رومی ایشون 16 - گیله ماز

سلام و درود

¹ اَمی خاخور فیبی یه سِفارِشِ شِمِرِه کانَم. او کِنخْریه یه شهرِ کلیسای خادمانِ جییه.

² تا اونه خُداوَندِ دِلهِ، اونجور که مُقَدَّسینِ لایِقِ قبول هَکُنید، و هر کُمکی که شِیمی جی بِخوادِ کوتاهی نَکُنین، چون اون خِیلیان رِه، حَتّی مَرِه، خِیلی کُمَک هَکُردِه.

³ پْریسکیلا و آکیلا رِه، که می همکاران عیسی مسیحِ دِلهِ هیسَن رِه، سَلام بَرِسانین.

⁴ اوشان خودِشانِه جانِ می خاطِری خطرِ میَن توُوادَن، وَ نه فقط مَن، بلکه تمام غیر یهودیانِ کلیساها اوشانِ جی مَمنونَن.

⁵ هَمینجور کلیسایی که اوشانه سِرِه یه دِلهِ هَمدیگَرِ هَمرَه جَم بونَن رِه، سَلام بَرِسانین. می عزیزِ رَفیق اِپینِتوسِ سَلام بَرِسانین. اون اوَّلین نفری با که آسیایِ دِلهِ مسیحِ ایمان بیاردِه.

⁶ مریمِ که شِمِره خِیلی زَحمَت بَکِشیِه سلام بَرسانین.

⁷ می فامیلانِ وَسین، آندْرونیکوس و یونیا که می هَمرَه زِندانِ دِلهِ دَبان رِه، سَلام بَرِسانین. اوشان رَسولان میَن، سَرشِناسِه آدَمِن که مَی جی پیشتَر مسیحِ ایمان داشتِن.

⁸ می عَزیزِ رَفیق آمپْلیاتوسِ که اونه خُداوَندِ دِلِه دوس دارَمِ، سَلام بَرِسانین.

⁹ اَمیی هَمکار اوربانوسِ مَسیح دِلِه، وَ می عزیزِ رَفیق، اِستاخیسِ سَلام بَرِسانین.

¹⁰ آپلیس رِه که خودشه آزمونِ مسیحِ دِلهِ پَس هَدَه، سَلام بَرِسانین. آریستوبولُسِ خانوادِه رِه سَلام بَرِسانین.

¹¹ می فامیلِ هیرودیون وَسین و هَم نارکیسوسِ خانواده که خُداوَندِ دِلهِ دَرَن رِه، سَلام بَرِسانین.

¹² تْریفینا و تْریفوسایِ وَسین، اون خادمانی که خُداوَندِ خِدمتِ دِلِه زحمت کَشِنِن رِه، سَلام بَرِسانین. وَمی عزیزِ رَفیق پِرسیس که خُداوندِ دِلِه خیلی زحمت کَشِنِه رِه، سَلام بَرِسانین.

¹³ روفُسِ وَسین که خُداوَندِ دِلِه انتِخاب هَبا، وَ اونه مآره وَسین که می حق مآریی هَکُردِه رِه، سَلام بَرِسانین.

¹⁴ آسینکْریتوس، فْلِگون، هِرماس، پاتْروباس و هِرمِس و دیگَر اَداشانی که اوشانه هَمرَه دَرنِ وَسین، سَلام بَرِسانین.

¹⁵ فیلولوگوس، یولیا، نیریاس و اونه خاخُر، وَ اولیمپاس و تمام مُقدَّسینی که اوشانه هَمرَه دَرنِ وَسین، سَلام بَرِسانین.

¹⁶ هَمدِیگَرِ ایتا مقَدّسِ خُوشِ هَمرَه سَلام بَرِسانین. تمام مسیحِ کلیساها شِمِرِه سَلام رِساندِنَن.

¹⁷ اِی اَداشان، خَنَم شیمی جی خواهِش هَکُنِم اوشانیکه جُدایی یه باعِث بونَن و شیمی راهِ سَر مانع نَنَن مُواظِب هَبین، و اون تَعلیمِ هَمره که شِما بِیتین، مخالِفت کانَن؛ اوشانِ جی دوری هَکُنید،

¹⁸ چون اینجور آدَمان اَمیی خُداوند مَسیحِ خِدمَت نُکانَن، بلکه خودِشانِه شِکَمِ سیر هَکوردَنِ دُمّال دَرِن و قَشنگِ گَبانِ و چاپلوسی هَمرَه سادِه آدَمان گول زَنَن.

¹⁹ شیمی اِطاعَتِ آوازِه همه یه میَن دپیتِه؛ شِیمی خاطری خِیلی خوشحالَم. وَلی شِیمی جی خَنَم اونچه یه پیش که خوبِ حکیم، وَ اونچه یه پیش که بَدِ، سادِه هَبین.

²⁰ خُدای صُلح و سلامتی خیلی زود شِیطانِ شِیمی لِنگِ جیر لِه کانه. اَمیی خُداوند عیسی یِه فیض شِیمی هَمرَه دَبو.

²¹ می هَمکار تیموتائوس، شِمِرِه سَلام رِساندِنهِ. می فامیلان لوکیوس، یاسون و سوسیپاتر هَم شِمِره سَلام رِساندنَن.

²² مَن، تِرتیوس، کسی که این نامِه رِه بَنوِیشته، خُداوَندِ دِلهِ شِمِره سلام رِساندِنَم.

²³ گایوس که می جی و تمام ایجه یه کلیسای آدَمانِ جی مِهمان نوازی هَکُردِه، شِمِرِه سَلام رِساندِنِه. اِراستوس که شهرِ خَزانِه دارِ، وَ اَمیی اَداش کوآرتوس شِمِرِه سلام رِساندِنَن.

²⁴ «اَمیی خُداوند عیسی مسیحِ فیض شیمی همه یه هَمرَه دَبو. آمین».

²⁵ اَسه اونه جلال که تانه طبق می انجیل و عیسی مسیحِ موعظه همرَه شِمِرِه تقویت هَکونِه یعنی طبق کَشف هَکُردَن اون رازی که دُنیایِ شِروعِ جی جا هَدَه با،

²⁶ وَلی اَلآن طِبقِ پِیغَمبرانِ بَنویشته و خُدای اَبدی حُکمِ هَمره، تمامِ مردُمِ وَسین معلوم هَبا، تا اوشان ایمان بیارِن و اطاعت هَکُنَن-

²⁷ اونیکه تنها حکیمِ خُدائِه، عیسی مَسیح طریقِ جی تا اَبد جَلال هَبو! آمین.