1 Kurintiya 11 - Bible Zulgo

¹ Zazamum ka, mede gà ana i de a ya, kamala iye ana i zezem a dukw ana Yesuw Kiristi a ge a ya mbaŋa.

Mege metsehe agəra madànà feɗere a gər

² I zlibe a à kurum, aɗaba ana kurum ihər ki dzelwim a aka bazlam gà tserdze kəla pat, dite kurum ihər ki zezemwim a ka, dukw ana i ɗif a kurum a dər mbaŋa ya.

³ Ama a sèsiŋ ka, ki sirwim a mbaŋa, Yesuw Kiristi ka, ika gər gà asləka gà mburma tserdze. Asləka ibam, ika gər məkəs. Dite Mbulum ka, ŋgat ika gər Yesuw Kiristi mbaŋa.

⁴ Aɗaba taŋa, na wura a heme a a Mbulum ika miɗ mburma, kige tsa à me a ter a à bazlam Mbulum ka, ma zla felère i gər a, tsəka, à ndeɗe a hwarwa aka Yesuw Kiristi ana ŋgat Əbay ika gər ŋgar a.

⁵ Ama i təv gà məkəs ka, pam. Na bəla a heme a a Mbulum, kige tsa à me a à bazlam Mbulum a mburma, à kèhe a gər tsa, à pèt a dər kwàndàlàz kataya ka, taŋa ka, a ndaɗa hwarwa aka zal ŋgar mbaŋa. A ne à ba ŋgar kamala məkəs ana muva ŋa i gwala kurum ka, kùndemmè à zèz a ikaba ambəz a ya.

⁶ Na bəla məkəs ana a ge a kataya, à dèn a feɗere a gər tsəna, dite aàla na à zèz a gər tsiye? Ama na bəla aka sàs ika ambəz ŋgar a, kige tsa aka zàz ka, ki sirekwe a dər, a ge taŋa ka, dukw hwarwa. Aɗaba taŋa, say mà dàn feɗere a gər.

⁷ Ama na asləka mburma a heme a a Mbulum ka, ma zla felère i gər a. Aɗaba Mbulum a ge ŋgat ka, kamala mendzikiɗe ba ŋgar a. Taŋa a ɗif a ka, à ndzəɗa Mbulum ana a za gà dukw tserdze ya. Ama məkəs ka, mà dàn feɗere a gər, aɗaba ŋgat a ɗif a ka, à mezlibe zal ŋgar ɗekɗek pəra.

⁸ Aɗaba kurum kà sərum, Mbulum a zla ka, slu ba məkəs, na dite a ge dər ba asləka mburma ya tsa. Ama a zla ka, slu ba asləka mburma ivaɗ, na dite a ge dər ba məkəs a.

⁹ Kamala taŋa ya tekeɗe, Mbulum a ge asləka mburma ka, aɗaba məkəs tsa, a ge məkəs ka, aɗaba asləka mburma ivaɗ.

¹⁰ Aɗaba taŋa, say gà məkəs tə dànaya feɗere a gər, na dite tì zlibe a dər à gà zal tar, dite agəra gà gawla Mbulum mbaŋa ya.

¹¹ Ama ku mege kataya tekeɗe, ika miɗ Yesuw BATSAH kwa ŋa ka, məkəs a ndze a à gər ŋgar tsa, say i ahər asləka mburma dukw ŋgar. Dite asləka mburma tekeɗe, a ndze a ka, à gər ŋgar ɓav tsa, say nda məkəs mbaŋa.

¹² Aɗaba Mbulum a zla slu ba asləka mburma, na dite a ge dər məkəs a. Ama kəla ka, gà məkəs na ta we a gà asləka mburma kinehe ya. Ama gà tar ata sula məma ya ka, Mbulum ana a ge duwa tserdze ya, na a ge tar a.

¹³ Dzalum nda gà gər kurum dzekwiŋ: na bəla məkəs a dehe a a ga Mbulum, a heme a a Mbulum ka, ze madànà feɗere a gər ana, taŋa ana, lele ya? Tsikwim kwaŋ.

¹⁴ Aɗaba ku mege i ŋga ka, mburma tə sər, na asləka mburma aka miyak à ambəz ŋgar, ma ge zubəl ŋa ka, dukw hwarwa ivaɗ na i təv wele ata ya.

¹⁵ Ama na bəla məkəs ŋa aka miyak aaka à ambəz ŋgar ka, taŋa ka, ŋgwal ŋa ndzer. Aɗaba Mbulum a vəlar ambəz zùbəl ŋa kataya burrùɓ ka, na dite a kàhar dər gər a.

¹⁶ Na bəla wura a sasar mimbètsè ahəm aka gər bazlam ata ka, ma sər dər, mər mì zazamawa ka, mege dukw ata i ga Mbulum, dite na gà asiŋ gà mburma Mbulum tekeɗe, ti zezem a vatwa ata mbaŋa ya.

Mazəma ɗaf biy matəkəra à məməta Yesuw

¹⁷ Yaw, taŋa bazlam ŋgiɗ a riŋ pam na a sèsiŋ i ɗif a kurum a dər a asa mbaŋa. Ama na aka gər bazlam ata ka, i zlibe a kurum a asa tsa. Aɗaba i təv ana kà yahawum ba gər aà mazàmbàɗà à Mbulum a ka, ki gewim ka, dukw ana a ge a ŋgulum tsiye. Ki niswim a à ba ivaɗ.

¹⁸ Aɗaba i tsaraka malahalah ŋa ka, ta gweɗiŋ: I təv ana kà yahawum ba gər aà mazàmbàɗà à Mbulum a ka, ki ndzekwim a ba iba ya təv pampam, na ika magər kurum gà mburma Mbulum a. Ama i dzala, i gwa, bazlam ata a ge a ka, ndzer kaɗəŋ, pàrsa iɗəm tsa.

¹⁹ Ama kəla ka, ŋgwal ŋa ki ndzekwim a ba iba ya təv pampam seyiŋ dukw ŋgar, na dite ti sir a dər gà na ti zezem a Yesuw Kiristi nda gəzləŋ ilik a ya.

²⁰ Aɗaba i tsaraka, i təv ana kà yahawum ba gər a ka, aà mazəma ɗaf matəkəra dər aà məməta Yesuw BATSAH kwa ŋa tsa, kàa dzalum gà gər aka taŋa tsidze.

²¹ Aɗaba ku mege weke a dzele a ka, aka mazəma dukw mezime ŋgar ana a dzəm ahər a ɗekɗek pəra. Kamala taŋa ya, gà asiŋ gà mìsle ŋgiɗ tàa kwaya dər, gà biy ŋgiɗ ibam, tàa ŋgat aà mezime tsa, may a riŋ a wir aà teriŋa.

²² Na ki gwim a kataya ana, dite aàla na a sàs a kurum mazəmaya aba gà dukw mezime ŋa, nda gà masàyà gà duwa i gà ma kurum a tsiye? Wànà a sàs a kurum ana, mene à gà mburma Mbulum kamala za ya kəla ya? Tsəna, a sàs a kurum ana, mandàɗà hwarwa aka gà mburma Mbulum ana gà matawak ŋa ya ya? Wànà i tsik a kurum a dze ana, dukùla asa ya? Kà dzalum dze ana, i zlibe a à kurum a ya. Awaŋ, i zlibe a à kurum tsidze.

²³ Taŋa bazlam ana i dzeŋge a kurum a ka, Yesuw Kiristi BATSAH kwa ŋa na a ɗifiŋ dər a. I tsik a kurum ka, dukw ana a ge ɗa ba ya. A ge ba ka, a pat duwa ndaàvəɗ, dite ti ta ge a ɗaf aà Yesuw BATSAH kwa ŋa a gà ɓəzla mene are ŋgar a ka,

²⁴ a zla ɗaf, a ge dərraha kəkaaha a Mbulum, dite a sasa ikaba ya, a gwaɗa a gà ɓəzla mazazama ŋgat: «Zəmum. Naha ka, slu ba gà ana i ta vile a aɗaba kurum a. Gwim dər kamala taŋa ya aka miɗ aka miɗ, kà tə̀kərawum dər aà iye.»

²⁵ I dəba mazəma ɗaf ata ya ka, a zla kup meɗwìtsè mawà dukw makwàsà ŋa ata iɗəm asa mbaŋa, dite a vəl a tar, a gwaɗa a tar: «Kinehe ka, sum dukw aaha. Naha ka, mendzikiɗe ba masəra ba Mbulum awiya ŋana ti sir a ba nda gà mburma ya, agəra məmbəz gà ana i ti dzeye a dər aɗaba kurum a. Ku mege ndeɗime, ki swim a kamala ana i ge dər kinehe ya, kà tə̀kərawum dər aà iye.»

²⁶ Bazlam Yesuw BATSAH kwa ŋa ata a ɗif dər a ka, ku mege ndeɗime, i təv ana ki zimwim a ɗaf kamala taŋa ya, nda masà dukw ata i kivit a ka, ki tsikwim a a mburma parakkà, na Yesuw BATSAH kwa ŋa a mət agəra məmbə̀là dər à kwa ya. Ki ɗifwim a ter a dər ka, daga aà kinehe ya, haa a pat ana a ta mère a ya.

²⁷ Aɗaba taŋa, na wura a zim a ɗaf Yesuw BATSAH kwa ŋa, kige tsa a se a dukw mese ŋgar ana i kivit a, ndaka vatwa ana à zlibe a dər à ŋgat a tsəka, seriye Mbulum à gis a ŋgat, agəra ana a ne bakal aà gà ba Yesuw Batsah kwa nda məmbəz ŋgar a.

²⁸ Aɗaba taŋa, say ku weke ma dzala dzekwiŋ. Na bəla bakal duwa a ŋgiɗits a ŋgat tsəka, ma zəm, dite ma sa mbaŋa.

²⁹ Na wura a zim a ɗaf Yesuw BATSAH kwa ŋa, dite a se a dukw mese ŋgar, na bəla a dzele a dər gà gər aka ba Yesuw Kiristi tsəka, a da à ba ŋgar aka miɗ seriye Mbulum nda ahər ŋgar ŋa.

³⁰ Aɗaba taŋa na gà asiŋ gà mburma hinne ika magər kurum, tar ka, i dukw məməta, gà biy ŋgiɗ ndzəɗa aà tar tsa, dite gà asiŋ ŋa ibam, tàa mata ya.

³¹ Na mege kàa dzalakwa aaka dzekwiŋ ka, ana ka, Mbulum a gese a kwa aka miɗ seriye ŋgar kamala taŋa ya asa tsa.

³² Ama na Mbulum a ɗifekwe a à metsehe kamala taŋa ya ka, a sasar mibekwa à ɗaf ivaɗ, na dite ka, a ta gew akaba a kwa aka miɗ seriye ŋgar nda gà ɓəzla bakal, ki dzeyekwe a tsiye ya.

³³ Kamala taŋa ya, gà damər gà, i təv ana ki yehwimebe a gər aà mazəma ɗaf BATSAH kwa ŋa ya ka, say ki vevwim a gà mìsle ŋgiɗ tserdze dzekwiŋ, dite ki zimwim a kuɗa ya.

³⁴ Na wura a riŋ may a wir a ahər a ka, say ma zəmara aba ɗaf ŋgar i ma ya dzekwiŋ, na dite mayahaba gər kurum ana ki yehwimebe a ya ka, Mbulum a ta gis a dər kurum a seriye ŋgar asa tsiye ya. Ama gà asiŋ gà bazlam ŋgiɗ ana kà wizwim a, i ti ɗif a kurum a dər ka, say i təv ana Yàa ndzeha a təv kurum a dzekwiŋ.