یوحنایِ مکاشفه 20 - گیله ماز

هزار سال سلطنت

¹ ایما بَدییَم ایتا فِرِشتِه آسِمانِ جی دَرِه جیر هَنه، و هاویه یه چاه کیلیت اونه هَمرَه دَرِه، و ایتا گَتِه زَنجیل خودشه دَسِ دِلِه دارِه.

² و فِرِشتِه، اژدها رِه، اون قَدیمی مار رِه، که همون اِبلیس یا شِیطانِ، بِیته و تا هِزار سال اونه زِندانِی هَکُردِه

³ و اونه هاویه یه چاه دِلهِ تُووادَه و اونه دَرِ دَبِسِّه و مُهر و موم هَکُردِه تا دِ مِلّتِشان رِه گول نَزِنِه تا اون هزار سال تَمام هَبو. ایما اون بایِسّی یه مُدّتِ وَسین آزاد هَبو.

⁴ ایما تَختائی رِه بَدییَم که اوشانِ سَر کَسایی نیشته بان که اوشانه داوری یه اقتدار هَدَه هَبا با. و آدمانِ جانها رِه بَدییَم که عیسی مسیحِ شهادت هَدَنِ خاطری و خُدایِ کلامِ وَسین، اوشانه سَرِشان اوشانه تَنِ جی سیفا هَبا با. و کَسایی رِه بَدییَم که اون وحشی جانِوَر و اونه مجسمِه رِه پَرَسِّش نَکُرده بان، و اونه علامتِ خودِشانِه پیشانی و دَسِ سَر قبول نَکُرده بان. اوشان یِدَفِه دیگه زندهِ هَبان و مَسیح هَمرَه هزار سال سلطنت هَکُردَن.

⁵ این اوّلین زندهِ هَبوسَّن مُردگانِ جی با. و مُردِگان دِ زندهِ نَبان تا اون هزار سال تَمام هَبو.

⁶ مُقدّس و مُبارکِ اونیکه اوّلین زندهِ هَبوسَّنِ دِلِه سهم دارِه. دوّمین مرگ اینجور آدمانِ سَر، هیچ قُدرتی نِداره، بلکه اوشان خُدا و مَسیح کاهِنان بونَن و اونه هَمرَه هزار سال سلطنت کانَن.

شِیطانِ شِکَست

⁷ وختی که اون هزار سال تَمام هَبو، شِیطان خودشه زِندانِ جی آزاد بونه

⁸ و دِرگا هَنه، تا مِلّتِشان رِه زمینِ چارگوشه یه سَر گول بَزِنِه- اون جوج و ماجوج رِه که اوشانه تعداد دریاکِنارِ وازیک مِثانِ، جَنگ وَسین جَم کانه.

⁹ و اوشان زمینِ گَتِه دَشتِ سَر پِیش بَشَن و مُقدّسینِ اردوگاه، و اون عزیزِ شهرِ دُر هَکُردَن، ولی آسمانِ جی تَش جیر بوماَ و اوشانه نابود هَکُردِه.

¹⁰ و اِبلیس که اوشانه گول بَزَه با، تَش و گوگِردِ دریاچه یه دِلهِ تُووادِه هَبا، اوجِه که اون وحشی جانِوَر و دِروئی پِیغمبر تُووادِه هَبا بان. ایشان شُو و روز تا اَبد و تا اَبد عذاب کَشِنَن.

داوری اِسبی گَتِه تَختِ پِیش

¹¹ ایما ایتا گَتِ اِسبی تَخت بَدییَم، و یِنفر که اونه سَر نیشته با. آسِمان و زمین اونه حُضور جی فَرار کانه بان و هیچ جایی اوشانه وَسین دَنِبا.

¹² و مُردِگانِ بَدییَم، گَت تا کوچِیک، اونه تَختِ پِیش ایسَبان و دفترِشان واز هَبان. ایما ایتا دیگه دفتر واز هَبا که حیاتِ دفتَر با و مُردِگان اون چیزانِ هَمرَه که اون دفترِشانِ دلِه بَنویشتِه هَبا با، و طبقِ اونچه که هَکُردهِ بان داوری هَبان.

¹³ و دریا مُردگانی که خودشه دِلِه داشتِه رِه پَس هَدَه؛ مرگ و مُردِگانِ دُنیا اون مُردِئِشان رِه که خودشه دِلهِ داشتِن رِه پَس هَدَن، و هر کدام طبقِ کارایی که انجام هَدَه بان، داوری هَبان.

¹⁴ ایما، مَرگ و مُردِگانِ دُنیا تَشِ دریاچه دِلهِ تُووادِه هَبان. این تَشِ دریاچِه، دُوّمین مَرگِ.

¹⁵ و هر کَس که اونه اِسم، حیاتِ دفتَرِ دِلِه بَنویشته نَبا با، تَشِ دریاچه یه دِلِه تُووادِه هَبا.