1 Kurintiya 16 - Bible Zulgo

Ti yehe a gər a siŋgwe aà mazlàkà dər gà mburma Mbulum ana i Yeruzalem a

¹ Kinehe ka, a sèsiŋ i fèfil a kurum a aka gər bazlam siŋgwe ana ki yehwimer a gər, aà mazlàkà dər gà mburma Mbulum ana i Yeruzalem a. Ama ki gwim a dər ka, kamala ana i tsik a gà mayahaba gər gà mburma Mbulum ana ika ahəɗ Galatiya ya mbaŋa.

² Kəla ladà, ku mege weke, tsə̀nə̀hum akaba siŋgwe zaakwa zaakwa kamala dukw ana kàa ŋgatum, Mbulum aka vəl a kurum a. Ki gwim a dər kataya, na dite ələk aka təv ana Yàa ndzeha a təv kurum ka, siŋgwe ata aka sle, kàa mbər mayahumar gər a.

³ Yàa daha ka, i wetse a wakita, i vile a ahər a gà na kà palum tar aà megemir ŋa ya, dite ka, i slir a dər tar a Yeruzalem.

⁴ Na bəla Yàa samata, a ge a ba ka, mìi de akaba a nda gà tar tserdze a təv ilik ŋa.

Dukw ana a sàs a Pul a ge a ya

⁵ A sèsiŋ ka, i de a aka ahəɗ Makaduniya, dite na i dehe a a təv kurum a. Aɗaba i waya ka, i lìm a aka gà mayahaba gər gà mburma Mbulum ana i fataya tserdze.

⁶ Aləka na Yàa ndzeha a təv kurum ka, i ti ndze a riŋ ika magər kurum zaakwa dukw ŋgar. Kamala taŋa ya, na mege a ge a ba ka, i ndze a riŋ i təv kurum, haa a təv ana mə̀tasl aka dza ahər ba, dite aka ndəv iɗəm a ya. Aləka i təv ana i mèhe a ba ya asa ka, ki zlèkwim a iye nda təv mesìweye gà ana i de a ku mege a ŋga ya.

⁷ Na Yàa daha aà məfə̀rà aka kurum ata ka, a sèsiŋ tsa na i ndze a i təv kurum rà/?raats zaakwa pəra ka, i de a aà kurum a tsara ya. Na BATSAH kwa ŋa aka waya ka, ki ti ndzekwe a zàkwayiya lele dukw ŋgar i təv ilik ŋa.

⁸ Ama kinehe kəla ka, a sèsiŋ, i ndze a ɗa i kwite Efesiya mba, haa a pat *megirive Pantakwasta.

⁹ Aɗaba Yàa ŋgat vatwa aà megemir Mbulum parakkà lele, a de a aka miɗ aka miɗ. Dite asa ka, agəra ana gà ɓəzla mene are gà ɗa hinne i faha, ti nisiŋ a à mege megemir a.

¹⁰ Na Timute aka ndzeha a təv kurum ka, gəsum ŋgat lele, na dite a ge a magəɗa tsiye. Aɗaba ŋgat ka, a gewa mege megemir BATSAH kwa ŋa kamala ana iye i gewa ya mbaŋa.

¹¹ Aɗaba taŋa, wura ilik ma ta fə̀r ahər ka, kamala za ya tsa. Zlakum ŋgat nda təv mesìweye ŋgar ata a dere a ya, na dite a de a dər aka miɗ aka miɗ nda zayya lele, tsìm a ndzere a a təv ga ya tekeɗe, lele asa mbaŋa ya. Aɗaba mər tserdze nda gà asiŋ gà mburma Mbulum ana ɗa i faha ya ka, mər ihər mìi veve a ɗa ŋgat.

¹² Ama damər kwa Apalus ka, Yàa tsiker sik diŋ, i gwaɗar ka, tə daha a təv kurum nda gà asiŋ gà mburma Mbulum, dite ta ge a kurum wusa te. Ama ka, a niw medeha kinehe tə̀ma. Aka miɗ zaakwa ka, bəla a ŋget a vatwa, a dehiŋa.

Mandəvandəv bazlam nda mege wusa

¹³ Ndzum ka, nda metsehe lele. Dite megìse kurum ana kə̀ gəsum ŋgwal bazlam ata nda gəzləŋ ilik a ka, ka dum dər aka miɗ aka miɗ. Arəv ma da aà kurum a tsa, gəzləŋ kurum ma ndza ka, ɓəŋɓəŋ lele.

¹⁴ Dukw ana ki gwim a tserdze ya ka, gwim nda mawàyà ba ana ki weywim a dər gà asiŋ gà mìsle ŋgiɗ a.

¹⁵ Gà damər ga, kurum kà sərum gà Sitefanas nda gà mburma ana i ma ŋgar a tserdze. Dite kà sərum mbaŋa ka, tar na tə lah aà magəsa Yesuw Kiristi ika ahəɗ Akaya a riŋ i faka ya. Tar ka, ta vəl ba tar aà megemir Mbulum, na dite tì zlèk a gà mburma Mbulum lele ya. I ge a kurum kamkam:

¹⁶ Gəsum ahəm aà gà medzibe gà mburma ata. Hənum à gər a bəɗ a gà asiŋ gà na a ta ge a megemir Mbulum ika magər gà mburma Mbulum a lele, a təv ilik ŋa nda gà tar ata tserdze ya mbaŋa.

¹⁷ Iye ihər i ŋgeye a ba ka, hinne, agəra ana gà Sitefanas nda Fartunatus, nda gà Akayus, tə dara a təv ga ya ya. Tə dara ka, avukw kurum ana ki dwimera, ki zlèkwim a iye zləmana ya.

¹⁸ Tàa mìŋaha à arəv, kamala ana ta mà a kurumaha à arəv a mbaŋa. Medzìbe gà mburma ata ka, zlə̀bum à tar lele.

¹⁹ Taŋa gà mayahaba gər gà mburma Mbulum ana pampam ɗa ika ahəɗ Asiya i faha ya, ta ge a kurumaha wusa hinne. Gà Akila nda daala ŋgar Piriskila nda gà asiŋ gà mburma Mbulum ana ti yahawabaha gər a təv tar a, ta ge a kurumaha wusa tserdze mbaŋa, nda zləm Yesuw Kiristi BATSAH kwa ŋa.

²⁰ Gà asiŋ gà mburma Mbulum ana ɗa i faha ya tserdze, ta ge a kurumaha wusa mbaŋa. Geywim a ba wusa ika magər kurum ilik ilik tserdze nda gəzləŋ ilik.

²¹ Taŋa kinehe, iye ihər i wetse a kurumehe a nda ahər gà ŋa kuɗa. Iye Pul, i ge a kurumaha wusa mbaŋa.

²² Na wura a waya BATSAH kwa ŋa nda gəzləŋ ilik tsəka, Mbulum mə vəlar mezelme. Gər a gwa, Marana ta, kamala megweɗe ya ka: «Batsah mər ŋa, dara te.»

²³ Yesuw BATSAH kwa ŋa ma ge a kurum ŋgwal ŋa aka miɗ aka miɗ.

²⁴ I waya kurum tserdze ka, agəra ana kwa mandza ŋa i təv ilik ŋa nda gà Yesuw Kiristi ya.