2 Kurintiya 1 - Bible Zulgo

Mege wusa

¹ Na a wetse a kurumaha wakita aaha ka, iye, Pul ana Mbulum a zla iye, a ne à iye mala meslire Yesuw Kiristi ya. Mì wetse ka, mər nda Timute, damər kwa ana ika vatwa Mbulum a. Mì wetseha ka, a kurum gà mburma Mbulum ana i Kurintiya ya, dite nda gà asiŋ gà ɓəzla magəsa Mbulum ŋgiɗ ana ta gəs nda gəzləŋ, ika ahəɗ Akaya ya tserdze.

² Gà Mbulum Tsir kwa nda Yesuw Kiristi BATSAH kwa ŋa, ta ge a kurum ŋgwal nda məvəla a kurum matasla yam a gəzləŋ zayya lele.

Mbulum à mèhe a à arəv a gà na tì sèwèr a are ya

³ Gekwa kəkaaha a Mbulum ana ŋgat Tsir Yesuw Kiristi BATSAH kwa ŋa ya. Ŋgat ka, a ge a ŋgwal a mburma, kamala tsir gà ɓəza ana a ge a dukw ŋgwal ŋa, a ge a gər a gà ɓəza ŋgar a. A mèkwehe a à arəv də̀ɗə̀ffa, a vile a kwe a ndzəɗa kəla pat.

⁴ Ku mege ndeɗime, i təv ana mìi sèwèr a are hinne ya ka, ŋgat a vəlawa a mər ndzəɗa, na dite mər tekeɗe, mìi dehe a, mìi mèhe a à arəv a gà na tar riŋ ihər tì sèwèr a are ya mbaŋa ya. Mìi zlèk a tar ka, kamala ana Mbulum a zlak mər a mbaŋa.

⁵ Kamala taŋa ya, Yesuw Kiristi aka sèwèr are ka, hinne, dite kinehe mər tekeɗe, mər ihər mìi sèwèr a are ka, hinne mbaŋa. Ama mezleke ana Mbulum à zlèk a mər a tekeɗe, hinne mbaŋa asa, aɗaba ana mər mandza ŋa i təv ilik ŋa nda gà Kiristi ata ya.

⁶ Taŋa mər riŋ ihər mìi sèwèr a are ka, aɗaba kurum, dite Mbulum à me a kurumehe a à arəv nda ahər mər, aà kə ŋgatum ndzəɗa ika vatwa ŋgar asa. Taŋa Mbulum a mà a məraha à arəv ka, aɗaba kurum mbaŋa asa, na dite ki ŋgetwim a ndzəɗa ɓəŋɓəŋ nda təv megìse mbaŋa ya. Kamala taŋa ya, ki slwim a aà məbàsà gəzləŋ i təv mesewere are ana ki sèwèrwim a ya, kamala mər a mbaŋa.

⁷ Mì sər ndzer, ki ta ŋgetwim a ndzəɗa ika vatwa Mbulum ɓəŋɓəŋ lele. Aɗaba mì sər ka, Mbulum à me a kurumehe a à arəv kamala ana a mà a mər dərraha ya mbaŋa, agəra ana kàa gawum ba nda gà mər i təv mesewere are ana mìi sèwèr a ya.

⁸ Gà damər mər, a sàs a mər ka, mìi ɗif a kurum a à mesewere are ana mì sèwèr ika ahəɗ Asiya ya. Mesewere are ata ka, a beha, a za ndzəɗa mər fit kweleŋ fètìte. Mì gwa ka, mesife mər aka ndəv, mìi mete a dər pəra.

⁹ I fataya ka, mì dzala, mì gwa, naha ka, mər ka, i ɗa məməta kamala gà na seriye a gasa tar, ta bets a tar a. Ama Mbulum a ge dər kataya, dite mì gəs ka, ndzəɗa ba mər asa tsa. A waya mì gəs ka, ndzəɗa ŋgar ilik, na a ge a mər a ŋgulum a. Aɗaba ŋgat na a mbəlawa à mburma i məməta ya ya.

¹⁰ Dite ŋgat asa mbaŋa na bizlir bizlir a beye à mər i biye ɗa məməta ata mìi mete a zləmana ya. Mì sər ka, a ta beye a à mər i təv gà mesewere are ŋgiɗ a kataya mbaŋa. Mì tike madzala gà gər mər aka ŋgat ka, aɗaba mì sər, ku mege aka miɗ mba tekeɗe ka, a ta mbele a à mər.

¹¹ Meheme kurum ana kurum ihər ki hemwim a a Mbulum aɗaba mər a tekeɗe, a riŋ à zlèk a mər mbaŋa. Kaɗəŋ, gà mburma hinne na tar riŋ ihər ta heme a a Mbulum aɗaba mər a. I dəba ŋa ya, na Mbulum tekeɗe, aka gəs meheme tar ata ta hemer a ya ka, gà mburma hinne ti ta ger a kəkaaha mbaŋa, agəra ŋgwal ŋgar ana a ge a mər a.

Pul a mà aà mada a Kurintiya ya

¹² Dukw ana mìi ge a dər zlapa ya ka, araha: I gəzləŋ mər ka, mì sər, mede mər ana mì dawa ika vatwa Mbulum a ka, nda gəzləŋ ilik ŋa, nda ndzer, kamala ana Mbulum a waya ya. Mede mər ata ŋgwal ŋa ndeyndey ka, ika magər kurum. Ndzəɗa mər ana mì ndza dər kataya ya, a dara ka, i madzala gà gər gà mburma gər ahəɗ a tsa. Ama a dara ka, i təv Mbulum ana a ge a mər ŋgwal ŋa ya.

¹³ Aɗaba dukw ana mì wetse a kurumaha tserdze ya ka, a tsereke ba lele, duwa a riŋ iɗəm na makàhà ŋa ya tsa. Mì dzala ka, mì gwa, aka miɗ mba ka, ki tserekwim a parakkà lele kuɗa.

¹⁴ Kamala taŋa ya, kinehe ka, kàa dzum ba aà matsaraka ŋa zaakwa zaakwa dukw ŋgar. Ama ka, kà sərum dər, a pat ana Yesuw BATSAH kwa ŋa à mère a ya ka, ki ti sìŋgìrwim a à mər a hinne, kamala ana mìi ta ge a zlapa nda kurum a mbaŋa.

^15-16 Agər ana i sər gà dukw ata ti ti ne a ndzer a ka, i gwa, i dehe a a təv kurum dzekwiŋ, na mege a ge a ba ya ya, dite ka, i waya i sìrìk a riŋ aba aka ahəɗ Makaduniya zləmana. Aləka i təv ana Yàa màhara ba i fataya ka, i ta mbìɗehe a gər a təv kurum asa. Ama kəla ka, ki ti zlèkwim a iye, na i təv ana i dze a ba aà mada aka ahəɗ Yuda ya. I dzala ka, i de a kurumehe a à mipìsè ahəm Mbulum masula ŋa zləmana, aà mà zlak kurum ika vatwa Mbulum a. Ama araha kinehe ka, Yàa ndzeha a təv kurum asa tsa.

¹⁷ I təv ana i ɗifewa kurum à dukw ana i ta ge a ya ana, Yàa tsik a kurum nda arah sula ya? Awaŋ, aɗaba i təv ana i dzalawa dukw ana i gwa, i ta ge a ya ka, Yàa dzala gà gər kamala biy gà mburma gər ahəɗ a tsa. Wànà kà dzalum dze ana, i gweɗe a «haya», i dəba ŋa ya ka, i gweɗe a «awaŋ» asa ya? A ge a ba tsa na taŋa ya.

¹⁸ Mbulum na mala sida gà ya. Dukw ana maa tsik a kurum a ka, ndzer kaɗəŋ, pàrsa iɗəm tsa. Taŋa dukw ana mì tsikewa a kurum a ka, maa gwa «haya», kige tsa «awaŋ» nda bazlam sula tsa.

¹⁹ Aɗaba Yesuw Kiristi Kəla Mbulum, wele ana mər nda Silas, nda gà Timute mì ɗif a kurum à ŋgat ika magər kurum a ka, ŋgat a gweɗe a aà duwa «haya», dite i dəba ŋa ya, a gweɗe a «awaŋ» aka gər bazlam ŋa ilik ka, a gweɗe a tsidze. A tsik a ka, dukw ana ndzer a hiywe.

²⁰ Ŋgat a ɗif a kwa à dukw ana a sàs a Mbulum a ta vile a kwe a nda ndzer a kaɗəŋ. Aɗaba taŋa, ki slekwe aà megweɗe aaka a «*amin» nda zləm ŋgar, aà mazàmbàɗà dər à Mbulum.

²¹ Biy ŋgiɗ asa ka, Mbulum nda gər ŋgar na a vəl a mər ndzəɗa ɓəŋɓəŋ ika vatwa Yesuw Kiristi, dite a vile a kurum a ndzəɗa ata mbaŋa ya. Ŋgat na a pala kwa aà megemir ŋgar a.

²² A dzaya a kwa Mezite Mesife ŋgar a gəzləŋ kwa, dite kà sərakwa dər ka, kàa nekwa gà ɓəza ŋgar a. Nda ahər Mezite Mesife ŋgar ata mbaŋa, na ki sirekwe a dər ka, ki ta ŋgetekewe a a gà asiŋ gà dukw ŋgiɗ ana a gwa, a ta vile a kwe a ya.

²³ Ama Mbulum ka, mala sida gà. Ma lekiŋ, na kige i sàs pàrsa ya. Taŋa Yàa daha a təv kurum a Kurintiya zukw tsəka, aɗaba i waya tsa na i vile a kurum a matsəɓatsəɓ a gəzləŋ kurum a.

²⁴ Ama mər ka, maa ne gà Əbay aà makwàrà kurum nda təv megìse kurum ana kə̀ gəsum a ɓav tsa. Aɗaba mì sər ka, kàa gəsum Yesuw Kiristi nda gəzləŋ kurum ɓəŋɓəŋ lele. Mì waya ka, ki gekwe a megemir nda gà kurum seyiŋ ivaɗ, na dite maŋgayaba kurum à sìkèh a ya.