یوحنایِ مکاشفه 12 - گیله ماز

زِنا و اژدها

¹ و ایتا گَتِه نِشانه آسِمانِ دِلِه ظاهِر هَبا: ایتا زِنا که آفتو خودشه تَن داشتِه و ماه اونه لِنگِ جیر و ایتا تاج که دَوازَّه تا سِتارِه داشتِه اونه سَر دَبا.

² اون زِنا شکمداربا، و بِزاسَّنِ درد و بِزاسَّنِ عذابِ جی شیوَن کانِبا.

³ ایما ایتا دیگه نِشانه آسِمانِ دِلِه ظاهِر هَبا: بِیِیش، ایتا گَتِه سُرخِ اژدها که هفتا کَلِّه و دَه تا شاخ داشتِه، و اونه کَلِّه شانِ سَر هفتا تاج دَبا.

⁴ خودشه دُمِ هَمرَه آسمانِ ستارگانِ یه سِوّمِ جَم هَکُردِه و زَمینِ سَر بَریختیه. اژدها اون زِنایِ پِیش که خَسِّه بِزا، بییَسَه، تا وقتی که اونه وَچه دُنیا بوما، اونه قورت هَدِه.

⁵ اون زِنا ایتا ریکا بِزاسِّه، ایتا ریکا که قَرارِ آهنی عصای هَمرَه تمام مِلّتای سَر حکومت هَکونه. ولی اونه وَچِه بئیتهِ هَبا و خُدا و اونه تختِ وَر رَوانه هَبا.

⁶ و اون زِنا صَحرایِ سمت بَشَه، اون جایی که خُدا اونه وَسین فَراهم هَکُردهِ با، دَر بَشَه، تا اوجِه هزار و دویس و شَص روز اونه بِدارِن.

شیطان زمینِ سَر تُووادِه بونه

⁷ و آسِمانِ دِلِه جنگ هَبا. میکائیل و اونه فرشتگان اژدهایِ هَمرَه بَجِنگِسَّن. اژدها و اونه فرشتگان اوشانِ پِیش جنگِ وَسین بییَسَن،

⁸ وَلی اژدها شِکَست بُخاردِه و دِ آسِمانِ دِلِه جایی اوشانه وَسین دَنِبا.

⁹ و گَتِه اژدها جیر تُووادِه هَبا، یعنی اون قدیمی مآر که اِبلیس یا شیطان دُخوانِسِّه بونه که تمام دُنیا رِه گُمراه کانه. اون، زمینِ سَر تُووادِه هَبا و اون فِرشتگان هم اونه هَمرَه جیر تُووادِه هَبان.

¹⁰ ایما ایتا بُلَندِ صدا آسِمانِ دِلِه بِشنَوِسَّم که گونه با: «اَسِه اَمی خُدایِ نِجات و قُوَّت و پادشاهی، و اون مَسیح اقتدار بوماَ. چون اونیکه اَمیِ اَداشانِ تُهمت زنه با که شُو و روز اَمیِ خُدای وَرجه اوشانه تُهمت زَنه با، جیر تُووادِه هَبا.

¹¹ و اوشانِ، وَرِّه یه خونِ هَمرَه و خودشانِ شهادتِ کلامِ هَمرَه اونه سَر حَریف هَبان. چونکه اوشان خودِشانِه جان دوس نِداشتَن، حتّی تا مرگ موقِه.

¹² پَس اِی آسِمان و اِی کسایی که آسِمانِ دِلِه دَرِین، خُشحالی هَکُنید! وَلی وای بِحالِ شُما، اِی زمین و اِی دریا، چونکه اِبلیس بدجور غیظ هَمرَه شِیمی سَر جیر بوما، چون دانهِ وَخت کَمِ.»

¹³ و وختی اژدها بَدییَه که زَمینِ سَر تُووادِه هَبا، اون زِنایِ دُمّال بَشَه که ایتا ریکا بِزاسِّه با.

¹⁴ وَلی اون گَتِه عقابِ دُتا بال اون زِنا رِه هَدَه هَبا، تا اون جایی که صَحرایِ دِلِه اونه وَسین فراهم هَبا با پَرواز هَکونه و اوجِه مارِ جی دور بُمانه، زَمانی و زمانهایی و نِصفِ زمانی اونه بِدارِن.

¹⁵ اون مار ایتا اُو روخانِه یه اُویه مِثان خودشه دَهَنِ جی دِرگا هَکُردِه که اون زِنایِ دُمّال بوشو، تا لاه اونه خودشه هَمرَه بَبِره.

¹⁶ وَلی زمین اون زِنایِ کُمَک بوما و خودشه دَهَنِ واز هَکُردِه و لاهی که اژدها خودشه دَهَنِ جی دِرگا هَکُردهِ با رِه، قورت هَدَه.

¹⁷ ایما اژدها زِنایِ سَر غیظ هَکُردِه و بَشَه تا اونه بَقیِه ایل و تِبار هَمرَه جنگ هَکونه؛ یَعنی اوشانِ هَمرَه که خُدایِ اَحکامِ جی اطاعت کانَن و عیسی یِه شَهادتِ قایِم چَسبِنِن.

¹⁸ و اژدها دریا کنار مُنتظر بُمانسِّه.