رومی ایشون 6 - گیله مازبَمِردَن گناه خاطری و زندگی خدای خاطری 1 پَس چی باگوییم؟ همینجور گُناه هَکُنیم تا فیض زیاد هَبو؟ 2 اَصلاً! اَما که گُناه وَسین بَمِردیم، چِطور تانیم اونه دِلهِ باز هم زندگی هَکُنیم؟ 3 مَگِه نِدانین تمام اَما که مسیحِ عیسی دِلهِ غُسلِ تعمید بِیتیم، اونه مرگ دِلهِ هم تعمید بِیتیم؟ 4 پس مرگِ دِلِه تعمید بِیتَنِ همره، اونه هَمره دَفن هَبَیم تا هَمونجور که مَسیح، پیَرِ جَلالِ همره مُردِگانِ جی زِندِه هَبا، اَما هَم ایتا نُو زندگی یه دِلِه قَدم بَنَیم. 5 پس اَگه مرگِ دِلِه که اونه مَرگِ مِثانِ، اونه هَمره ایتا هَبَیم، حتماً زنده هَبوسَّنِ دِلِه هم اونه زنده هَبوسَّنِ مثان، اونه همره ایتا بونیم. 6 چون دانیم اون آدمی که قدیمان بِیم، اونه هَمره مَصلوب هَبا تا تَنِ گُناه از بین بوشو و دِ گُناه پاکار نَبیم 7 چون اونیکه بَمِردِه، گُناه جی آزاد هَبا. 8 اَسِه اگه مَسیح هَمرَه بَمِردِیم، ایمان داریم که اونه هَمرَه زندگی هَم کانیم. 9 دانیم که وختی مَسیح مُردِگانِ جی زندهِ هَبا، دِ هیچ وَخت نَمیرنِه و دِ مرگ اونه سَر قدرتی نِداره. 10 چون اون خودِشِ مرگِ هَمره گُناهِ خاطری، یِدَفِه هَمیشه یه وَسین بَمِردِه، واَسِه خودِشِه زندگی دِلِه، خِدایِ وَسین زندگی کانه. 11 پس شُما هَم بایسّی شِمِرِه گُناه وَسین بَمِرده بِدانید و مسیحِ عیسی دِلهِ خدایِ وَسین، زندهِ. 12 پَس نَنین گُناه شیمی تِنِ دِلِه که ازبین شونِه دستور هَدِه تا اونه خواسِّه ها رِه اِطاعَت هَکُنین. 13 شیمی تَنِ اَعضا رِه گُناهِ دَس نَدین تا ناراسّی یه وسیلِه هَبون، بَلکه اون آدَمانِ مِثان که مرگِ جی زندگی یه سمت وَگَرِسَّن، شِمِرِه خِدایِ دَس هَدین. تا شیمی تَنِ اعضا خُدایِ دَس، صالحی یه وسیله هَبون. 14 چون گُناه شِیمی سَر حُکم نُکانِه، چون شُما شریعَتِ جیر دَنیَین، بلکه فیضِ جیر دَرِین. صالِحِی یه پاکاران 15 پَس چه باگوییم؟ چون شریعَتِ جیر دَنییَیم، بلکه فیضِ جیر دَریم گُناه هَکُنیم؟ اَصلاً! 16 مَگِه نِدانید که اگه شِمِرِه ایتا پاکارانِ مِثان که اطاعت کانَن یِنَفرِ دَس هَدین، اون آدمِ پاکاران بونید که اونه جی اطاعت کانید، چه گُناهِ پاکار که مرگ رِه خَتم بونه، چه خُدایِ اِطاعتِ پاکار که صالحی رِه خَتم بونِه؟ 17 وَلی خُدا رِه شُکر، شما که یه وختی گُناهِ پاکاران بِین، اَسه تمامِ شیمی دِلِ هَمرهَ اون تَعلیمِ جی اطاعت کانید که خُدا شِمِرِه هَدَه 18 شُما گُناهِ جی آزاد هَبوسَّنِ هَمرهَ، صالِحی یه پاکاران هَبَین. 19 مَن دَرَم آدمی یه زَبانِ هَمره شیمی همرهَ گَب زَنَم، اینه وَسین که آدَمین و شیمی جسم ضعیفِ. چون هَمونجور که پیشتَر شیمی تَنِ اعضا رِه ایتا پاکارِ مِثان ناپاکی و بی قانونی یه دَس که روز به روز بیشتر بونه با رِه بِسپارِسّین، پس، اَسه، اوشان رِه صالحی یه پاکاری یه دَس بِسپارین که قدّوسیت رِه ختم بونِه. 20 اون موقِه ایی که گُناه پاکار بِین، صالحی یه جی آزاد بِین. 21 پس اون موقِه، اون کارانِ جی که اَلان اوشانِ جی خِجالت کَشِنین، چه سودی بَبِردین؟ چون اون کارانِ عاقبت، مَرگِ! 22 وَلی اَسه که گُناهِ جی آزاد و خُدایِ پاکاران هَبَین، اونه ثمره شیمی وَسین تقدیس هَبوسَّنِ که سرآخر اَبدی زندگی رِه ختم بونِه. 23 چون گُناهِ مُزد مَرگِ، وَلی خُدایِ هدیه اَمیی خُداوند مسیحِ عیسیِ دِلِه اَبدی زندگیه. |
@ 2024 Korpu Company