یوحنایِ مکاشفه 9 - گیله ماز

¹ و پنجمین فِرِشتِه خودشه شیپورِ دِلهِ بِدَمِسِّه، و مَن ایتا سِتارِه بَدییَم که آسِمانِ جی زَمینِ سَر بَکِتِه و هاویه یه چاهِ کیلیت که تَه نِداره اونه هَدَه هَبا.

² اون فرشتِه هاویه یه چاهِ واز هَکُردِه. اون چاه جی یِچی ایتا گَتِه کورِه یه دود مِثان ورسَه، و آفتو و هوا اون چاه دود جی تاریک هَبان.

³ ایما دود میَن، واش ووزی زَمینِ سَر بومَن و اوشانِه ایتا قدرت، زمینِ عَقرَبانِ قُدرتِ مِثان هَدَه هَبا.

⁴ و اوشانِه باَگوته هَبا که نه زمینِ واشِشان، و نه هیچ سَبزِ گیاه یا داری رِه صدمِه نَزِنِن، بلکِه فقط مَردُمِی رِه صدمِه بَزنِن که خُدایِ مُهرِ خودِشانِه پیشانی سَر نِدارَن.

⁵ و اوشانِه اِجازه هَدَه هَبا که اون مَردمِ پَنج ماه عذاب هَدِن، بدونِ اینکه هیچکسِ بَکوشَن. و اوشانه عذاب، عَقربِ عذابِ مِثان با، اون موقِه که ینفرِ نیش زَنه.

⁶ اون روزانِ دِلِه مَردُم مَرگِ دُمّال گَردِنِن، ولی اونِهِ پیدا نُکانَن؛ مرگ آرِزو رِه دارِن، وَلی مَرگ اوشانه جی دَرشونه.

⁷ و اون واش ووزیشان ایتا اَسب مِثانَن که جَنگ وَسین آمادِه هَبان. اوشانه کَلِّه سَر یِچی دَبا که طِلای تاجِ مِثان با و اوشانِ قیافِه ایتا آدَمِ مِثان با.

⁸ اوشانِ سَرِ مو، ایتا زِناکانِ سَرِ مو یه مِثان با و اوشانه دَندان ایتا شیرِشانِ دندانِ مِثان با.

⁹ ایتا آهینی سینه پوش، خودِشانِه سینه شانه سَر داشتِن، و اوشانه بالِشان صِدا، اَرابِه ها و خیلی اَسبشانِ صدایِ مِثان با که جَنگ سمت شونَن.

¹⁰ اوشانِ دُم و نیش، ایتا عَقرَبِ دُم و نیشِ مِثان با، و خودِشانِه دُمِ دِلهِ این قدرتِ داشتن که مَردُمِ پَنج ماه عذاب هَدِن.

¹¹ هاویه یه چاه فرشتِه اوشانه پادشاهِ، که عِبرانیانِ زِبانِ دِلهِ اونه اِسم ’اَبَدونِ‘، و یونانی زِبانِ دِلِه ’آپولیونِ‘ یعنی نابود کننده.

¹² اوَّلین ’وای‘ سَرهَبا؛ بِییش، هَلَه دُتا ’وای‘ دیگه بایِسّی بیِه.

¹³ ایما، شِشُمین فِرِشتِه خودشه شیپورِ دِلهِ بِدَمِسِّه، و مَن ایتا صدا طِلائی قربانگاهِ چار شاخِ جی که خُدایِ وَرجه دَرِه بِشنَوِسَّم،

¹⁴ که شِشمین فِرِشتِه که شیپور داشتِه رِه، باَگوته: «اون چار تا فِرشتِه که فُراتِ گَتِه روخانِه یه ور اَسیرِن رِه، آزاد هَکُن.»

¹⁵ پَس اون چار تا فرشته که اون ساعَت و اون روز و اون ماه و اون سالِ وَسین اَمادِه هَبابان بایِسّی، آزاد هَبون تا یه سِوّمِ آدَمانِ بَکوشَن.

¹⁶ وَ بِشنَوِسَّم سَوارِه نظامِ تعداد دویست میلیون نفر با.

¹⁷ اَسب شان و اونه سواران رِه می رؤیای دِلهِ اینجور بَدییَم: اوشانِ زِرِه شانه رنگ، تَشِ سُرخی و کَبودِ آبی و گوگِردِ زردی رِه داشتِه. اَسبِشانِ کَلِّه، ایتا شیرِ کَلِّه یه مِثان با و اوشانِ دَهنِ جی تَش و دود و گوگِرد دِرگا زنه با.

¹⁸ این سِه تا بلایِ هَمرَه، تَش و دود و گوگِرد که اوشانِ دَهنِ جی دِرگا زنه با، یه سِوّمِ آدَمان بَکوشتِ هَبان.

¹⁹ چون اَسبِشانِ زور اوشانه دَهِن و دُمِ دِلهِ دَبا. چون اوشانه دُمِشان ایتا مارِ مِثانِ که کَلِّه داره و اوشانِ هَمرَه صدمه زَنِن.

²⁰ بَقیِه آدَمِان، که این سِه تا بَلایِ جی بکوشت نَبان، نه خودِشانِه دَسِ کارانِ جی توبِه هَکُردَن و نه آلِشانه پَرَسِّش هکُردنِ جی و نه طَلائی بُتِشان و نقره ایی و برنجی و سَنگی و چویی بُتِشانِ پَرَسِّش هکُردنِ جی، که نه تانَن بَینِن و نه اِشنَوِنِن و نه راه شونِن.

²¹ اوشان خودِشانِه آدمکُشیها و جادوگریها و بی‌عفتیها و دُزّیهایِ جی هَم توبِه نَکُردِن.