فیلیپیان 1 - گیله ماز

¹ پولُس و تیموتائوسِ طرفِ جی، مسیحِ عیسیِ پاکاران، تمام مُقَدَسینِ وَسین که مسیحْ عیسی دِلِه فیلیپی شهرِ دِلِه دَرِن، ناظِران و شَمّاسان:

² فیض و صلح و سلامتی، اَمی پیَر، خُدا، وَ خُداوند عیسیِ مَسیحِ طَرَفِ جی، شِمِره بییِه.

دُعا و شُکر هَکُردَن

³ هر وَخت شِمِره می یاد هارنَم، می خُدا رِه شکر کانَم

⁴ وَ تمام می دُعاهای دِلِه هَمَش، شُما همه یه وَسین خُشحالی یه هَمرَه دُعا کانَم،

⁵ چون از اوَّلین روز تا اِمروز، مسیحِ اِنجیلِ کارِ دِلِه شریک بِین.

⁶ و مَن مُطمَعِنَم اونیکه شیمی دِلِه خَجیرِ کارِ شِرو هَکُردِه، اونِه تا مسیحْ عیسیِ وَگَرِسَّنِ روز به آخر رِساندِنِه.

⁷ مَن این حقِّ دارِم که شُما همه یه بارِه اینجور حِسّی بِدارَم، چونکه می دِلِ میَن جا دارین، چون شُما همه می همرَه خدایِ فیضِ دِلِه شریکین، هم می زِندان دَکِتَنِ دِلِه، هم اِنجیلِ جی دِفاع هَکُردَن، و هم اونِ حقیقتِ ثابت هَکُردن.

⁸ چون خُدا می گَواهِ که چطور اون احساساتِ همره که مسیحْ عیسی جی سرچشمِه گیرنِه، شُما هَمه یه مُشتاقم.

⁹ و می دُعا اینه که شِیمی مُحبت بیشتر و بیشتر هَبو و معرفت و فهم کاملِ هَمرَه هَبو،

¹⁰ تا بِتَّنید اونچه که بهتَرینِ رِه قَبول هَکُنید و مسیحِ روز دِلهِ، پاک و بی‌عیب هَبین

¹¹ صالِحی یه ثمره یه جی پُرهَبین که عیسی مَسیحِ طریقِ جی به بار هَنِه، و خُدایِ جلال و حمد و ثنا هَکُردن رِه ختم بونِه.

انجیلِ ترقی هَکوردَن

¹² اِی اَداشان، خَنَم بِدانید اونچه که می سَر بوماَ، در اَصل اِنجیلِ ترقی یه باعث هَبا،

¹³ اون جوریکه تمام سلطنتی کاخِ نِگَهبانان و همه وَسین معلوم هَبا که مَن مَسیح خاطِری زندانِ دِلهِ دَرَم؛

¹⁴ وَ می زندان دَکِتَن باعث هَبا که بیشتَرِ اَداشان، خُداوَندِ دِلِه اوشانه دِل قَویتر هَبو تا تمام جرأتِ هَمرَه، بی تَرس خُدایِ کلامِ باگوئَن.

¹⁵ وَلی بعضیان حَسودی و چِش و هم چشمی یه سَر مَسیحِ موعِظِه کانَن، ولی بعضیان خُجیرِ نیَّتِ هَمرَه.

¹⁶ ایشان مُحبتِ جی اینجور کانَن، چون دانَن که مَرِه اِنجیلِ دِفاع هَکُردنِ وَسین ایجِه بَنَن.

¹⁷ وَلی اوشان چِش و هم چِشمی یه سَر مَسیحِ موعظه کانَن، نه خُجیرِ نیَّتِ هَمره، چون خیال کانَن که می عذابان رِه زندانِ دِلِه بیشتر کانَن.

¹⁸ پس چی؟ مُهم اینه که هر جور بونه، مَسیح اعلام هَبو، چه دُرسِ نیَّتِ همره هَبو، چه نادُرس نیَّتِ همره! اینه وَسین مَن خُشحالی کانم. آرِه، باز هم خُشحالی کانم،

¹⁹ چون دانَم که شیمی دعاها وعیسی مسیحِ روحِ کُمکِ هَمرَه، این به می آزاد هَبوسَّن خَتم بونه،

²⁰ هَمونجور که اشتیاقِ هَمرَه اِنتِظار کَشِنَم و اُمید دارَم که هیچی یه دِلهِ شَرمندِه نَبونَم، بلکه جرأت کاملِ هَمرَه، اَلآن هَم هَمیشه یه مِثان، چه بَمِردَنِ دِلهِ و چه زندگی یه دِلهِ، مسیح می تَنِ دِلهِ جَلال گیرنِه،.

²¹ چون زندگی می وَسین مَسیحِ و بَمِردَن می وَسین سود

²² اَگه قراره می زندگی رِه این تَن دِلِه اِدامِه هَدَم، این مَرِه پُر ثَمرِه کار هیسِّه. با این وجود نَتَّنَم باگوم کُدامِ انتخاب هَکُنَم!

²³ چون این دُتایِ میَن بَدجور دَرَم جَنگِنَم: چونکه آرزو دارَم این دُنیایِ جی بوشوم و مَسیح هَمرَه دَبوم، چون این خِیلی بهتَرِه؛

²⁴ وَلی می بُمانِسَّن جسم دِلِه شیمی وَسین واجِب تَرَه.

²⁵ چونکه اینه جی مُطمَعِنَم، دانم که شیمی ترقی و خُشحالی یه وَسین، ایمانِ دِلِه زنده ماندِنَم و شِما هَمه یه هَمره اِدامِه دَنَم،

²⁶ تا وختی که یِدَفه دیگه شیمی وَر بییَم، شیمی افتخار مسیحْ عیسی دِلِه می خاطری بیشتر و بیشتر هَبو.

²⁷ فقط شیمی جی خَنَم که شِیمی رفتار مسیحِ اِنجیلِ لایق هَبو.، اونجور که چه بییَم و شِمِرِه بَینَم و چه نییَم، شیمی جی بِشنُئَم که ایتا روحِ دِلِه پابرجا هیسین و ایتا فِکرِ همره اِنجیلِ ایمانِ وَسین، دوش به دوش ِهَم تَقَّلا کانید،

²⁸ وَهیچی یه دِلهِ مُخالِفانِ جی تَرسِی نِدارید، که هَمین اوشانه بارِه هلاکتِ نِشانِئِه، وَلی شِیمی نِجاتِ نِشانِئِه، وَ این خُدایِ جییه

²⁹ چون این افتخار شِیمی قِسمَت هَبا که نه فقط مَسیحِ ایمان بیارین، بلکه اونه راه دِلِه رنج هَم بَکِشین.

³⁰ شِمِرِه هم هَمون جنگیِه که مَرِه اونه دِلِه بَدییَین و اَلآنَم اِشنَوِنین که هَلَه هم اونی همره سَر و کَلِه زَنَم.