1 PIYER 5 - Bible Zulgo

Mendze ana ŋgwal ŋa gà mburma Mbulum ti ndze a ika magər tar a

¹ Kinehe ka, iye ihər i fèfil a a gà bàba ŋa ana ika magər kurum gà mburma Mbulum a. Iye tekeɗe ka, batsah ŋa mbaŋa. Na a ne mala sida mesewere are Yesuw Kiristi ka, iye ŋa naha. A pat ana Mbulum à mère a à Yesuw a təv kwa ya ka, gà mburma tì zlibe a à ŋgat parakkà aà are mburma tserdze. Iye tekeɗe, i ti zlibe a à ŋgat a hinne mbaŋa. Aɗaba taŋa, iye ihər i ge a kurum a kamkam:

² Gəsum gà mburma Mbulum ana a dza a kurum tar a ahər a. Gwim a tar gər lele, kamala mala makəva gà təmaŋ ana a ge a gər a gà təmaŋ ŋgar a. Gwim a tar gər ka, nda gəzləŋ ilik, kamala ana a sàs a Mbulum a, tsəka, kamala ana wura a fàr aka kurum ndzəɗa ya tsa. Ki gwim a megemir ata ka, nda meweye kurum, kamala ana madzala gà gər kurum a tsik a kurum a. Ka ta gwim are aka maŋgata nuba tsa.

³ Ka ta kwarum gà mburma ata nda ndzəɗa tsa. Ama zazamum ka, mendze ana ŋgwal ŋa ya, na dite a ɗif a ter a à vatwa, ti zezem a kurum i dəba ya lele ya mbaŋa.

⁴ Na kàa gwim dər kataya ka, a pat ana Yesuw Kiristi Əbay gà ɓəzla makəva gà təmaŋ a dere a ya ka, a vile a kurum a dukw maya ba kurum ana a zè a gà dukw tserdze, a ndze a aà biybiy a.

⁵ A kurum gà gawla tekeɗe ka, gəsum ahəm aà gà bàba kurum ŋa mbaŋa. I tsik a ka, a gà mburma tserdze: Ka ta gwim aba zlapa tsa. Hənum aba à gər a bəɗ ika magər kurum. Hadzalum ba kurum aà mazlàkà ba ika magər kurum asa mbaŋa. Aɗaba ta wetse i wakita Mbulum ka, ta gwa: «Mbulum a niw a gà ɓəzla zlapa. Ama a ge a ŋgwal ŋa a gà na tàa həna à gər tar a bəɗ a.»*fa*

⁶ Aɗaba taŋa, hənum à gər a bəɗ ika miɗ Mbulum ana ŋgat mala ndzəɗa, a kwere a gà dukw tserdze ya. Na kàa gwim kataya ka, a sìkèh a à kurum akahər ana ŋgat a waya ya.

⁷ Gà dukw ana ta wise a kurum a gər tserdze ya ka, ɗifwimer dər a ahər, aɗaba ŋgat riŋ a ge a kurum a gər lele.

⁸ Kaslum ba kurum, ka ndzum nda metsehe lele asa. Aɗaba Əbay sitene, mala mene are kurum a riŋ à sìweye a ika magər kurum kamala azil ana à ŋgìrìz a, a yehe a dukw mezime ya.

⁹ Dzìrìk hitswim aka miɗ ŋgar nda ndzəɗa megìse kurum ana kə̀ gəsum Mbulum a gəzləŋ kurum a. Aɗaba kurum kà sərum, gà asiŋ gà damər kurum ana ika vatwa Mbulum, ku mege i ŋga ika gər ahəɗ tserdze ya ka, tar riŋ tì sèwèr a are kamala kurum a mbaŋa.

¹⁰ Ama i dəba mesewere are kurum ana ki sèwèrwim a kinehe ya ka, Mbulum ana ŋgat mala mege ŋgwal a mburma tserdze ya, à lèmbeɗe a kurum à gər ŋgar, a vile a kurum a ndzəɗa ana dite, ki hitswim a dər lele, ki ta mirwim a aba a nda təv gà dukw ana tserdze ya ya. Aɗaba a zal a kurum ka, dite ka dumara, ka ndzum nda gà Yesuw Kiristi i təv mezlibe ŋgar ana tì zlibe a à ŋgat aà biybiy, à ndìv a tsiye.

¹¹ Ŋgat ka, mala ndzəɗa, a ndze a aà biybiy. *Amin.

Mandəva à mege wusa

¹² Silas na a zlèk iye aà mewetse a kurumaha kəla wakita aaha ya. Aɗaba i sər, ŋgat ka, damər gà ndzer ŋa ana ika vatwa Mbulum a. I wetse a kurumaha bazlam aaha ka, aà məma a kurumaha à arəv, dite kə̀ ŋgatum ndzəɗa. I tsik a kurum taŋa ka, aka gər ŋgwal Mbulum ana a ge a kwe a nda ndzer kaɗəŋ a. Kamala taŋa ya na i tsik a kurum mbaŋa ya. Mərum aba aà dukw ata.

¹³ Gà mburma Mbulum ana ika ahəɗ Babila, Mbulum a pala tar kamala ana a pala kurum a, ta ge a kurumaha wusa. Dite Markus, kəla gà tekeɗe, a ge a kurumaha wusa asa mbaŋa.

¹⁴ Geywim ba wusa ilik ilik tserdze nda mendzìwìɗèba ahəm ika magər kurum, aɗaba ana kurum nda gà damər a. Mbulum mə vəl a kurum mandza zayzay, nda matasla yam a gəzləŋ kurum tserdze, a kurum ana mandza ŋa i təv ilik ŋa nda gà Yesuw Kiristi ya.