تیتوس 2 - گیله ماز

دُرسِّ تعلیمِ یاد هَدِه

¹ وَلی تو، اونچه یه جی که دُرسِّ تعلیمِ مُطابق هیسَه گَب بَزِن.

² پیر مَردِکان باگو متعادل و جادَکِتِه هَبون، خودِشانِه جُلوهِ بِدارِن و ایمان و محبت و پایداری یه دِلهِ، دُرس رفتار هَکُنَن.

³ پیر زِناکان هم بایسّی خودِشانِه حُرمتِ بِدارِن، تُهمت نَزِنِن، شراب بُخاردنِ اَسیر نَبون. اوشان بایسّی هر چی که خُجیرِ رِه تعلیم هَدَئن،

⁴ تا جَوانِ زِناکانِ یاد هَدِن که شو دوس و وَچه دوس هَبون.

⁵ خودشانِه جُلوهِ بِدارَن، پاک هَبون، کدبانو و مِهربان و خودِشانِه مَرداکانِ مُطیع هَبون، تا خُدایِ کلام باره بَد باَگوته نَبو.

⁶ همینجور جَوان مَردِکان رِه هَم نَصیحَت هَکُن تا خودِشانِه جُلوهِ بِدارِن.

⁷ خودِت هَمِه چی یه دِلهِ خُجیرِ کارانِ وَسین ایتا سَرمخش هَبو. تیِ تعلیم دِلهِ صاف و صادق و جِدّی هبو،

⁸ وَ جوری دُرس گَب بَزِن که نَبو اونه سَرعیبی بَنِن، تا مخالفان فرصتی پیدا نَکونَن که اَمی جی بَد باگون، شرمنده هَبون.

⁹ پاکارانِ تشویق هَکُن که همه چی یه دِلهِ خودِشانِه اَربابانِ مُطیع هَبون، اوشانه خوشحالی یه وَسین کُتِوات هَکونَن بدون اینکه اوشانه هَمرَه جَر و بحث هَکُنَن.

¹⁰ اوشانه جی دُزِّی نَکُنن، بلکه خودِشانِه خُجیرِ ایمانِ کاملاً نِشان هَدِن تا هر چی یه دِلِه اَمیی نِجات دهنده خُدایِ تعلیم قشنگی رِه، خُوبی یه هَمرَه نِشان هَدِن.

¹¹ چون خُدایِ فیض آشکار هَبا، اون فیض که تمام مَردمِ نِجات دَنه

¹² و اَمَرِه یاد دَنه که بی‌ دینی و دُنیایِ هوا و هوسِ جی دَس بَکِشیم، اَمی جُلوهِ بِداریم، و صالحی و دینداری یه هَمرَه این دُنیایِ دِلهِ زندگی هَکُنیم.

¹³ و اَمی اون موبارکِ اُمیدِ چِشم بِراه هَبیم، یَعنی اَمیی عظیمِ خُدا و اَمی نِجات دَهنده عیسی مَسیح جلالِ آشکار هَبوسَّن،

¹⁴ که خودشه جان اَمی وَسین هَدَه تا اَمَرِه هر شِرارَتِ جی آزاد هَکونه، و پاکِ مَردُمی رِه خودِشِ وَسین دُرس هَکونه که فقط، خودِشِ شی هَبون و خُجیرِ کارانِ وَسین غیرت بِدارَن.

¹⁵ این چیزانِ اعلام هَکُن، و تمام اقتدارِ هَمرَه تشویق و سرامکو هَکُن، و نُزار هیچکس تِرِه کوچِک بِشمارِه.