1 Yuhana 5 - Bible Zulgo

Bazlam məmbà aà dukw bakal gər ahəɗ

¹ Ku weke na aka gəs Yesuw Kiristi, a sər, ŋgat mala məmbə̀là à mburma ana Mbulum a gwa, i slir a kurumehe a ya ka, ŋgat aka ne ka, kəla Mbulum. Wur ana a waya tsir gà ɓəza ya ka, a weye a gà ɓəza ŋgar ŋa mbaŋa.

² Meme na ki sirekwe a dər ka, kà wayakwa gà ɓəza Mbulum a? Ki sirekwe a ka, say nda mawàyà ŋgat, nda magəsa məpala ahəm ŋgar. Kamala taŋa ya ka, ki weyekwe a tar nda ndzer kaɗəŋ.

³ Na kà wayakwa Mbulum nda ndzer ka, kamala megweɗe ya, say ki gekwe a dukw ana a tsik a kwe a ya mbaŋa. Aɗaba gà məpala ahəm ŋgar ata ka, mawùràba aà mazazama ŋa tsa.

⁴ Aɗaba gà na ti ne gà ɓəza Mbulum a tserdze, ku mege weke tekeɗe ka, a sle a aà məmbà aà dukw bakal gər ahəɗ. Dite meme na ki mbèkwe ahər a ya? Ama ki mbèkwe ahər a ka, nda megìse kwa ana kə̀ gə̀sakwa Yesuw Kiristi ya.

⁵ Weke na a sle a aà məmbà aà dukw bakal gər ahəɗ a? Na a sle aà mimbè ahər a ka, say wur ana aka gəs Yesuw, a sər ŋgat ka, Kəla Mbulum ndzer a.

Gà dukw ana ti ɗif a kwa à Yesuw Kəla Mbulum a

⁶ Yesuw Kiristi ata a dara aka gər ahəɗ a. A dara ka, a pəts a yam ana ti tsilwiɓ aɗəm a à ŋgat a, dite a dza à məmbəz ŋgar i təv ana a mət a. Ama kəla ka, yam ɗekɗek tsa na a ɗif a kwa dər ŋgat ana kamala weke ya ya. Nda məmbəz ŋgar ana a dza dər a mbaŋa. Mezite Mesife Mbulum na a ɗif a kwa à gà dukw ata ti ne ndzer ŋa ya ya. Aɗaba Mezite Mesife ata ka, a ses a pàrsa tsidze.

⁷ Ama gà dukw makər na ti ɗifekwa à Yesuw Kəla Mbulum ndzer a.

⁸ Gà dukw ata makər a ka, gà Mezite Mesife Mbulum nda yam, nda gà məmbəz. Gà dukw ata makər a, ti ne ka, fìh ilik pəra.

⁹ Na bəla gà mburma ta ge a sida, ti ɗeme a dukw ana ta ŋgatar a, bazlam tar aka da akaba a təv ilik ŋa fìh ka, ki gesekwe a bazlam tar ata. Ama sərum dər, bazlam ana Mbulum a tsik a kwa ya ka, à zè a taŋa. Ŋgat ŋa na a ɗif a kwa à gà dukw ata aka gər Kəla ŋgar a.

¹⁰ Aɗaba taŋa, na wura aka gəs Kəla Mbulum nda gəzləŋ ŋgar ka, a sir a gà dukw ata ti ne ndzer a i gəzləŋ ŋgar. Ama wur ana aka gəs bazlam Mbulum a gəzləŋ ŋgar tsiye ka, a ne à ŋgat mala pàrsa. Aɗaba aka gəs dukw ana Mbulum a tsik aka gər Kəla ŋgar a tsa.

¹¹ Dukw ana Mbulum a tsik a kwa ya ka, araha: A vəl a kwa mesife ana a ndze a aà biybiy a. Dite mesife ata a dara nda ahər Kəla ŋgar a.

¹² Wur ana aka gəs Kəla Mbulum a ka, aka ŋgat mesife ata. Ama wur ana aka gəs Kəla ŋgar ata tsiye ka, mesife ata a riŋ i təv ŋgar tsa.

Gà dukw ana kə̀ gə̀sakwa nda ndzer a

¹³ I wetse a kurumaha gà dukw ata tserdze ya ka, a kurum ana kàa gəsum Kəla Mbulum a, na dite ki sirwim a dər ndzer, kàa ŋgatum mesife ana à ndìv a tsa aà biybiy a.

¹⁴ Na ki gekwe a dukw ana a sàs a Mbulum a ka, à dze aà kwe a zləm i təv ana ki wizekwe ahər a gà duwa ya. Aɗaba taŋa na ki tèkwe a aka miɗ ŋgar ka, ki gekwe a magəɗa tsiye.

¹⁵ Agəra taŋa asa, na kàa sərakwa ka, Mbulum a riŋ à dze a kwe a zləm i təv dukw ana ki wizekwe ahər a tserdze ya ka, ki sirekwe a dər, aka vəl a kwa gà dukw ata kà wizekwe ahər a tserdze ya mbaŋa.

¹⁶ Ama bakal ŋgiɗ a riŋ ka, mburma ta mìt a dər tsa. Na bəla wura a riŋ a ŋget a a damər ŋgar ana ika vatwa Mbulum a, a riŋ a ge a medzibe bakal ata ka, ma hama a Mbulum aɗaba ŋgat, dite ka, Mbulum mə vəl mesife a damər ŋgar ata. I tsik kataya ka, agəra gà mburma ana ta ge a bakal, dite ka, ta mìt a dər tsiye ɗekɗek. Aɗaba bakal ŋgiɗ a riŋ ka, ta mìt a dər. Yàa gwa ka, hamum a Mbulum agəra gà mburma ana ta ge a medzibe bakal ata ya tsa.

¹⁷ Gà dukw ana ta ge a ŋgwal ŋa tsiye tserdze ka, taŋa ka, bakal na ika miɗ Mbulum a. Ama kəla ka, gà asiŋ gà bakal ŋgiɗ a riŋ na gà mburma ta mìt a dər tsiye.

¹⁸ Kà sərakwa dər, gà na ti ne gà ɓəza Mbulum a ka, ku mege weke, a gewe a bakal asa tsa, aɗaba Kəla Mbulum a riŋ a kesle a ŋgat. Kamala taŋa ya, Əbay sitene a sle aà melime aà ŋget a asa tsa.

¹⁹ Kà sərakwa dər, kwa ka, gà mburma Mbulum. Ama gà asiŋ gà mburma gər ahəɗ tserdze ka, i ahər Əbay sitene.

²⁰ Kà sərakwa dər asa ka, Kəla Mbulum a dara aka gər ahəɗ a ka, a vəl a kwa metsehe, na dite ka, kà sərakwa Mbulum ndzer ŋana ya. Kà ndzakwa i təv ilik ŋa nda gà Mbulum ndzer ŋana ka, agəra ana kà ndzakwa i təv ilik ŋa nda gà Yesuw Kəla ŋgar a mbaŋa, kàa gawakwa ba ya. Ŋgat na Mbulum ndzer ŋana ya, dite ŋgat asa na a vəl a kwa mesife ana à ndìv a tsa aà biybiy a asa mbaŋa.

²¹ A kurum gà ɓəza gà, kaslum ba kurum i təv gà fəla ana mburma tì zlìbeye a dər taf masakəŋa ya.