مَرقُس 5 - گیله مازعیسی ایتا آلبَزِهِ مَردَای رِه شَفا دَنه 1 اوشان دَریایِ اوتَکِه، گِراسیانِ مَنطَقِه بَشَن. 2 وَختی عیسی لوتکایِ جی جیر بوما، ایتا مَردای که پَلیدِ روح داشتِه، دَرجا قَبرِسّانی یه جی دِرگا بوما و اونه هَمرَه چِش به چِش هَبا. 3 اون مَردَای قَبرِسّانی یه دِلِه زندگی کانِه با و دِ هیچکی نَتَّنِسّه حتّی زَنجیلِ هَمرَه هَم اونه دَبِدِه. 4 چون چَن دفعه اونه قُل و زَنجیلِ هَکوردِه بان ودَبِسِّه بان، وَلی اون زنجیلِشانِ پاره هَکُردهِ با و اون آهینی که اونِه لِنگِ کَشِ دَبِسِّه بان رِه بِشکَندِه با. هیچکسِ زور نَرسِنِه با اونه آرام بِدارِه. 5 شُو و روز قَبرِسّانی یه دِلِه و کوتی شانه سَر شول شیوَن کَشِنه با و سَنگِ هَمرَه خودِش رِه زَخم و زِیلی کانِبا. 6 وختی اون مَردَای دورِ جی عیسی رِه بَدییَه، دُویه هَمرَه بوما و عیسی یِه لِنگ دَکِته. 7 اون شول بَکِشیِیَه و باَگوته: «اِی عیسی، خُدای مُتِعالِ ریکا، می هَمره چیکار داری؟ تِرِه خُدا رِه قَسَم دَنَم مَرِه عَذاب نَدی!» 8 چون عیسی اونِه باگوته با: «اِی پَلیدِ روح، این مَردای یه جی دِرگا بیِه!» 9 عیسی اونه جی بَپُرسیِه: «تی اِسم چیِه؟» اون باَگوته: «می اِسم لشگَرِ؛ چون اَما خِیلی زیادیم.» 10 وَ عیسی رِه خِیلی التماس هَکُردَن که اوشانِ اون مَنطقه یه جی دِرگا نَکُنِه. 11 اون دُورِوَر کوتی یه سَر، ایتا گَتِه خو رَمِه، دَبان غَذا بُخارَن. 12 پَلیدِ ارواح عیسی رِه التِماس هَکُردَن، باگوتَن: «اَمرِه خو شانه دِلِه روانه هَکون؛ بَنی اوشانه دِلِه بیشیم.» 13 عیسی اوشانه اِجازه هَدَه. پَلیدِ اَرواح دِرگا بومَن و خو شانه دِلِه بَشَن. اون رَمِه یِه دِلِه حُدودِ دو هِزار تا خو دَبان. خو شان کوتی یه سَرازیری یه جی دَریایِ سمت بَشَن، اونه دِلِه دَکِتَن و اُویه دِلِه غَرق هَبان. 14 خو گالِشان دَربَشن و این جَریانِ شَهر و آبادی یه دِلِه تَعریف هَکُردَن. مَردُم هم دِرگا بومَن تا اونچه اتّفاق دَکِتِ با رِه، بِینَن. 15 اوشان عیسی یِه وَرجه بومَن و وَختی بَدییَن اون آلبَزَه مَردَای که قَبلاً اون لَشگَرِ گِرِفتار با، اَسِه لِواس دَکُردِه و عاقِل اوجِه نیشتِه، بَتِرسییَن. 16 اوشانیکه این جَریانِ بَدیه بان، هر چی اون آلبَزِه مَردَای و خو شانه وَسین اتفاق دَکِتِ با رِه، مَردُم رَه تَعریف هَکُردَن. 17 اوشان عیسی رِه التماس هَکُردَن که اوشانه مَنطقِه یه جی دِرگا بوشو. 18 وختی عیسی دَبا لوتکا رِه سَوار هَبو، اون مَردَای که قَبلاً آلبَزِه با، عیسی جی خواهش تمنا هَکُردِه اونه هَمرَه بوشو. 19 وَلی عیسی اِجازه نَده و اونه باَگوته: «بوشو سِرِه تی رَفیقانِ وَرجه و اوشانه باگو خداوند تی وَسین چی هَکُردِه و چِطور تِرِه رَحم هَکُردِه.» 20 اون مَردَای هم بَشَه و دِکاپولیسِ منطقه یه دِلِه اعلام هَکُردِه که عیسی اونه وَسین چی هَکُردِه، تمام مَردُم حیران هَبان. عیسی ایتا زِنا و کیجا رِه شَفا دَنه 21 عیسی یِدَفه دیگِه لوتکایِ هَمرَه دریایِ اوتَکِه بَشَه. دریا کنار وَر ایتا گَتِه اِزدِحام اونه دُور جَم هَبان. 22 ایما ایتا اَز یَهودیِانِ عبادتگاهِ رئیسان، که اونه اِسم یایروس با بوما و وَختی عیسی رِه بَدییِه اونه لِنگ دَکِته 23 و خواهش تَمنایِ هَمرَه اونه باَگوته: «می کوچِ کیجا دَرِه بَمیرِه. بیِه و تیِ دَسِ اونه سَر بَنی تا شَفا هَگیره و زندهِ بُمانه.» 24 عیسی هم اونه هَمرَه بَشَه. ایتا گَتِه ازدحام هم عیسی یِه دُمّال رادَکِتَن. اوشان هر طرف جی اونه فِشار هارنِه بان. 25 اوجِه ایتا زِنا دَبا که دَوازده سال خونریزی داشتِه. 26 اون طَبیبانِ دَسِ جیر خیلی زَجر بَکِشیِیَه و تمام خودشه دارایی رِه خَرج هَکُردهِ با؛ وَلی عَوَضِ اینکه بِهتر هَبو، بَدتَر هَبا با. 27 این زِنا عیسی یه باره بِشنَوِسّه با، وَ ازدحامِ دِلِه بوما و عیسی یه دُمّال سَر اونه قَوا رِه لَمس هَکُردِه. 28 چون خودشه وَر گونه با: «اَگه حتّی اونه قَوا رِه هَم لَمس هَکُنَم، شَفا گیرنَم.» 29 دَرجا اونه خونریزی قَطع هَبا و خودشه تَنِ دِلِه اونه حالی هَبا که خودشه مریضی یه جی شَفا بِیته. 30 عیسی دَرجا بِفَهمِسِّه که ایتا قُوَّت اونه جی دِرگا بَشَه. پَس اِزدحامِ دِلِه خودشه دُور و وَرِ بِیشییِه و بپُرسیِه: «کی می قَوا رِه لَمس هَکُردِه؟» 31 اونه شاگِردان اونه باگوتَن: «دینی مَردُم هر طرفِ جی تِرهِ فِشار هارنَن بعد گونی، ”کی مَرِه لَمس هَکوردِه» 32 وَلی عیسی خودشه دُور و وَرِ بِیِشیِه تا بِینه کی این کارِه هَکُردِه. 33 پَس اون زِنا که دانِسِّه چی اونه سَر بوما، تَرس و لَرزِ هَمرَه بوما، عیسی یِه لِنگ دَکِته و تمام حَقیقَتِ اونه باَگوته. 34 عیسی اونه باَگوته: «دِتَر، تی ایمان تِره شَفا هَدَه. بِسلامت بوشو و این مریضی یه جی شَفا هَگیر!» 35 عیسی هَلَه گَب زنه با که چن نَفر رَئیسِ عبادتگاهِ سِرِه یه جی بومَن و باگوتَن: «تی کیجا بَمِردِه! دِ چِرا اُسّا رِه زَحمَت دَنی؟» 36 ولی وَختی عیسی اوشانه گَبِ بِشنَوِسِّه، عبادتگاهِ رَئیسِ باَگوته: «نَتِرس! فقط ایمان بِدار.» 37 وَ اِجازه نَده بِجُز پِطرُس و یعقوب و یَعقوبِ اَداش یوحنا، هیچکی دیگه اونه دُمّال بوشو. 38 وَختی عبادتگاهِ رَئیسِ سِرِه بَرِسییَن، عیسی بَدییَه اوجِه قیامَتِ و مردُم بُلَندِ صدایِ هَمرَه بِرمِه زاری و موری کانَن. 39 پَس دِلهِ بَشَه و اوشانه باَگوته: «چرا شول شیون و بِرمِه زاری کانید؟ کیجا نَمِردِه، بلکه خاتِه.» 40 اوشان عیسیِ یِه سَر بَخَنِسَّن. ولی عیسی تمام اوشانه دِرگا هَکُردِه، وَ کیجایِ پیَر و مآر و هَمینجور شاگِردانِی که اونه هَمرَه دَبان رِه خودشه هَمرَه بِیته و اوجِه ایی که کیجا دَبا، دِلِه بَشَه. 41 عیسی کیجای دَسِ بِیته و اونه باَگوته: «تالیتا، کُم!» یَعنی: «اِی کوچِ کیجا، تِره گونَم وَرِس!» 42 اون دَوازده سالِه کیجا دَرجا ورسَه و رادَکِته. اوشان این اِتِّفاقِ جی خِیلی بُهت هَکُردَن. 43 عیسی اوشانه قَدِغَن هَکُردِه که نُذارَن هیچکی این اِتِّفاقِ جی خَبَردار هَبو، وَ اوشانه باَگوته که اون کیجا رِه یِچی هَدَن بُخارِه. |
@ 2024 Korpu Company