فیلیمون 1 - گیله ماز

¹ پولُس طرفِ جی، مسیحْ عیسی یِه زِندانِی، وَ تیموتائوس، اَمیی اَداش، اَمیی عزیزِ رَفیق وهمکار فیلیمونِ وَسین،

² اَمیی خاخُر آپْفیا و اَمیی همرزم آرخیپوس، وَ کلیسایِ وَسین که تی سِرِه یه دِلِئه:

³ فیض و صُلح و سلامتی اَمیی پیَر، خُدا، وَ خُداوند عیسی مَسیح طرفِ جی شِمِرِه بیِه.

فیلیمونِ مُحبت و ایمان

⁴ مَن تی یاد بیاردَنِ هَمرَه می دُعاهایِ دِلِه هَمَش خُدا رِه شُکر کانَم

⁵ چون مَن تی مُحبت و ایمان بارِه که خُداوند عیسی و تمام مُقَدَسین وَسین داری رِه اِشنَوِنَم،

⁶ و دُعا کانَم که تی ایمان شریک هَبوسَّن کُمک هَکونه که مسیحِ خاطری هر خُجیرِ چی یه بارِه که اَمیی دِلِه دَرِه، ایتا کامِلِ شناختِ ثمر بیارِه.

⁷ تی مُحبتِ مَرِه خیلی خوشحال هَکوردِه و تسلّی بِیتَم، چون مُقَدَسینِ دِل تی خاطری باز هم جان بِیتِه.

پولسِ خواهش اونیسیموسِ بارِه

⁸ اینه وَسین، هر چَن مَسیح دِلهِ این جُرأتِ دارَم که تِرِه حُکم هَکونَم اونچه که لازِمِ رِه هَکُنی،

⁹ با این وجود مُحبتِ خاطری صلاح دانَم تی جی خواهِش هَکُنَم، مَن پولُس که ایتا پیر مَردایَم، و اَسِه هَم مسیحْ عیسی یِه زِندانییَم،

¹⁰ می وَچِه اونیسیموسِ بارِه که زِندانِ دِلِه اونه روحانی پیَر هَبام، تی جی ایتا خواهش دارَم.

¹¹ اون قدیمان تِرِه فایده ایی نِداشتَه، وَلی اَسِه، هم تِرِه و هم مَرِه فایدِه داره.

¹² مَن می جیگر گوشِه رِه تی ور وَگِرداندِنَم

¹³ مَن خَسَّم تا این مُدَّتی که اِنجیلِ خاطری زِندانِ دِلِه دَرِم اونه می ورجه بِدارَم، تا اون تی عوض مَرِه خِدمت هَکونه

¹⁴ ولی نَخَسَّم بدون تی رضایت کاری هَکورده بوم، تا تی خوبی هَکُردَن زور هَمره نَبو بلکه تی میلِ سَر هَبو.

¹⁵ شاید اینه خاطِری با که، یه مُدّتی تی جی سیفا هَبا تا هَمیشه یه وَسین تی وَرجه وَگِرده،

¹⁶ ولی دِ، نه ایتا پاکارِ مِثان، بلکه پاکاری جی بالاتر، ایتا عزیزِ اَداشِ مِثان. بِخصوص می وَسین، وَلی چَنّی بیشتر تی وَسین، هم جِسمِ دِلهِ هم خُداوندِ دِلِه.

¹⁷ پَس اَگِه مَرِه تیِ رَفیق دانی، اونه هَمونجور قَبول هَکُن که مَرِه قبول کانی.

¹⁸ اَگِه تِرِه بَدی هَکُردِه یا یِچی تِرِه بدهکارِ، اونِه می حِساب بَنی.

¹⁹ مَن، پولُس، می دَس هَمرَه نِویسِنِم: که اونِه تلافی کانَم - اَلبَتَر لازم نیِه باگوم که تو تیِ جانَم می مَدیونی.

²⁰ آرِه اِی اَداش، خَنَم که خُداوندِ دِلهِ تی جی ایتا نَفع مَرِه بَرِسِه. می جان مسیحِ دِلهِ تازِه هَکُن.

²¹ اینه نِویسِنَم چون تی اِطاعَت هکُردنِ جی مُطمئنم، و دانَم حتّی بیشتر اَز اونچه که گونَم، کانی.

²² ضِمناً، ایتا اُتاق هَم مَرِه حاضر هَکُن، چون اُمید دارَم که خُدا شِیمی دُعاها رِه مُستجاب کانه مَرِه شِیمی ورجه وَگِرداندِنِه.

²³ اِپافْراس، که مسیحْ عیسی یِه خاطری می هَمرَه زِندانِ دِلِه دَرِه، تِرِه سلام رِساندِنِه.

²⁴ هَمینجور می همکارِان، مَرقُس، آریستارخوس، دیماس و لوقا، تِرِه سلام رِساندِنَن.

²⁵ خُداوند عیسیِ مَسیح فیض شِیمی روحِ هَمرَه دَبو.