1 Yuhana 4 - Bible Zulgo

Sərakwa ikaba à gà Mezite Mesife Mbulum a nda biy mala mene are *Kiristi ya

¹ Gà masla gà, gà ɓəzla məma à guma Mbulum ana nda pàrsa ya ka, tar riŋ ika gər ahəɗ pampam hinne. Aɗaba taŋa, ka ta gəsum bazlam wur ana a gweɗe a kurum a ka, i tsik a kurum a bazlam Mbulum nda ndzəɗa Mezite Mesife ya bise tsara tsa. Say ki ndzekwim a bazlam ŋgar ata ka, nda metsehe, na dite ki sirwim a dər ka, a tsik ana, nda ndzəɗa Mezite Mesife Mbulum kaɗəŋ a, tsəna, pàrsa ya ya.

² Araha, meme na ki sirwim a dər, naha ka, Mezite Mesife Mbulum a: Wur ana a gweɗe a, Yesuw Kiristi a dara aka gər ahəɗ a, a ne mburma ya ka, wele ata na a ndze a nda Mezite Mesife ana a dara i təv Mbulum a ya.

³ Ama wur ana a niw gà dukw ata a ɗeme ahər a duwa kataya ya ka, Mezite Mesife Mbulum a riŋ i təv ŋgar tsa. Aɗaba Mezite Mesife ŋgar ata a dara ka, i təv mala mene are Yesuw Kiristi ya. Piŋŋe ka, kurum kàa tsarakum na wele ata a ti dere a ya. Ama kinehe ka, aka ndzera aka gər ahəɗ a kaɗəŋ.

⁴ Gà ɓəza gà, kurum kàa nwim ka, gà mburma Mbulum, kàa pazum aba gà ɓəzla məma à guma Mbulum ata nda pàrsa a bəɗ a. Aɗaba Mezite Mesife Mbulum ana i təv kurum a ka, a za mezite mesife ana i təv gà mburma gər ahəɗ a, nda ndzəɗa kweleŋ fètìte.

⁵ Gà ɓəzla pàrsa ata ti ne ka, gà mburma gər ahəɗ. Aɗaba taŋa, bazlam tar ana ti tsik a ya tekeɗe ka, aka gər gà dukw ana ika gər ahəɗ a mbaŋa, dite gà mburma gər ahəɗ ibam, tseŋgikkè tì dze a ter aaka a zləm lele kuɗa.

⁶ Ama kwa ka, kàa nekwa gà mburma Mbulum. Wur ana a sər Mbulum a ka, a dze a zləm a dukw ana ki tsikikwe a ya. Ama wur ana aka ne kəla Mbulum tsiye ka, à dze aà kwe a zləm tsa. Kamala taŋa ya na ki slekwe a aà masəra dər ikaba à gà mburma ata ya ka, wànà ti ndze a ana, nda Mezite Mesife ndzer ŋana ya, kige tsa nda mezite mesife ana a bene a mburma ya yà.

Mbulum ka, a waya mburma hinne

⁷ A kurum gà masla gà, wayakwa ba ika magər kwa ilik ilik tserdze, aɗaba mawàyà ba kwa ana ki weyekwe a ba ya ka, a dara ka, i təv Mbulum a. Wur ana a wayawa mburma ya ka, ŋgat aka ne ka, kəla Mbulum. Ŋgat ka, a sər Mbulum mbaŋa.

⁸ Wur ana a wayawa mburma tsiye ka, a sər Mbulum tsa, aɗaba Mbulum ka, ŋgat mala mawàyà ba nda gà mburma.

⁹ Kamala taŋa ya na Mbulum a ɗif a kwe a à mawàyà ba ŋgar a. A slər a kwara Kəla ŋgar ana mifèndèz ŋa ilik a, aka gər ahəɗ a, na dite kə̀ ŋgatakwa dər mesife awiya ŋa aɗaba ŋgat a.

¹⁰ Araha na dukw ana a ne mawàyà ba ya: Mbulum na a lah meweye kwa ya. A slər a kwara Kəla ŋgar a. A dara, a mət kamala dukw ana ta kəɗ a Mbulum biy taf a, na dite a pəl a kwa dər à bakal kwa ya, tsəka, kwa tsa na kà làhakwa aà mawàyà ŋgat a.

¹¹ A kurum gà masla gà, na Mbulum a waya kwa kamala taŋa ya ka, kwa tekeɗe ka, say wayakwa ba ika magər kwa kataya mbaŋa.

¹² Wur a riŋ aka ŋgat a Mbulum ilik zukw tsa. Ama ku mege kàa ŋgatakwar ilik tsa tekeɗe ka, aka ana ki weyekwe a ba ika magər kwa ilik ilik tserdze ka, Mbulum a ndze a i təv ilik ŋa nda gà kwa mbaŋa, dite mawàyà ba ŋgar ana a waya dər kwa ya ka, a ge a megemir i gəzləŋ kwa lele.

¹³ Mbulum a vəl a kwa Mezite Mesife ŋgar. Aɗaba taŋa na kà sərakwa dər ka, ki ndzekwe a i təv ilik ŋa nda gà ŋgat a, dite ŋgat tekeɗe ka, a ndze a i təv ilik ŋa nda gà kwa mbaŋa.

¹⁴ Mər ka, maa ŋgatar, na Mbulum Tsir kwa a slər a kwara Kəla ŋgar aka gər ahəɗ a ya, na dite a mbele a à mburma ya. Mì tsikewa a kurum ka, bazlam ata a ge ba ndzer kaɗəŋ.

¹⁵ Wur ana a gweɗe a ka, Yesuw Kiristi ŋgat Kəla Mbulum a ka, Mbulum a ndze a i təv ilik ŋa nda gà ŋgat. Ŋgat tekeɗe ka, ti ndze a i təv ilik ŋa nda Mbulum mbaŋa.

¹⁶ Mər ka, mì sər na Mbulum a waya kwa ya. Mì gəs taŋa ka, nda gəzləŋ mər lele mbaŋa. Mbulum ŋgat ka, mala mawàyà mburma. Wur ana a waya Mbulum, dite a waya mburma asa ya ka, ti ndze a i təv ilik ŋa nda Mbulum. Mbulum tekeɗe, a ndze a i təv ilik ŋa nda ŋgat mbaŋa.

¹⁷ Na kà wayakwa tar nda ndzer ŋa lele kamala taŋa ya ka, aləka a pat seriye Mbulum ana a ta ge a kwe a ya ka, ki gekwe a magəɗa tsidze. Ki gekwe a magəɗa tsəka, aɗaba mendze kwa ana ki ndzekwe a ika gər ahəɗ kinehe ya ka, ar ka, kamala mendze Yesuw Kiristi ana a ndza ɗa ika gər ahəɗ a mbaŋa.

¹⁸ Wur ana Mbulum a waya ŋgat a ka, a ta ge a magəɗa tsa, aɗaba meweye Mbulum ana a waya kwa nda ndzer ŋa aka ge mege megemir i gəzləŋ kwa lele ka, a delewe a à kwa magəɗa ya fit dze. Dukw ana a ge a magəɗa a mburma ya ka, seriye Mbulum. Aɗaba taŋa, na wura a ge a magəɗa ka, meweye Mbulum ana a waya ŋgat a ka, ar i gəzləŋ ŋgar fit kamala ana a sàs a Mbulum a tsa.

¹⁹ Kwa ihər ki weyekwe a gà Mbulum nda mburma ka, aɗaba Mbulum na a lah meweye kwa ya.

²⁰ Na wura a gweɗe a ka: «I waya Mbulum», ama ka, a riŋ a ne a are a mburma asa ka, wele ata ka, a sàs pàrsa masakəŋa. Aɗaba na bəla wura a weye a gà mburma ana a riŋ ihər a ŋgeter a ya tsəna, meme na a sle aà megweɗe a ka, i waya Mbulum ana aka ŋgatar ilik tsiye ya? A riŋ tsa, na taŋa ya.

²¹ Məpala ahəm Yesuw Kiristi ana a tsik a kwa ya ka, araha. A gwa ka: Na wura a waya Mbulum ka, ma waya mburma mbaŋa.