یوحنایِ مکاشفه 14 - گیله مازوَرِّه و صَد و چِل و چار هزار نفر 1 ایما بِییشییَم، و بَدییَم اون وَرِّه صَهیونِ کوهِ سَر ایسَا، و اونه هَمرَه صَد و چِل و چار هزار نفر دَبان که خودِشانِه پیشانی سَر اونه اِسم و اونه پیَرِ اِسمِ بَنوِیشتِه داشتِن. 2 و مَن آسمانِ جی ایتا صِدا بِشنَوِسَّم، پُر خُروش اُویه صِدایی مِثان، و گورتَکِ مِثان بُلَن با. اون صِدا که بِشنَوِسَّم ایتا چنگ نَوازان صدایِ مِثان با اون موقِه که چَنگ زَنَن. 3 و اوشان اون تَختِ پِیش و اون چارتا زندهِ مخلوق و اون ریش سِفیدانِ پِیش ایتا جدیدِ سُرود بُخوانِسَّن. هیچکس نَتَّنِسِّه اون سرودِ یاد هَگیره، بجز اون صَد و چِل و چار هزار نَفَر که زمینِ مَردمِ میَن یِدَفِه دیگه بَهیِّه هَبا بان. 4 ایشان همون کَسائین که خودِشان رِه زِناکانِ هَمرَه نجِس نَکُردِن، چون این مَرداکان اَذَبِن. ایشان همون کَسائینِ که وَرِّه هرکوجهِ شونه اونه دُمّال شونِن. ایشان آدَمان میَن جی یِدَفِه دیگه بَهیِّه هَبان تا خُدا و وَرِّه یه نوبَر هَبون. 5 و اوشانه دَهَنِ دِلِه هیچ دِروئی پیدا نَبا چون اوشان بی عیبِن. سِه تا فِرشته یه پِیغام 6 ایما ایتا دیگه فِرِشتِه بَدییَم که آسِمانِ میَن پَرواز کانِبا و اَبَدی اِنجیل خودشه هَمرَه داشتِه تا اونه اوشانیکه زمینِ دِلِه دَرِن، و هر مِلّت و طایفه و زبان و قومِ اعلام هَکونه. 7 و اون ایتا بُلَندِ صدایِ هَمرَه باَگوته: «خُدایِ جی بَتِرسین و اونه جَلال هَدین، چون اونه داوری یه ساعت بَرِسییَه. اونه پَرَسِّش هَکُنید، اونیکه آسِمان و زمین و دریا و چِشمِه شانه اُو رِه خَلق هَکُردِه.» 8 وَ ایتا دیگه فِرشتِه یعنی دُوّمین فِرِشتِه اونه دُمّال سَر بوماَ و باَگوته: «فور بوماَ! اون گَتِ بابِل فور بوماَ! اونیکه خودشه زِناکاری شَرابِ جی تمام مِلّتا رِه هَدَه.» 9 ایما ایتا دیگه فِرِشتِه یعنی سِوّمین فِرِشتِه اون دُتایِ دُمّالسَر بوماَ و ایتا بُلَندِ صدایِ هَمره باَگوته: «اَگِه کَسی اون وحشی جانِوَر و اونه مُجَسَمِه رِه پَرَسِّش هَکونه و خودشه پیشانی سَر یا خودِشِه دَسِ سَر اونه علامتِ قَبول هَکونه، 10 اون هَم خُدای غضبِ شَرابِ جی که پُر ملات و خالِصِ وخُدایِ غَضَبِ پیالِه یه دِلهِ بَریخته هَبا خارنِه. اون، مُقدَّسِ فِرشتِگانِ پِیش و وَرِّه یه پِیش تَش و گوگردِ هَمرَه عَذاب کَشِنِه. 11 وَ اوشانه عذابِ دود تا اَبد و تا اَبد جآر شونِه. و اوشانیکه اون وحشی جانِوَر و اونه مُجَسَمِه رِه پَرَسِّش کانَن و هر کَس که اونه اِسمِ علامتِ قَبول کانه، نه روزِ دِلِه آسایش دارِه و نه شُویه دِلِه.» 12 این مقدَّسینِ پایداری رِه خَنِه، اوشانی که خُدایِ اَحکام و مسیح رِه ایمانِ دارَن. 13 و آسِمانِ جی ایتا صِدا بِشنَوِسَّم که گونه با، «اینه بَنویس: خُشا بِحال اوشانیکه مین بَعد خُداوَندِ دِلهِ میرنِن.» وَ خُدایِ روح باگوته: «راس راسی خُشا بِحالِ اوشان که خودِشانِه زَحمتانِ آسایشِ گیرِنَن، چون اوشانه اعمال، اوشانه دُمّالسَر هَنه!» زمینِ مَحصولِ دِرُو هَکُردَن 14 ایما بِیشییَم، ایتا اِسبی اَبر می پیش دَبا و اون اَبرِ سَر یِنَفَر نیشته با که اِنسانِ ریکا رِه ماندِنهِ با و ایتا طِلای تاج خودشه سَر داشتِه و ایتا تیز داز خودشه دَسِ دِلِه. 15 و ایتا دیگه فِرِشتِه معبدِ جی دِرگا بوماَ و بُلَندِ صِدایِ هَمرَه اونیکه اَبرِ سَر نیشته با رِه باَگوته: «تیِ دازِ هَگیر و دِرُو هَکُن، چون دِرُوئه موقِه بَرِسییَه و زمینِ مَحصول حِسابی بَرسییَه.» 16 پَس اونیکه اَبرِ سَر نیشته با خودشه دازِ زَمینِ سَر بَچِرخاندِه و زمین دِرُو هَبا. 17 ایما ایتا دیگه فِرِشتِه معبدِ جی که آسِمانِ دِلهِ با دِرگا بوما و اون هَم ایتا تیز داز خودشه دَس داشتِه. 18 ایما ایتا دیگه فِرِشتِه که تَشِ اِقتدارِ داشتِه قُربانگاه جی دِرگا بوماَ و بُلَندِ صدایِ هَمرَه اونیکه تیز داز داشتِه رِه، باَگوته: «تیِ تیز داز رِه هَگیر و انگورِ خوشِه شانِ زَمینِ رَزی جی بَچین، چون زمینِ اَنگورِشان بَرِسییَه.» 19 پَس اون فِرشتِه خودشه داز زَمینِ سَر بَچِرخاندِه و زمینِ اَنگورشانِه جَم هَکُردِه و شرابِ گَتِه حوضِ دِلهِ که خُدایِ غضب با بَریختِه. 20 وَ اَنگورِشان شرابِ حوضِ دِلهِ که شَهرِ دِرگا با، باکوتاندِه هَبا و اون حوضِ جی خون سَرازیر هَبا و خون تا اَسبانِ اَوسارِ قَد جآر بوماَ، و اونه دِرازا سیصد کیلومتر با. |
@ 2024 Korpu Company