رومی ایشون 13 - گیله ماز

صاحاب منصَبِ جی اطاعت هَکُردَن

¹ هر کَس بایسّی صاحاب مَنصَبِ مُطیع هَبو، چون هیچ صاحاب منصبی دَنیِه که خُدایِ جی نبو. صاحاب مَنصبانی هم که دَرِن، خُدایِ طَرَفِ جی تعیین هَبان.

² پَس هر کی که صاب مَنصبانِ عَلیه بُلَن هَبو، اونچه یه علیه که خُدا تعیین هَکُردِه، بُلَند بونه؛ و اوشانیکه اینجور کانَن، داوری بونِن

³ چون اوشانیکه دُرس رفتار کانَن حُکمرانانِ جی تَرسی نِدارَن، ولی خلافکاران اوشانِ جی تَرسِنِن. خَنی صاب مَنصبانِ جی نَتِرسی؟ پس، اونچه که دُرسِ رِه، هَکُن که تِرِه تَحسین کانِن.

⁴ چون اون تی خیر و صَلاحِ خاطِری خُدایِ پاکارِ. ولی اگه کارِ خلاف هَکُنی، بَتِرس، چون اون بیخدی خودِشِه کمر، شمشیر دَنِبِسِّه. اون خُدایِ پاکارِ، و کَسییِه که خُدایِ وَسین انتقام گیرنِه و خُدایِ غضبِ خلافکارِ سَر هارنه.

⁵ پَس آدم بایسّی نه فقط خُدایِ غضبِ وَسین، بلکه وُجدانِ وَسین هم مُطیع هَبو.

⁶ اینه وَسینِ که شما مالیات دَنید، چون صاحاب منصَبان خُدای پاکارانَن، واین چیزانِ جی مواظبت کانَن.

⁷ هر کسِ حقِّ اونه هَدین: اگه مالیاتِ، مالیات هَدین. اگه خَراجِ، خَراج هَدین. اگه اِحترامِ، اِحترام بَنین. و اگه حُرمَتِ، حُرمَت بَنین.

شریعتِ بِجا بیاردن مُحبتِ طریقِ جی

⁸ هیچ کَسِ دِین شیمی گَردَن دَنِبو، اِلّا اینکه همش هَمدیگَرِه مُحبت هَکُنید. چون هر کی یِنَفَر دیگَرِ مُحبت هَکونِه، شریعتِ بِجا هارنه.

⁹ چون این احکامِ «زَنا نَکُن»، «قتل نَکُن»، «دُزدی نَکُن»، «طَمَع نَکُن»، و هر حُکمِ دیگَرِی که هَبو، هَمِه این کلامِ دِلهِ خلاصه بونه که «تیِ هَمسادِه رِه ایتا تیِ مِثان محبت هَکُن.»

¹⁰ محبت، خودشه هَمسادِه ره بَدی نُکانه؛ پَس مُحبت شریعَتِ تمام و کمال به انجام رِساندِنِه.

¹¹ علاوه بر این، شما دانید که چه زَمانِه یه دِلِه دَرین، اَسه اونه وخت بَرِسیِه که خوابِ جی بیدار هَبین. چون اَلآن در قیاس اون موقِه ایی که ایمان بیاردِیم، اَمی نجات نزدیکتَر هَبا.

¹² شُو دِ تَمام بونه و روز نَزّیکِه. پَس بیَئین تاریکی یه بَدِ کاران رِه کِنار بَنیم و نورِ زِرِه رِه دَکُنیم.

¹³ بیئِین جوری رفتار هَکُنیم که اوشانیکه روزِ روشِنایی یه دِلِه دَرِنِ لایق هَبو، نه عیاشی و مَسی یه دِلِه، نه زَنا و هوس بازی یه دِلِه، نه دَعوا مُرافِه و حَسودی یه دِلِه.

¹⁴ پس خُداوند عیسی مسیحِ شخصیتِ ایتا لِواسِ مِثان دَکُنین، و شیمی نفسِ هوسهایِ بِجا بیاردَنِ دُمّال دَنِبین