تیتوس 3 - گیله ماز

هر خُجیرِ کارِ وَسین آمادِه هَبین

¹ اوشانه یاد بیار که حاکِمان و صاحاب مَنصبان مُطیع هَبون، وَ هر خُجیرِ کارِ وَسین آمادِه هَبون؛

² هیچکسِ بَد گب نَزِنِن، دَعوا نَکُنِن، آرام هَبون و تمام مَردُمانِ هَمرَه اَدبِ هَمرَه رفتار هَکُنَن.

³ چون اَما هَم یه موقِه نادان بِیم و نااطاعتی کانِه بِیم و گُمراه بِیم، هَمِه جور هوا و هَوس و خُوشی هایی پاکار بِیم؛ حَسودی و کینه یه دِلِه زندگی کانِه بِیم. مَردُم اَمیی جی بیزار بان و اَما همدیگَرِ جی.

⁴ وَلی اون موقِه که اَمیِ نِجات دَهنده، خُدایِ مِهرَبانی و مُحبت آشکار هَبا،

⁵ او اَمَرِه نِجات هَدَه، این نِجات نه اون کارانِ وَسین که اَما صالحی یه دِلِه هَکردیم، بلکه خودشه رَحمَت خاطری، و اون بَشوردنی راه دِلِه با که اونه طریقِ جی روح القدس اَمَرِه تازه تولد و نُو زندگی هَدَه.

⁶ که خُدا اون مقدّسِ روحِ اَمیی نجات دهنده عیسیِ مسیحِ طریقِ جی، فَت و فَراوان اَمیی سَر بَریختیه،

⁷ تا اون فیضِ هَمرَه صالِح بِشمارِسِّه هَبیم، و طبقِ اون اُمید که اَبدی زندگی رِه داریم، وارِثان هَبیم.

⁸ این گَبِ شَئنِه اطمینان هَکُردَن. وَ تی جی خَنَم که این چیزانِ سَر اصرار بِداری، تا اوشانیکه خُدا ره ایمان بیاردِن حَواس دَبو که خودِشان رِه خُجیرِ کارانِ وَسین وقف هَکُنَن، این چیزان مَردُمانِ وَسین خُجیر و فایدِه دارِه.

⁹ وَلی جنگ و جِدالی که نادانی یه جیه، شجره‌نامه‌ها و اختلافات و دعوا مرافه هایی که شریعتِ بارِئه دوری هَکُن، چون ایشان بی‌فایده و بی اَرزِشَن.

¹⁰ اون کَس بارِه که جُدایی تُووادِنِه، یه دفه، و ایما دو دفه اونه هُشدار هَدِه، وَ بعد اَزون، اونه هَمرَه رفت و آمد نَکُن.

¹¹ چون دانی که اینجور آدم فاسِد هَبوسِّه و گناهکارِه، اون خودِش خودِشِه محکوم کانه.

آخَرین نَصیحَتها و سلامها

¹² وَختی که آرتِماس یا تیخیکوسِ تی ورجه روانه هَکونَم، تا تانی تقلّا هَکُن تا بِتِش نیکوپولیسِ شهر می وَرجه بیئَیی، چون تصمیم بِیتَم زِمِسّان اوجِه سَر هَکُنَم.

¹³ تا اوجِه که تانی، وکیلِ زیناس و آپولُسِ اون سفر دِلِه که دَرِن کُمک هَکُن، تی حواس دَبو کَمِ و کَسری نِداشته بون.

¹⁴ بَنی اَمیی مَردُم یاد هَگیرِن احتیاجاتِ برطرف هَکُردَنِ وَسین خودِشان رِه خُجیرِ کارانِ وَسین وقف هَکُنَن و بی ثمر نَبون.

¹⁵ تمام اوشانیکه می هَمرَه دَرِن، تِرِه سلام رِساندِنَن. اوشانیکه ایمان دِلِه اَمَرِه دوس دارَن رِه، سلام بَرِسان. فیض، شیمی همه یه هَمرَه دَبو.