1 TIMUTE 2 - Bible Zulgo

Meme na mahàmà a Mbulum nda ndzer ŋa ya?

¹ Malahalah dukw ana a sèsiŋ metsike a gà mburma Mbulum a ka, araha: Hamum a Mbulum agəra mburma tserdze. Ɗə̀vum a tar zləm a təv ŋgar, dite ka hamumar agəra tar. Gwimer kəkaaha, aɗaba tar ata tserdze ya mbaŋa.

² Hamumar agəra gà Əbay gà bàba ŋana, nda gà asiŋ ŋana tar riŋ ta kwere a mburma pampam asa mbaŋa. Hamumar ka, na dite ki ndzekwe a barbararra zayzay lele ya. Ki gekwe a magəɗa a Mbulum, dite ka, mede kwa tekeɗe, a ge a ika miɗ ŋgar lele ya.

³ Na kàa gekwa gà taŋa ka, ŋgwal ŋa hinne, a tsahən aà Mbulum, mala məmbə̀là à kwa.

⁴ Aɗaba a waya ka, na mburma tserdze ta mbala ya, dite tə sər dər guma ana ndzer a.

⁵ Guma ata ka, biy mburma dze. Aɗaba Mbulum ka, ilik, dite wele ana a sər ba à gà mburma nda ŋgat a ka, ilik mbaŋa. Taŋa Yesuw Kiristi ana a ne mburma ya.

⁶ A dara ka, a vəl mesife ŋgar aà məmbùrùɗà dərra mburma i bakal tar a tserdze. A ɗif dər a mburma, a sàs a Mbulum ka, mburma ta mbala fit dze. Mbulum nda gər ŋgar mbaŋa na a vəl pat ŋa, na dite a geba kataya ya.

⁷ Aɗaba taŋa na Mbulum a slərra iye ya, i ne mala meslire ŋgar a. A slərra iye ya ka, aà meɗife à dukw ata a mburma, i tsik a guma ŋgar ndzer ŋana a gà mburma ana gà Yahuda tsiye, dite ka, ta gəs nda gəzləŋ ilik. I tsik taŋa ka, ndzer, tsəka, pàrsa iɗəm tsa.

⁸ kamala taŋa ya, a sèsiŋ ka, gà asləka ta hama a Mbulum i təv mayahaba gər, ku mege i ŋga tserdze. Ta heme a ka, bakal ma ge i gəzləŋ tar tsa. Matsəɓatsəɓ ana tərfə̀ɗ tərfə̀ɗ a, nda mayaha ahəm tekeɗe, ma ge riŋ tsa asa mbaŋa.

⁹ I gà məkəs ka, a sèsiŋ na ti dze akaba a gà petek ana a zle a arəv aà mburma ya tsa. Say petek ana ide zləməŋa pəra ya. Madùwàyà ba tar ma tə ndaha i tə̀vəməŋa ya tsa. Ti ta behe a à malàmà ambəz ŋger ŋger ŋger, dite ma zla arəv aà mburma ɓav tsa asa mbaŋa. Tə tə dza aaba dukw daala ana tsìrèslìslsle tsakala ŋa a beha hinne ya tsa asa. Tə tə dùwaya ba nda petek ana ɓə̀sl ɓə̀sl ɓə̀sl à sìkim a ba tsiye tsa mbaŋa.

¹⁰ A sèsiŋ ka, megemir tar ana ta ge a ŋgwal ŋa ya na a ne a madùwàyà ba tar a ivaɗ. Gà məkəs ana ta gweɗe a, mìi ge a magəɗa a Mbulum a ka, ta ge kamala taŋa ya nda gəzləŋ tar ilik.

¹¹ I təv ana ti tsik a ter a bazlam Mbulum a ka, tə̀ dza zləm lele, tə ndza tìytìy, ta həna à gər a bəɗ a wur ana a ɗif a ter a dər a.

¹² I vile a vatwa a gà məkəs, ta hitse a aka miɗ gà asləka, aà meɗe a tar à guma Mbulum tsa. A sèsiŋ na ta kwere a gà asləka ya ɓav tsa asa. Say ti ndze a ka, tìytìy.

¹³ Ti ndze a kataya ka, aɗaba malahalah ŋa ka, Mbulum a lah mege ka, Adama, dite a ge Hawa, məkəs ŋgar i dəba ya.

¹⁴ Masula ŋa ka, aɗaba Əbay sitene a baza za ka, a Hawa, tsəka, a Adama tsa. Kamala taŋa ya, məkəs na a ya məpala ahəm Mbulum a dala ya.

¹⁵ Ku mege kataya tekeɗe, gà məkəs ka, ta mbele a mbaŋa, aɗaba ana tar riŋ ta we a ɓəza ya. Ama kə̀la ka, say na tar riŋ ta gis a Mbulum kəla pat nda gəzləŋ ilik, ta weye a mburma, ta ge a ŋgwal ŋa ika miɗ Mbulum, dite ka, tar riŋ ta hinne a à gər tar a bəɗ lìɓɓet kəla pat asa mbaŋa ya dzekwiŋ.