1 Kurintiya 7 - Bible Zulgo

Bazlam mazla daala, nda mada a zal

¹ Kinehe ka, a sèsiŋ i fèfil a kurum a aka gər dukw ana kà wizwim aà iye, kà wetswim a huɗ wakita kurum ata ya. I gwaɗa a kurum ka: Na wura a zle a daala tsəka, a ge ŋgwal ŋa.

² Ama ka, ŋgwal ŋa mbaŋa na asləka a zlebe a daala ya, dəm ŋa ibam, a de a a zal a, na dite ka, ta ge a mezelme nda təv muva asa tsiye.

³ Asləka ma ge a məkəs ŋgar ka, dukw ana a dar a gər lele ya. Məkəs tekeɗe ka, ma niw aba a zal ŋgar tsa mbeete.

⁴ Ba məkəs ka, biy ŋgar ɗekɗek tsa. A ne ka, biy zal ŋgar mbaŋa. Asləka ibam, ba ŋgar ka, biy ŋgar ɗekɗek tsa asa. A ne ka, biy məkəs ŋgar mbaŋa asa.

⁵ Kamala taŋa ya, gà zal nda gà məkəs ka, ti niweyeba à ba tar tsa. Say na bəla kà dzum akaba bazlam nda lìfèɗìɗe ŋa, a sàs a kurum ki ndzwim a iba ya pampam zaakwa ya pəra, na dite ki slwim a aà mahàmà a Mbulum lele ya. Ama ka, ka tə ndzum aba ya hinne tsa, dəlfay ki mwim akabiŋa, tsəka, ki ti slwim a aà makwàrà ba kurum asa tsa, Əbay sitene a ta bene a kurum, a dzeye a à kurum ika vatwa Mbulum a.

⁶ Dukw ana i tsik a kurum aka gər mazla daala ya ka, Yàa gwaɗa a kurum ka, bàlaarì, ki gwim a kamala taŋa ya tsa. Seyiŋ tsa, i gwaɗa a kurum ka: Na a sàs a kurum mege kamala taŋa ya ka, bakal iɗəm tsa ivaɗ.

⁷ I waya ka, ŋgulum mburma tserdze tə ndza magamza ŋa kamala iye ya mbaŋa. Ama ka, ŋgwal ŋa ɓav tsa na taŋa ya, aɗaba Mbulum aka vəl mendze pampam, ku mege a weke. A mìsle ŋgiɗ ka, a viler a məkəs, dite a biy ŋgiɗ aaha ka, a viler a ndzəɗa də̀kka aà mandza magamza ŋa kamala taŋa ya.

⁸ Kinehe ka, iye ihər i fèfil a a gà na tàa zla daala ilik tsiye, nda gà dəm ana tàa da a zal ilik tsiye, nda gà madakwa gà məkəs tserdze. I gweɗe a ter a: Ŋgwal ŋa ka, ki ndzwim a kamala iye ana magamza ŋa ya mbaŋa.

⁹ Ama na bəla ki slwim a aà makwàrà ba kurum tsəka, ŋgulum ki zlwim a daala. Gà dəm nda gà madakwa gà məkəs ibam, ti deye a zal, ndəna meèweke gà məkəs nda biy gà zal ɓìlè ɓìlè à gis a kurum hinne ya.

¹⁰ Kinehe ka, iye ihər i fèfil a a gà na tàa ndzək daala ya, nda gà məkəs ana tàa daya a zal a. I tsik a taŋa ka, dukw ana a dara i madzala gà gər gà ya tsa.

¹¹ Ama bazlam ata ka, i Yesuw Kiristi BATSAH kwa ŋa, a gwa ka: Məkəs ma ta miyak à zal ŋgar tsa. Ama na bəla aka miyak à ŋgat ka, ma tə da a zal ŋgiɗ asa tsa. Na bəla a sasar gà zal ŋgiɗ tsəka, mə̀ mbəɗ gər a bəra zal ŋgar aaha ndeɗiŋa ya. Tə sər ba ivaɗ. Zal ŋa tekeɗe ka, ma tə dalawa məkəs ŋgar tsa mbaŋa.

¹² Kinehe ka, iye ihər i fèfil a a gà mburma ana tserdze ya. Dukw ana i tsik a ya, a dara ka, i bazlam gà ya, tsəka, i bazlam Yesuw Kiristi ya tsa. I gweɗe a: Na bəla wura a riŋ, ŋgat mala mazazama Yesuw Kiristi, daala ŋgar a riŋ, ama daala ŋgar ata ka, aka gəs Yesuw nda gəzləŋ zukw tsa. Na bəla a waya mandza nda zal ŋgar ata ka, wele ata ma dalawa ŋgat tsa.

¹³ Kamala taŋa ya, na i təv məkəs ana ŋgat mala mazazama Yesuw a mbaŋa. Na bəla zal ŋgar ka, mala mazazama Yesuw tsa, ama na aka sasar ti ndze a nda məkəs ŋgar ata ka, məkəs aaha tekeɗe, mə̀ miyak à ŋgat tsa.

¹⁴ Aɗaba məkəs ana zal ŋgar mala mazazama Yesuw zukw tsiye ka, Mbulum a fir a aà wele ata pam i ba nda gà asiŋ gà mìsle ŋgiɗ ana tə sər Mbulum tsa ndeyndey a, agəra məkəs ŋgar aaha mala mazazama Mbulum a. I təv məkəs ana ŋgat mala mazazama Yesuw zukw tsiye tekeɗe, ar ka, kamala taŋa ya mbaŋa. Mege kataya tsəka, ana ka, gà ɓəza kurum tekeɗe, ti ne a kamala gà na tə sər Mbulum tsidze ya mbaŋa asa. Ama kinehe i təv gà ɓəza kurum ka, ŋgulum, tsəka, kamala taŋa ya asa tsa. Mbulum a fə̀r aà tar ka, pam.

¹⁵ Ama kəla ka, na bəla wur ana ŋgat mala mazazama Yesuw tsiye, aka sasar mimìyàkà à biy ŋgiɗ aaha aka gəs a ka, tə da ikaba ya pəra. Biy ŋgiɗ aaha ta miyak dər a, ku mege məkəs, ku mege zal tekeɗe ka, ma dzala duwa tsa, aɗaba biy ŋgar ka, bakal ŋgar a riŋ tsa, a ziwe a gər ŋgar. Mbulum a zal a kurum ka, na dite ki ndzwim a nda zay lele ya.

¹⁶ A kər məkəs ana kər kàa gəs Mbulum nda gəzləŋ yak a, meme na ki sir a dər ka, Mbulum a ta mbil a à zal yak aɗaba kər a? Kige tsa kər zal ŋa mbaŋa, meme na ki sir a dər ka, Mbulum a ta mbil a à məkəs yak aɗaba kər a? Ki sirwim a tsa.

Ndzum ka, kamala ana Mbulum a lah mezele a kurum a

¹⁷ Araha kəla ka, ku weke ma zazam dukw ana Əbay Mbulum a vəlar a. Dite ka, ma ndzawa ka, kamala ana akahər ata Mbulum a zalar a mbaŋa asa. Taŋa ka, dukw ana i ɗifewa dər a gà mburma Mbulum i gà təv ga mayahaba gər tar ana ti yahawa ba aɗəm gər tserdze ya.

¹⁸ Kamala taŋa ya, na bəla Mbulum a zalak, kàa mbər mesèse ba ka, ki ndzebe a masàsà ŋa kataya dukw yak. Nda gà bəla i təv ana Mbulum a zalak, kər masàsà ŋa zukw tsəka, ka tə sàs ba tsa mbaŋa.

¹⁹ Na bəla kər masàsà ŋa, kige tsa bəla masàsà ŋa tsa ika miɗ Mbulum ka, ilik, duwa a riŋ a ge a ŋgulum tsa. Dukw ana a ge a ŋgulum a ka, ta gəs ahəm aà Mbulum lele.

²⁰ Ku weke ma zazam ka, vatwa ŋgar ana akahər ata Mbulum a zalar a.

²¹ Na bəla kər ɓele akahər ana Mbulum a zalak a ka, ka dzala duwa tsa. Ama na bəla vatwa a riŋ, na ki ndze a nda mezìwè gər yak ka, ki gis a taŋa pəra.

²² I gwa: Na bəla kər ɓele ka, ka dzala duwa tsəka, aɗaba ɓele ana Mbulum a zalar a ka, ndzəɗakkà a ndze a ka, a ziwe a gər ŋgar kuɗa, agəra ana mandza ŋa i təv ilik ŋa nda Yesuw Kiristi ya. Kamala taŋa ya mbaŋa, wele ana a ziwe a gər ŋgar, Mbulum aka zalar a ka, ŋgat aka ne ka, ɓele Yesuw Kiristi mbaŋa.

²³ Mbulum aka mbùrùɗara kurum a təv ŋgar a nda dukw ana à sìkim a ba tsiye. Aɗaba taŋa, ka nwim à ba kurum ka, gà ɓele mburma asa tsa.

²⁴ Ga damər gà, iye ihər i tsik a kurum ŋa: ku mege weke ma ge ka, megemir ana a ge akahər ata Mbulum a zalar dər a. Tə ndza i təv ilik ŋa nda Mbulum.

Bazlam aka gər gà magamza, nda gà madakwa gà məkəs

²⁵ Ka wizwim aà iye bazlam agəra gà magamza ana ti ndzeye a ya, nda gà dəm ana tàa da a zal ilik tsiye mbaŋa. Dukw ana i tsik a ya ka, i tsarakara ka, i təv Yesuw Kiristi BATSAH kwa ŋa ya tsa. I tsik a ka, dukw ana i dzala nda madzala gà gər gà ya ɗekɗek. Ama ŋgulum ka, ki dzwìmiŋ aaka a zləm mbaŋa, aɗaba iye ka, mala ndzer, agəra ana Yesuw Kiristi BATSAH kwa ŋa a giŋ ŋgwal ŋa ya.

²⁶ I gwa ka, ŋgulum gà asləka ti ndzeye a gà magamza ŋa, gà dəm ibam, ti ndzeye a aà ga ma. I tsik kataya ka, aɗaba i samata, mesewere are ana ki sèwèrwim a kinehe ya ka, a beha.

²⁷ Na bəla məkəs a riŋ aà kər ka, ka yaha vatwa aà madalawa ŋgat tsa. Na bəla ar aà kər tsəka, ka yaha vatwa aà mazla ŋa ɓav tsa asa.

²⁸ Ama ku mege i tsik kataya tekeɗe ka, na bəla ki zle a ka, bakal iɗəm tsa. Kige tsa dəm ga ma a waya a de a a zal tekeɗe ka, bakal iɗəm ɓav tsa asa mbaŋa. Ama sərum dər, gà na tàa zla daala ya, kige tsa gà na tàa da a zal a ka, tàa ŋgat mesewere are hinne ika gər ahəɗ. Aɗaba taŋa na i gwa, ki gwim kataya, tsəka, aɗaba i waya tsa na mesewere are ata a le aà kurum a ya.

²⁹ Gà damər gà, wur bazlam ana a sèsiŋ i tsik a kurum a ya ka, araha: Aɗaba məpàslà ahər ana Mbulum a tike a mər a ka, hinne asa tsa na a zeha ya, aka nikiɗ. Agəra taŋa, daga aà kinehe ya, gà na məkəs aà tar a ka, ta ge mege megemir Mbulum ka, kamala ana məkəs aà tar tsiye.

³⁰ Gà na ti tiwe a ya tekeɗe, ta ge ka, kamala ana duwa à tsìɓ a ter a tsiye. Dite gà na ta ŋgeye a ba ya ibam, ta ge ka, kamala ana ta ŋgeye a ba tsiye. Gà na tə sakamawa gà duwa ya tekeɗe ibam, tə ndza ka, kamala ana tàa sakama duwa tsiye mbaŋa.

³¹ Gà na ta ge a megemir nda dukw gər ahəɗ aaha ya tekeɗe, tə ndza ka, kamala ana tàa tike aaka madzala gà gər tar tsiye. Aɗaba gər ahəɗ aaha a ndza kamala naha kinehe ya ka, kwilkwèndeh à ndìviŋa.

³² Ama a sèsiŋ ka, ka dzalum duwa tsa. Wur ana məkəs ihər tsiye, a tike a madzala gà gər ŋgar ka, aka mege megemir BATSAH kwa ŋa ɗekɗek, na dite à tsehin ahər a lele ya.

³³ Ama wele ana məkəs ihər a, ŋgat a tike a madzala gà gər i ŋgar ka, aka dukw ana ika gər ahəɗ a. A sasar a ge a ka, dukw ana à tsehin a aà məkəs ŋgar,

³⁴ dite aà Mbulum mbaŋa ya, fit sula məma. Kamala taŋa ya, madzala gà gər a de a ka, vatwa sula wàkit wàkit. I təv gà məkəs tekeɗe, ar ka, kamala taŋa ya mbaŋa. Məkəs ana zal ŋgar a riŋ tsiye, kige tsa, dəm ana aà ga ma ya, tar ti tike a madzala gà gər tar ka, aka megemir Yesuw Kiristi BATSAH kwa ŋa ɗekɗek pəra. A sàs a tar ta vile a gəzləŋ tar ka, a Mbulum, na dite ti zezem a ŋgat, ku i təv dukùla ya tserdze ya. Ama məkəs ana zal ŋgar a riŋ a, ŋgat a dzele a ka, aka dukw gər ahəɗ, a sasar a ge a ka, dukw ana à tsehin a aà zal ŋgar a mbaŋa.

³⁵ I tsik a kurum gà dukw ata ka, dite mà zlak kurum, tsəka, i pala a kurum ahəm tsa. A sèsiŋ ki gwim a ka, dukw ana a de a ndaka vatwa ŋa ya ivaɗ, dite ki gwim a mege megemir Yesuw Kiristi BATSAH kwa ŋa nda gəzləŋ kurum ilik.

³⁶ I fèfil a kinehe agəra gawla ana makasl ŋgar a riŋ a mbaŋa. Na bəla wele ata a dzele a, a gweɗe a: I miyek a à ŋgat. Tsaatsa, a tsik kataya ka, arəv tar ikaba, a waya mandàɗà hwarwa aka dəm aaha à gər ŋgar tsa, dite meèweke ba tar tekeɗe, ar ikaba ka, ŋgulum ma zla ŋgat kaɗəŋ, kamala ana a waya ŋgat ndeɗiŋa ya, bakal iɗəm tsa.

³⁷ Ama na bəla wele ata aka dzalara i gəzləŋ ŋgar a nda ndzer, a gweɗe a: I zle a makasl gà ata asa tsa. A ndze a də̀kka, a sle a aà makwàrà ba ŋgar ka, wura a peler a ahəm tsa. Taŋa ka, lele mbaŋa na a zle a tsiye.

³⁸ Kamala taŋa ya, wur ana a zle a daala ya ka, a ge lele. Wur ana a zle a tsiye tekeɗe, a ge taŋa ka, ŋgwal ŋa lele ndzer, à zè a dər wele ana aka zla ya.

³⁹ Aɗaba taŋa, naha i fèfil a ka, a məkəs ana zal ŋgar a riŋ nda are mba ya. I ŋgar ka, vatwa a riŋ aà mada a zal ŋgiɗ tsidze. Say na bəla zal ata aka mət a dzekwiŋ, taŋa ka, a sle a aà mada a zal ŋgiɗ kuɗa kamala ana ŋgat a waya ya, bakal iɗəm tsa. Ama mada a zal kəla ka, a bəra wur ana ŋgat mala mazazama Yesuw a mbaŋa.

⁴⁰ Iye i dzala asa ka, i gwa: Na a ndze a kataya, a de a a zal asa tsəka, maŋgayaba ŋgar a zè a biy na aka da a zal a ivaɗ. Ama i sər, dukw ana i tsik a i faha ya ka, Mezite Mesife Mbulum na a ɗifiŋ dər a mbaŋa.