یوحنایِ مکاشفه 13 - گیله ماز

اوّلین وحشی جانِوَر

¹ ایما بَدییَم ایتا وحشی جانِوَر دریایِ جی دَرِه دِرگا هَنه. دَه تا شاخ و هفتا کَلِّه داشتِه، دَه تا تاج اونه شاخِشانِ سَر دَبا؛ و اونه هر کَلِّه یه سَر ایتا کفرآمیزِ اِسم بَنوِیشتِه هَبا با.

² اون وحشی جانِوَر که مَن بَدییَم ایتا پلنگ مِثان با، وَ اَشِ لِنگِشان و شیرِ دَهَن رِه داشتِه. و اژدها، خودشه قُدرَت و خودشه تَخت و ایتا گَتِ اقتدارِ وحشی جانِوَرِ هَدَه.

³ ایتا ازاون وحشی جانِوَر کَلِّه ها، اِنگار ایتا کُشنده زَخم بِیته با، وَلی اون کُشندِه زخم خوب هَبا با و تمام زمین بُهت هَکُردَن و اون وحشی جانِوَر جی پیروی هَکُردن.

⁴ مَردُم اژدها رِه پَرَسِّش کانه بان چون خودشه اقتدارِ اون وحشی جانِوَرِ هَدَه با. و اون وحشی جانِوَرم پَرَسِّش کانه بان و گونه بان: «کیِه که بِتَّنِه اون وحشی جانورِ مِثان هَبو؟ کیِه که بَتَّنِه اونه هَمرَه بَجِنگِه؟»

⁵ ایتا دَهَن اون وحشی جانِوَرِ هَدَه هَبا تا غُرور و کُفرِ هَمرَه گَب بَزِنِه، و اونه اِجازه هَدَه هَبا تا چِل و دو ماه خودشه اقتدارِ به کار بَبِره.

⁶ اون خودشه دَهَنِ واز هَکُردِه تا خُدا رِه کُفر باگو، کُفر باگوتَن اونه اِسم و اوجه ایی که ماندِنهِ، یَعنی اوشانیکه آسِمانِ دِلهِ دَرِن.

⁷ و این هم، اونه اِجازه هَدَه هَبا که مُقدّسینِ هَمرَه بَجِنگِه و اوشانه سَر پیروز هَبو؛ و اونه اقتدار هَدَه هَبا تا هر طایفه، مَردُم، زبان و قومِ سَر حاکِم هَبو.

⁸ و تمام اوشانیکه زَمینِ سَر دَرِن و اون وحشی جانِوَرِ پرسِّش کانَن - یعنی هر کَس که اونه اِسم، وَرِّه یه حیاتِ دَفترِ دِلهِ بَنوِیشتِه نَبا، همون وَرِّه که پِیش از اینکه دُنیا خلق هَبو قُربانی هَبا با.

⁹ اونکه گوش دارِه بِشنوئهِ:

¹⁰ اَگِه قَرار هَبو یِنفر اَسیر هَبو، به اَسیری شونِه. اَگِه قرار هَبو ینفر شَمشیر هَمرَه بَکوشت هَبو، بایِسّی شَمشیر هَمرَه بَکوشت هَبو. و این مقدّسین پایداری و اوشانه ایمانِ خَنِه.

دوّمین وحشی جانِوَر

¹¹ ایما ایتا دیگه وحشی جانِوَر بَدییَم که زمینِ جی دِرگا هَنه. دُتا شاخ وَرِّه یه مِثان داشتِه و اژدهایِ مِثان گَب زنه با.

¹² اون، اوّلین وحشی جانِوَر تمام اقتدارِ اونه عوض به کار گیرنه با، و زمین و اوشانیکه زَمینِ سَر دَرِن رِه مجبور کانِبا که اوّلین وحشی جانِوَر که اونه کُشنده زخم خوُب هَبا با رِه پَرَسِّش هَکُنَن.

¹³ دُوّمین وحشی جانِوَر گَتِه نِشانه ها و معجزات نَمایش بَنَه، جوریکه حتّی مَردُمانِ چِشِ پِیش آسِمانِ جی تَش زَمینِ سَر بیاردِه.

¹⁴ و اون نِشانه ها و معجزاتِ خاطری که اجازه داشتِه اون اوّلین وحشی جانِوَر عوض به کار هَگیره، اوشانیکه زَمینِ سَر دَبان رِه گول بَزَه و اوشانه باَگوته ایتا مُجَسَمِه اون وحشی جانِوَر جی بِسازَن که شمشیری هَمرَه زخمی هَبا، ولی با این وجود زندهِ بُمانسِّه.

¹⁵ و اونه اِجازه هَدَه هَبا تا اون وحشی جانِوَر مُجَسمِه رِه نَفَس هَدِه تا اون وحشی جانِوَر مُجَسمِه بَتَّنِه حتّی گَب بَزِنِه و باعث هَبو اوشانیکه وحشی جانِوَر مُجَسمِه رِه پَرَسِّش نَکُردِن بَکوشت هَبون.

¹⁶ اینجوری، تمام آدمان اَز گَت تا کوچِک، پولدار و فقیر، و پاکار و آزادِ مجبور کانِه با تا خودشانِ راسِ دَس یا خودشانِ پیشانی سَر علامت بَنَن.

¹⁷ تا هیچکَس نَتَّنِه بَهینِه یا بَروشِه، بِجز اونیکه اون علامت، یعنی اون وحشی جانِوَر اِسم یا اونه اِسمِ شُمارِه رِه بِدارِه.

¹⁸ این حِکمت خَنِه. هر کی فهم دارِه، بَنی تا اون وحشی جانِوَر شُمارِه رِه حِساب هَکونه، چونکه اون شُمارِه اِنسانِ شُمارِه هیسه و اونه شُمارِه شِشصد و شَص و شِش هیسِه.