1 Kurintiya 9 - Bible Zulgo

Mege megemir Mbulum Pul ana a ge biy taf a

¹ Fə̀rum aà mede gà ana i de a ya. Iye ana, i ziwe a gər gà tsiye? Iye mala meslire Mbulum asa tsiye? Dite Yàa ŋgat a Yesuw BATSAH kwa ŋa nda are gà mbaŋa tsiye? Kurum tserdze kà nwim gà mburma Mbulum ka, aɗaba iye, agəra ana i ge megemir a Yesuw BATSAH kwa ŋa ya.

² Ku mege gà mìsle ŋgiɗ ta gəs iye kamala ana iye mala meslire Mbulum tsiye tekeɗe, i təv kurum ka, kà sərum, iye ka, mala meslire ŋgar ndzer. Kə̀ gəsum Yesuw Kiristi nda gəzləŋ ka, aɗaba ana i ɗif a kurum à bazlam ŋgwal ŋa ya. Aɗaba taŋa, na a sər ba ka, iye mala meslire ŋgar ndzer kaɗəŋ a.

³ Na gà mburma ti yehe a bakal i təv ga ya ka, araha na dukw ana i tsik a ter aaka a ya:

⁴ Duwa a riŋ a peliŋ a ahəm a, na i ŋget a dukw mezime nda dukw mese, aɗaba megemir gà ana i gewa ya?

⁵ Kurum kù gwaɗum ana, duwa a riŋ a peliŋ a ahəm a, na i zle a daala, dite mìi sìweye akaba a i təv ilik ŋa məma, kamala gà Piyer ana nda gà asiŋ gà ɓəzla meslire Mbulum, nda gà damər Yesuw ta gewa ya ya?

⁶ Kurum kà dzalum ana, say mər nda Barnabas ɗekɗek, na mì gewa megemir, dite mì gala dər ba mər nda ahər mər ŋa ya ya?

⁷ Wànà wele ana ŋgat sliwdze ya, a ge a megemir gùvəl ana, aà taf pəra ya? Awaŋ. Dite weke na, bəla aka fət gùvàh, aləka duwa aka nah ka, a zim a tsiye? A riŋ tsa. Weke na, à kiv a gà duwa ka, a ɗwits a awah ŋa, dite a se a tsiye? A riŋ tsa asa.

⁸ Dukw aaha i tsik a kurum ka, taŋa a dara ka, i madzala gà gər mburma ya ɗekɗek tsa. Tàa wetse i wakita məpala ahəm Mbulum ka, kamala taŋa ya mbaŋa.

⁹ Musa a wetse ka, a gwa: «Na sla a riŋ a gek a megemir ka, ka ta tiker *tikwirek aka bazlam tsa.»*fa* Kà dzalum, Mbulum a tsik taŋa dze ana, agəra gà sla ya?

¹⁰ A tsik taŋa ana, aɗaba kwa ivaɗ tsiye? A tsik ka, aɗaba kwa ndzer dukw ŋgar. Gà mala meslìgè daw nda mala masàsà ŋa ka, gà ŋgwal ŋa ndzer, na ti tike a madzala gà gər tar tserdze aka dukw ana ti ta ŋget a iɗəm dukw maya ba tar a, aka miɗ a mba ya.

¹¹ Mì ɗif a kurum à vatwa Mbulum ka, kamala ana ti slige duwa a gùvàh a. Dite kà dzalum dze ana, na bəla mìi ŋget a dukw ana ika gər ahəɗ a, i ahər kurum ana, ŋgwala tsiye?

¹² Na gà asiŋ gà mìsle ŋgiɗ ta wiz a dukw ana ti ndze a dər a, i təv kurum ana, mər mìi sle a mewize mbaŋa, a zè a dər biy tar ata tsiye? Ama maa wiz aà kurum duwa ilik tsidze. Mì bàs gəzləŋ i mesewere are ana a le aà mər tserdze ya pəra mbaŋa, na dite ka, mìi hìndìk a a vatwa a bazlam ŋgwal ŋa ata aka gər Yesuw Kiristi, mburma tì dzer a zləm a tsiye.

¹³ Kurum kà sərum, gà na ta gewa megemir i ga Mbulum batsah ŋana ya ka, ta ŋgatawa dukw ana ti ndze a dər a, i huɗ dukw ana gà mburma tə dzawa a fataya. Gà na ta batsawa duwa a Mbulum a tekeɗe, ta ŋgatawa iɗəm biy tar a mbaŋa, ta pèpìɗiŋa.

¹⁴ I təv gà na ti tsik a bazlam ŋgwal ŋana a mburma ya mbaŋa ka, kamala taŋa ya. Yesuw Kiristi BATSAH kwa ŋa a gwa ka: Say gà mburma tì dze a duwa a gà na ti tsik a bazlam gà ya.

¹⁵ Ama ku mege kataya tekeɗe, iye ka, Yàa wiz aà kurum duwa ilik tsidze. Ku mege kinehe, Yàa gwaɗa a kurum ka, slirwimiŋara duwa ya ka, Yàa tsik ɓav tsa. Ŋgulum na i mət à may a ivaɗ, na ndəna i wiz aà kurum a duwa ya. Aɗaba wura ilik ma tə nəs à dukw maŋgayaba gà ana a ŋgeyiŋ dər ba i gəzləŋ a tsa.

¹⁶ Metsìkè bazlam Mbulum ana i tsik a kurum a ya ka, aka viliŋ vatwa aà mege dər zlapa tsa, aɗaba megemir ata ka, i Mbulum na taŋa ya. Ŋgat na a gweɗiŋ, tsik a tar a. Aɗaba bəla na Yàa tsik a tar tsəka, ndelèɓ ndelèɓ mesewere are ika gər gà.

¹⁷ Na mege i zla megemir ata nda meweye gà ka, ana ka, ŋgulum ta viliŋ a dukw maya ba gà zaakwa. Ama i zla ka, nda meweye gà tsa. Iye ihər i ge a ka, ka ta gwaɗum nda mezìwè gà gər gà tsa, aɗaba Mbulum na a viliŋ a ahər a.

¹⁸ Dukùla na a ne dukw maya ba gà ata ya? Na a ne ka, bazlam ŋgwal ŋa ana i tsik a a mburma ka, biy taf, Yàa wiz duwa tsiye. Vatwa a riŋ te ibam, na ta viliŋ a duwa agəra bazlam ŋgwal ŋa ata i tsik a ter a ya. Ama ka, Yàa gəs tsa.

¹⁹ Ku mege iye ɓele wura tsa tekeɗe, ama i həna à gər a bəɗ aà mene ɓele mburma tserdze ivaɗ, na dite i zlèk a mburma, ti dere a hinne, ta gis a Yesuw Kiristi nda gəzləŋ tar a.

²⁰ Na bəla iye riŋ ika magər gà Yahuda ya ka, i ndze a kamala tar a mbaŋa, na dite i zlèk a tar aà magəsa Yesuw Kiristi ana ta gəs nda gəzləŋ tar a. Məpala ahəm Musa ka, a kwere a iye asa tsa seyiŋ, ama i təv ana iye riŋ i liwiŋ gà na ti zezem a məpala ahəm ata ya ka, i ge a kamala tar a mbaŋa, dite na kìtseŋ kìtseŋ i gese a ter a ahər a təv Yesuw Kiristi ya.

²¹ I təv ana iye riŋ ika magər gà mburma ana tə sər məpala ahəm Musa ata tsiye ka, i gewa kamala tar a mbaŋa, na dite ka, i gese a ter a ahər aka miɗ Mbulum mbaŋa ya. Yàa gwa ka, i gis a ahəm aà məpala ahəm Mbulum tsəka, Yàa tsik tsa, aɗaba i zezem a ka, məpala ahəm Yesuw Kiristi ndzer dukw ŋgar.

²² Ama na iye riŋ ika magər gà mburma ana tàa sime ika vatwa Mbulum zukw tsiye ka, i newa à ba gà kamala tar a mbaŋa, na dite i yehere a tar a təv Mbulum a. Ku mege gà dukùla tekeɗe ka, na Yàa ndze a təv tar ka, i ndze a kamala tar a mbaŋa. I gewa dər kataya ka, aà dite gà asiŋ ŋana i liwiŋ tar a, ta mbala, na mege a ge a ba ya.

²³ Dukw ata i ge a tserdze ya ka, na dite bazlam ŋgwal ŋana ma da aka miɗ aka miɗ a. A sèsiŋ ka, i ŋget a dər mipìsè ahəm Mbulum ana a pisiŋ a ya, mər nda gà asiŋ gà mburma ana ta gəs bazlam ata tserdze mbaŋa ya.

²⁴ Kurum kà sərum, gà mburma hinne na tì dzer a ba aà mivele sah lele ya. Ama ələk ti ndze a a təv ana tì tìz aɗəm a ya ka, mburma ilik pəra na à lèh a, à zè a dər gà biy ŋgiɗ aaha ya. Ŋgat ka, a ŋget a dukw maya ba ŋgar. Aɗaba taŋa, iye ihər i tsik a kurum ŋa: Mərum aba, kamala gà ɓəzla metìze ata ya, dite na ki ŋgetwim a dukw maya ba kurum a.

²⁵ Wur ana a sasar a vel a sah lele ya ka, a tike a ndzəɗa aka ba ŋgar, kilɓesl kilɓesl à tètìɗ a à mile ŋgar dzekwiŋ, na dite à zè a dər gà biy ŋgiɗ aaha, a ŋget a dukw maya ba ŋgar a. Dukw maya ba ŋgar ata kəla ka, kwiɗèy à ndìviŋa, a ndze a hinne tsa. Ama kwa kinehe ka, tàtə̀ɗakwa à mile ika vatwa Mbulum, na dite ki ŋgetekewe a dukw maya ba ana a ndze a aà biybiy a.

²⁶ Aɗaba taŋa, iye ihər i vel a ka, kamala wele ana a vel a sah lele ya. Dite iye tekeɗe ibam, i mir a à ba ika vatwa Mbulum kataya mbaŋa kamala wele ana duzl a ge a madugwazlà ahər a mburma ka, a me a a bəɗ taf masakəŋa tsiye.

²⁷ I gìzl a ba gà nda ahər gà ŋa, dite na à gis aà iye a ahəm a. Aɗaba a sèsiŋ ka, iye na i zal a bəɗ aà mege dukw ata ya, dite ka, i ndze a iɗəm a bəɗ a ka, a ge a ba tsa. Kamala taŋa ya, a pat seriye Mbulum ka, ma ta mà à iye a dəba tsa, na iye ana i ɗif à bazlam ŋgar a mburma ya.