1 TESALUNIKE 3 - Bible Zulgo

¹ I təv ana maa tsarakara duwa i təv kurum a asa tsiye ka, mì slewa aà magəsa gəzləŋ asa tsa, mì gwa ka, mìi slirehe a Timute a təv kurum, dite mər ka, mìi ndze a ɗa à gər mər i Atina tə̀ma.

² Kurum kà sərum, Timute ka, damər kwa ana mər ihər mìi ge akaba a megemir nda gà ŋgat a. Mər nda gà ŋgat ka, mì tsikewa bazlam ŋgwal ŋa ana aka gər Yesuw Kiristi ya. Mì sləraha ŋgat a təv kurum ka, dite mà zlak kurum, mə̀ mà a kurumaha à arəv, dite ka, ki ŋgetwim a ndzəɗa ika vatwa Mbulum ɓəŋɓəŋ lele.

³ Aɗaba a sàs a mər ka, wura ilik ma ta mà aà kurum a dəba ya, agəra mesewere are ana ki sèwèrwim a ika vatwa Mbulum a tsa. Aɗaba kurum kà sərum, vatwa ŋgiɗ a riŋ tsa, na dite kwa gà mburma Mbulum ki sèwèrekwe a are kamala taŋa ya ya.

⁴ Taŋa, aka na mər riŋ i təv kurum mba ya ka, maa mbər metsìkè a kurum aba mesewere are ana ti ti sèwèr a kwe a aka miɗ mba ya. Dite araha kinehe kuɗa ka, kurum tekeɗe, kàa sərum, aka ge ba kamala taŋa ya kaɗəŋ.

⁵ Aɗaba taŋa, i təv ana i sər, kurum ihər ki sèwèrwim a are ya ka, i sle aà magəsa gəzləŋ asa tsa. Kamala taŋa ya, i sləraha Timute a təv kurum ka, na dite i sir a dər, meme na ki ndzwim a ya ya. Wànà megìse kurum ana kə̀ gəsum Yesuw Kiristi nda gəzləŋ kurum ana, a de a aka miɗ aka miɗ a, tsəna, Əbay sitene aka bana kurum a. Na bəla kataya ka, taŋa megemir mər ana mì ge ika magər kurum a, a ne ka, taf masakəŋa.

Timute a màha à arəv a Pul

⁶ Ama kinehe, Timute ana a daha, dite a màra a təv mər a ka, a tsik a mər dukw ana ŋgwal ŋa ya, na aka gər kurum a. A gwaɗa a mər, megìse kurum ana kə̀ gəsum Yesuw Kiristi nda gəzləŋ kurum a ka, a riŋ a de a aka miɗ aka miɗ, dite nda gà mawàyà ba kurum ana kà wayum ba ika magər kurum ilik ilik tserdze ya asa mbaŋa. Dite a gwaɗa a mər asa mbaŋa ka, kà dzalawum gà gər a təv mər hiywe, nda maŋgayaba lele. Mìi kiv a kurum a ka, hinne, kamala kurum ana ki kìvwim a mər a ya mbaŋa.

⁷ Gà damər mər, maa sèwèr are ka, hinne, arəv aka da aà mər a. Ama i təv ana Timute a dara, a tsik a mər gà bazlam ata ya ka, a mà a məraha à arəv, aɗaba ana kurum riŋ ihər ki giswim a Yesuw Kiristi nda gəzləŋ kurum, a de a aka miɗ aka miɗ a.

⁸ Na kurum ihər ki dwim a ika vatwa Mbulum lele ka, a ŋgeyewe a mər a ba i gəzləŋ hinne.

⁹ Agəra maŋgayaba ata mìi ŋgeye a ba aɗaba kurum a ka, ku mege mì ge kəkaaha a Mbulum meme tekeɗe, a sle tsa.

¹⁰ Mì hamawa ka, nda gəzləŋ ilik, ku mege ndaàpat, ku mege ndaàvəɗ, na dite ka, mə vəl a məraha vatwa aà məfə̀rà aka kurum asa ya. Aɗaba a sàs a mər ka, meɗìfè a kurum à dukw ana kà sərum zukw tsiye, na dite megìse ana kə̀ gəsum Yesuw Kiristi nda gəzləŋ kurum a, à sìkèh a aka miɗ aka miɗ.

¹¹ I huɗ meheme ana mər ihər mìi heme a a gà Mbulum Tsir kwa nda Yesuw Kiristi BATSAH kwa ŋa ya ka, dite ta vəl a mər vatwa aà madaha a təv kurum.

¹² Mìi heme a a BATSAH kwa ŋa, dite mawàyà ba kurum ana ki weywim a ba ika magər kurum nda gà asiŋ gà mburma tserdze ya, mà səkah, ma ge a kurum hayaffà, ma da aka miɗ aka miɗ, na dite ki weywim a ba ka, kamala ana mì waya kurum mbaŋa ya.

¹³ Kamala taŋa ya, BATSAH kwa ŋa ata a vile a kurum a ndzəɗa a gəzləŋ ɓəŋɓəŋ lele. A pat ana Yesuw Kiristi à mère a ya ka, bakal a ge a i təv kurum tsidze, ki ndzwim a tsəɗaŋŋa ika miɗ Mbulum Tsir kwa. A pat ata ka, gà Yesuw Kiristi nda gà mburma ŋgar tserdze na ta mère a ya.