka, gà mbile ŋa na i təv are kurum a tekeɗe ka, mìi ŋgeye a ba ivaɗ. Aɗaba taŋa, mìi heme a a Mbulum, dite mà zlak kurum, aà ka simwim ika vatwa ŋgar a.

¹⁰ I wetse a kurumaha gà dukw ata tserdze ya ka, Yàa daha a təv kurum zukw tsa. Aɗaba ələk i ti dehe a ka, kàa mbər məmbə̀ɗum à madzala gà gər kurum, dite na i fèfil a kurum a nda magala asa tsiye. Aɗaba Mbulum ka, aka viliŋ ndzəɗa aà meɗife a kurum à metsehe ndzer kaɗəŋ. Ama i ŋgat ndzəɗa ata ka, aà manəsa dər à kurum tsa kəla. A viliŋ ka, dite i zlak dər kurum nda təv mede kurum ana ki sìkèhwim a dər aka miɗ aka miɗ ika vatwa ŋgar a.

Mege wusa

¹¹ Gà damər gà, kinehe ka, bazlam gà aka ndəv a faha. Ndzum zayzay lele. Gəsum ahəm aà dukw ana i tsik a kurum a lele, dite ka simwim aba ika vatwa Mbulum. Bazlam kurum ma ge ka, ilik pəra. Ndzum ika magər kurum ka, zayzay lele. Na ki ndzwim a kataya ka, Mbulum ana ŋgat mala mawàyà kwa ya, nda məvəla a kwa matasla yam a gəzləŋ a ka, a ndze a i təv kurum mbaŋa.

¹² Geywimeba wusa ika magər kurum nda gəzləŋ ilik lele mbaŋa, kamala ana kurum nda gà damər a. Gà mayaha ba gər gà mburma Mbulum ana ɗa i faha ya tserdze, ta ge a kurumaha wusa.

¹³ Yesuw Kiristi BATSAH kwa ŋa mə vəl a kurum ŋgwal ŋgar ana a ge a kwa ya, aka miɗ aka miɗ. Meweye Mbulum ana a waya kwa ya tekeɗe, ma ndza i gəzləŋ kurum, dite Mezite Mesife ŋgar ibam, ma gaw akaba kurum a təv ilik ŋa asa mbaŋa.