رومی ایشون 5 - گیله ماز

خُدای هَمرَه صُلح هَکوردَن ایمانِ راهِ جی

¹ پَس چون ایمان راهِ جی صالِح بِشمارِسِّه هَبَیم، اَمیی خُداوند عیسی مسیح طَریقِ جی خُدایِ هَمرَه صلح داریم.

² اَما اونه طَریقِ جی، وَ ایمان راهِ جی، فیضِی رِه بِیتیم که اَلآن اونه دِلهِ استواریم، وَ این اُمیدِ هَمرَه که خُدایِ جلالِ دِلهِ شَریک هَبیم فخر کانیم

³ نه فقط این، بَلکه سختیهایِ دِلِه هم خشحالی کانیم، چون دانیم که سختیها صَبر به‌ بار هارنه

⁴ وَ صبر، شخصیتِ به بار هارنِه، وَ شخصیت اُمیدِ باعث بونِه؛

⁵ وَ اُمید اَمَرِه شرمنده نُکانِه، چون خُدایِ مُحَبَت روح القدسِ طریقِ جی که اَمَرِه هَدَه هَبا، اَمیی دِلِ میَن بَریخته هَبا.

⁶ چون اون موقِه ایی که هَلَه اَما ضَعیف بِیم، مَسیح به موقِه بی خدایانِ وَسین خودِشِ جانِ هَدَه.

⁷ اَسِه اونکه خیلی کَم پِیش هَنه یِنَفر صالح آدَمی یه خاطِری خودشه جانِ جی بُگذَرِه، هر چَن شاید یِنفر این جرأتِ بِدارِه که خودِشِه جانِ ایتا خُجیر آدَمِ وَسین هَدِه.

⁸ وَلی خُدا اینجوری خودشه محبتِ اَمَرِه نِشان هَدَه وَختی که حَلا اَما گُناهکار بِیم، مَسیح اَمی وَسین بَمِردِه.

⁹ پَس اوجِه یه جی که اَلان اونه خونِ طریقِ جی صالِح بِشمارِسِّه هَبَیم چَنّی بیشتر اونه طَریقِ جی خِدایی غضَبِ جی نِجات گیرنیم.

¹⁰ چون اَگِه اون موقِه که خُدایِ هَمره دَشمَن بِیم، وَ اونه ریکایِ بَمِردَنِ طریقِ جی خُدایِ هَمره آشتی هَدهَ هَبَیم، چَنّی بیشتَر، اَسه که اونه همره آشتی یه دِلِه دَریم، اونه زندگی یه طریقِ جی نِجات گیرنیم.

¹¹ نه فَقط این، بَلکه اَما که اَمِی خُداوند عیسی مَسیحِ طریقِ جی، خُدایِ آشتی اَمی نصیب هَبا، خُدایِ دِلِه خشحالی کانیم.

مرگ آدمِ طَریقِ جی، زندگی مسیحِ طَریقِ جی

¹² پَس، هَمونجور که گُناه ایتا آدَمِ طریقِ جی این دنیایِ دِلِه بوما ومَرگ گناه طَریقِ جی بوما، وَاینجوری مرگ تمام آدَمان دامنگیر هَبا، چون که هَمِه گُناه هَکوردَن

¹³ چون راس راسی پیش اَز اونکه شریعَت هَده هَبو، گُناه دُنیایِ دِلِه دَبا، وَلی اوجِه ایی که شَریعت دَنِبا، گُناه به حِساب نیَنِه.

¹⁴ با این وجود، آدَمِ جی تا موسی، مرگ تمام مَردُمِ سَر حاکِم با، حتّی اوشانِ وَسین که اوشانِ گُناه ایتا آدمِ نافرمانی یه مِثان نَبا. آدَم، اونه مِثان با که بایِسّی بیِه.

¹⁵ وَلی هَدیِه گُناهِ مِثان نیِه. چون اَگه ایتا آدمِ گُناه خاطری خِیلیان بَمِردِن، چَنّی بیشتَر خُدایِ فیضِ و هَدیِه که ایتا آدَمِ فیضِ طریقِ جی، یَعنی عیسی مَسیح فراهَم هَبا، فراوانی یه هَمره خیلیانِ نصیب هَبا.

¹⁶ و این هَدیِه اون آدمِ گُناهِ نتیجه یه مِثان نیِه. چون اون گُناهِ دُمّالسَر قضاوت بوما و محکومیتِ بیاردِه؛ وَلی خیلی گُناهانِ دُمّالسَر هَدیِه بوما و صالِحی رِه خودِشِه همره بیاردِه.

¹⁷ چون اَگه ایتا آدمِ گُناهِ خاطری، مرگ اونِ طریقِ جی حکومت هَکُردِه، چَنّی بیشتر اوشانیکه خدایِ بی حد و حسابِ فیض و صالِحی یه هَدیِه رِه بِیتَن، اون ایتا دیگه آدمِ طَریقِ، یَعنی عیسی مَسیح، زندگی یه دِلِه حکومت کانَن.

¹⁸ پَس هَمونجور که ایتا گُناه تمام آدَمانِ مَحکومیتِ باعث هَبا، ایتا عملِ صالح هَم صالح بِشمارِسِّه هَبوسَّن و تمام آدَمانِ زِندگی یه باعث بونِه.

¹⁹ چون هَمونجور که ایتا آدَمِ گناهِ همره، خِیلیان گُناهکار هَبان، ایتا آدمِ اِطاعَتِ همره هَم خِیلیان صالِح بونَن.

²⁰ اَسِه، شریعَت بوما تا گُناه زیاد هَبو؛ وَلی اوجه که گُناه زیاد هَبا، فیض بی حَدّ و حِساب زیاد هَبا

²¹ تا هَمونجوری که گُناه مرگ دِلهِ حکومت هَکُردِه، فیض هَم صالحی یه طریقِ جی حکومت هَکونه که اَمیی خداوند عیسی مَسیح طریقِ جی، اَبَدی زندگی سمت هدایت هَبو.