رومی ایشون 15 - گیله ماز

¹ اَما که قَوی هیسیم، بایسّی اوشانیکه ضعیفِن رِه تَحمّل هَکُنیم و اَمی راحتی دُمّال دَنِبیم.

² اَمی جی هَر کُدام بایسّی هر خُجیرِ چی ایی که خودِشِه هَمسادِه یه دِلِه دینه هَمونِ بارِه اونه خُشحال هَکونِه، تا اونه ایمانِ تقویتِ باعث هَبو

³ چون مَسیح خودِشِه خُشحال هَکُردنِ دُمّال دَنِبا، بلکه هَمونجور که داوودِ مزمورِ دِلِه بَنویشت هَبا: «اوشانیکه تِرِه سرامکو هَکُردَنِ سرامکو، می سَر بَکِتِه.»

⁴ چون هر چی که اولارسالان بَنویشتِ هَبا، اَمِی تعلیمِ وَسین با تا پایداری و اون دلگرمی یه هَمره که مُقَدَّسِ نِوشتِه ها دَنِن رِه، اُمید بِداریم.

⁵ هَبو، خُدایی که پایداری و دلگرمی دَنِه، شِمِرِه عطا هَکونِه تا اونجور که مسیحْ عیسی خواسِّه یه هَمره جورِه هَمدیگرِ هَمره مُدارا هَکُنید،

⁶ تا با هم، یِکدِل و یِک زَبان، خُدا یَعنی اَمِی خُداوند عیسی مَسیحِ پیَرِ جلال هَدین.

⁷ پَس هَمونجور که مَسیح شِمِرِه گرمی یه همره قبول هَکُردِه، شُما هَم هَمدیگرِه گرمی یه همره قبول هَکُنید تا خِدا جَلال هَگیره.

⁸ چون شِمِرِه گونَم که مَسیح ختنِه هَبوسِّه شانِ پاکار هَبا تا خُدایِ راستی رِه نَشان هَدِه، تا اون وعده هایی که خُدا اَمی اجدادِ هَده با یه سَر، مُهر تأیید بَزِنِه،

⁹ وَ تا غیرِ یهودیان، خُدا رِه اونِ رَحمتِ خاطری جلال هَدِن. هَمونجور که مُقدّسِ نوشتِه های دِلِه بَنوِیشته هَبا: «پس من تِرِه غیرِ یَهودیانِ دِلهِ حمد و ثَنا کانَم، وَ تی اِسمِ هَمرَه آواز خواندِنَم.»

¹⁰ باز هم گونِه: «اِی غیرِ یهودیان، اونه قومِ هَمرَه خوشحالی هَکونید!»

¹¹ وَ باز هَم مزمورِ کِتابِ دِلِه گونِه: «اِی تمام غیرِ یَهودیان، خُداوَندِ حمد و ثَنا هَکُنید! هَبو که تمام مَردُم اونه جلال هَدِن.»

¹² وَیِدَفه دیگه اِشعیایِ پیغمبر هَم گونِه: «یَسایی ریشِه هَنه، اونیکه وَرِسَه تا غیرِ یهودیِانِ سَر حُکمرانی هَکونِه؛ غیرِ یهودیان اونه اُمید دَبِدِنَن.»

¹³ هَبو خُدایی که اُمید دَنِه شِمِرِه ایمانِ دِلِه، خُشحالی و آرامشِ جی پُر هَکونِه، اونجور که روح القُدُسِ قُوَّتِ هَمره، اُمیدِ جی پُر هَبین.

پولُس خِدمت غیرِ یهودیانِ میَن

¹⁴ اِی می اَداشان، مَن خودَم مُطمعنَم که خودِ شُما خوبی یه جی پُرین، وکاملِ معرفتِ دارین و تانید هَمدیگَرِ تعلیم هَدین.

¹⁵ با این وجود، جِسارت هَکُردَم، چن تا مَطلَب رِه شِمِره بَنویشتَم، تا اوشانِه شیمی یاد بیارِم، چون خُدا این فیضِ مَرِه هَدَه

¹⁶ که غیرِ یَهودیانِ وَسین، مسیحْ عیسی پاکار هَبوم و خُدایِ اِنجیلِ خِدمت هَکُردنِ وَسین کاهِنی هَکُنَم، تا غیرِ یهودیِان ایتا قابِلِ قَبولِ هَدیِه خُدایِ پیش هَبون که روح القُدُسِ طَریقِ جی تَقدیس هَبا.

¹⁷ پَس مَن مسیحْ عیسی دِلِه این خِدمتی که خُدایِ وَسین دَرَم هَکونَم ره فخر کانَم.

¹⁸ چون جُرأت نُکانَم هیچی یه جی گَب بَزِنَم، اِلّا اونچه که مَسیح می طریقِ جی انجام هَدَه، تا غیر یَهودیانِ می گَب و کارهایِ طریقِ جی ایمانِ مُطیع هَکُنَم،.

¹⁹ اون این نِشانِه ها و معجِزات رِه قوّتِ هَمره، یَعنی خُدایِ روحِ قُوَّت هَمره انجام هَدهَ، اونجور که اورشلیمِ جی تا ایلیریکوم بَگَرِسَّم، وَ کاملاً مسیحِ اِنجیلِ خدمتِ انجام هَدَم.

²⁰ هَمِش می آرِزو این با که یِجایی اِنجیلِ موعظه هَکُنَم که مَسیحِ اِسمِ نِشنَوِسِّه بون، تا نَبو که مَن یِنَفر دیگَرِ بُنوار سَر بَنایی بِسازَم،

²¹ ولی هَمونجور که اِشعیای پیغمبرِ کِتابِ دِلِه بَنویشتِهِ هَبا: «اوشانیکه اونه جی بی‌خَبَر بان، دینَن وَ اوشانیکه نِشنَوِسِّه بان، فَهمِنِن.»

²² اینه خاطِریِه که چَن دَفه خَسَّم شیمی وَر بییَم ولی نَبا.

²³ وَلی اَسه چون این منطقه هایِ دِلِه، دِ کاری نُمانِسِّه که هَکُنَم، وَ اوجِه یه جی که خِیلی سا‌لِ مُشتاقَم شیمی وَر بییَم،

²⁴ اُمید دارِم که وَختی دَرَم بوشوم اِسپانیا، می رایِسَر شِمِرِه بَینَم تا بعد اَز اونکه یِکَم شِمِرِه بَدییَم، مَرِه اوجِه یه سَفرِ دِلِه کُمَک هَکُنید.

²⁵ ولی اَلآن خَنَم بوشوم اورشلیم تا اوجِه یه مُقَدَّسینِ وَسین کمک مالی بَبِرَم،

²⁶ چون مقدونیه و اَخائیه یه کلیساها خَنِن اورشلیمِ مُقدَّسینِ فقیرانِ وَسین کُمکِ مالی جَم هَکُنَن.

²⁷ اوشان خودِشان خَسِّن این کارِ هَکُنِن؛ وَ راس راسی هم، اوشان، اورشلیمِ ایماندارانِ مَدیون بان. چون اَگه غیرِ یهودیان، یَهودیِانِ روحانی برکاتِ دِلِه شریک هَبان، غیرِ یَهودیان هم بایسّی برکاتِ مالی یه دِلِه اوشانِه خِدمت هَکُنَن

²⁸ پس وَختی این کارِ انجام هَدَم و اونچه که جم هَبا با رِه اوشانه دَس بَرِسانییَم، شیمی راهِ جی اسپانیایِ سمت شونَم.

²⁹ مَن دانَم وَختی که شیمی وَرجه بییَم، مسیحِ بَرکتِ هَمرَه که فراوانِ هَنَم.

³⁰ اِی اَداشان، اَمیی خُداوند عیسی مَسیح و روح القُدُسِ محبتِ خاطِری، شیمی جی خواهِش کانَم که خُدایِ وَرجه همیشه می وَسین دُعا هَکُنید، وَ این کارِ هَمرَه می خدمت دِلهِ شریک هَبین.

³¹ تا یَهودیه بی ایمانانِ جی جان سالِم به‌ در بَبِرَم و می خِدمَت اورشلیمِ مُقَدَّسینِ وَر قَبول هَبو.

³² ایما، خُدا بِخواد ذوقِ همره شیمی وَر بیئِم تا شیمی وَر می جان تازِه هَبو.

³³ خُدایِ صُلح و سلامتی شیمی هَمرَه دَبو. آمین.