یوحنایِ مکاشفه 1 - گیله ماز

شِروع

¹ عیسیِ مَسیح مکاشفه، که خُدا اونه هَدَه تا اون چیزانی که بایِسّی خِیلی زود اتّفاق دَکِه رِه، خودشه پاکاران نِشان هَدِه. اون اینه خودشه فِرِشتِه یه بَرِساندَنِ هَمرَه، خودشه پاکار یوحنایِ وَسین آشکار هَکُردِه.

² و اون خُدایِ کلام و عیسیِ مسیحِ شهادت، یعنی هَر اونچه که بَدییِه رِه، گواهی هَدَه.

³ خُشا بِحال اون کَسی که این نبوّتِ کلامِ خواندِنه و خُشا بِحال اوشانیکه اونِه اِشنَوِنَن و اونچه که اونه دِلِه بَنوِیشتِه هَبا رِه، نِگَه دارنِن؛ چونکه اون وَخت نَزّیکِ.

پیغام هَفتا کِلیسایِ وَسین

⁴ یوحنایِ طرفِ جی، هفتا کلیسای وَسین که آسیایِ منطقه یه دِلِه دَرِن: فیض و صُلح و سلامتی، اونه طرفِ جی که دَرِه و دَبا و هَنهِ، شِمِرِه بیه، و هفتا روحِ طرفِ جی، که اونه پادشاهی یه تَختِ پِیش دَرِن،

⁵ و عیسیِ مَسیح طرفِ جی، اون وفادارِ شاهِد، اوّلین کسی که مُردِگانِ جی زندهِ هَبا، و پادشاهانِ حاکِم، زمینِ سَر. اونیکه اَمَرِه محبت کانه و خودشه خونِ هَمرَه، اَمَرِه اَمیی گُناهانِ جی آزاد هَکُردِه،

⁶ و اون اَمَرِه ایتا مملکت هَکُردِه، و کاهِنینی خودشه پیَر، خُدایِ وَسین، جَلال و سلطنت تا اَبد اونه هَمرَه هَبو. آمین.

⁷ بِیشین، اون، اَبرِشانِ هَمرَه هَنهِ، هر چِشِی اونه دینِه، حتّی اوشانیکه اونه نِیزه بَزَن؛ وَ تمام زَمینِی طایفِه شان، اونه خاطِری شیوَن کانَن. راس راسی که اینجور بونِه. آمین.

⁸ خُداوند، خُدا گونِه: «’الف‘ و ’ی‘ مَنَم؛ اون قادِرِ مُطلق، که دَرِه و دَبا و هَنهِ.»

اِنسانِ ریکایِ رویا

⁹ مَن یوحنا، شیمی اَداش، که عذابِ دِلِه و پادشاهِی و صبرِ و تَحَمُلِی که عیسی یِه دِلِئه، شیمی هَمرَه شَریکم، خُدایِ کَلام و عیسی یِه شَهادَتِ خاطری، ایتا جزیره یه دِلهِ دَبام که اونِهِ پاتموس گونه بان.

¹⁰ خُداوندِ روز دِلِه، خُدایِ روحِ جی پُر هَبام و ایتا بُلَندِ صِدا، شیپورِ صدایِ مِثانِ می دُمّال سَر بِشنَوِسَّم

¹¹ که گونه با: «اونچه که دینی رِه ایتا کِتابِ دِلِه بَنویس و این هفتا کلیسایِ: اَفِسُس، اِسمیرنا، پِرگاموم، تیاتیرا، ساردِس، فیلادِلفیه و لائودیکیه یه وَسین روانه هَکون.»

¹² ایما وَگرِسَّم تا بِینَم این صِدا کیِه که می هَمرَه گَب زَنه؛ وَ وختی وَگرِسَّم، هفتا طِلائی لَمپا پایِه بَدییَم،

¹³ وَ اون لَمپا پایه شانه میَن یِنفرِ بَدییَم که ’اِنسانِ ریکا رِه‘ ماندِنهِ با. اون ایتا بُلَندِ قَوا خودشه تَن داشتِه و ایتا شال طِلایِ جی خودشه سینه یه دور.

¹⁴ اونه سَرِ مو، پَشمِ مِثانِ اِسبی، ایتا وَرفِ مِثان با. اونه چِش اَلو بِیتِه تَشِ مِثان با.

¹⁵ اونه لِنگ ایتا مفرقِ مِثانِ که کورِه یه دِلهِ خالِص هَبا بو سو سو زنه با، وَ اونه آواز گَتِه لاهِشانِ مِثانِ با.

¹⁶ خودشه راسِ دَسِ دِلهِ هَفتا سِتارِه داشتِه و اونه دَهَنِ جی ایتا دو دَم تیز شَمشیر دِرگا هَنِه با، وَ اونه دیم ایتا آفتویه مِثان با که تمام خودشه قُوَّتِ هَمرَه تابِسِّه.

¹⁷ وَختی اونه بَدییَم ایتا مُرده یه مِثان اونه لِنگِ پِیش بَکِتَم. وَلی اون، خودشه راسِ دَسِ می سَر بَنَه و باَگوته: «نَتِرس، اوَّل و آخَر مَنَم؛

¹⁸ مَن که زِندِه ام. بَمِردِه بام، و بِیِیش همیشه یه وَسین زِندِه ام، و مرگ و مُردِگانِ دُنیایِ کیلیت شان می دَس دَرِه.

¹⁹ «پَس اونچه که بَدییَیی، وَ اونچه اَلآن دَرِه و اونچه که ایما بونِه رِه، بَنویس.

²⁰ اون هفتا سِتارِه که می راسِ دَسِ دِله بِدییَیی و اون هفتا طَلا لَمپا پایه یه راز اینه: اون هَفتا سِتارِه، هَفتا کِلیسایِ فِرشتِگانَن، و اون هَفتا لَمپا پایِه، هَفتا کلِیسائَن.