مَرقُس 4 - گیله مازبرزگرِ مَثَل 1 یِدَفِه دیگه عیسی دَریایِ وَر تعلیم هَدَئنِ شُروع هَکُردِه. اِزدِحام زیادی اونه دور جَمع هَبان، جوریکه مجبور هَبا ایتا لوتکا که دَریایِ دِلِه دَبا رِه سَوار هَبو و اونه دِلِه بَنیشِه، وَ تمام ازدحام دَریا کنار دَبان. 2 عیسی خِیلی چیزانِ مَثَلِشانِ هَمرَه اوشانه یاد هَدَه. اونموقِه که دَبا اوشانِه تعلیم هَدِه اوشانِه باَگوته: 3 «گوش هَدین! یه روز ایتا برزگر توُم بِپاشیَنِ وَسین بِجار سَر بَشَه. 4 وَختی توُم پاشنه با، یه میثقلی راه دِلِه دَکِته و پَرندِه شان بومَن و اوشانِه بُخاردَن. 5 یه میثقلی دیگه سَنگلاخ زَمینِ دِلِه دَکِته که خِیلی گِل نِداشته. پس زود سَر بَکِشییَه، چون اوجِه یه گِل جَل نَبا. 6 وَلی وَختی آفتو دَر بوما، بَسوتَن و چون بَنِه نِداشتَن خُشک هَبان. 7 یه میثقلی توُم هَم تیفِ شانه دِلِه دَکِته. تیفِ شان سَر بَکِشیَن، اوشانِه خَفِه هَکُردَن و اون تُمِشان بار نیاردَن. 8 وَلی بَقیه تُمِشان خُجیرِ گِلِ میَن دَکِتَن و نُروک بَزَن، سَر بَکِشییَن و بار بیاردِن و زیاد هَبان، بَعضی سی، بَعضی شَصت و بَعضی صد برابر بار بیاردِن.» 9 ایما عیسی باَگوته: «هر کی گوش شِنَوا دارِه، بِشنوئهِ.» 10 وَختی که عیسی تَنها با، اون دَوازدَه نَفر و اوشانیکه اونه دُورِوَر دَبان مَثَلِشان بارِه اونه جی بَپُرسیَن. 11 عیسی اوشانه باَگوته: «خُدایِ پادشاهی یه رازِ بِفَهمِسَّن شِمِرِه هَدَه هَبا، وَلی دِرگایِ مَردُمانِ وَسین، هَمِه چیرِه بایسّی مَثَلهِ هَمرَه اوشانه باگوُم؛ 12 تا: «”راس راسی بِینَن، وَلی نِفَهمِن، راس راسی بِشنُئَن، وَلی اوشانه حالی نَبوُ، تا نَکُنِه وَگِردِن و آمُرزیدِه هَبون!“» 13 ایما عیسی اوشانه باَگوته: «این مَثَلِ نِفَهمِنین؟ پَس چِطور مَثَلای دیگَرِ خَنید بِفَهمین؟ 14 برزگر خُدایِ کَلامِ کارنِه. 15 بَعضی مَردُم راهِ وَرِ تُمِشانِ مِثانَن، هموجِه که کَلام کاشتهِ بونه، اوشان وختی که کلامِ اِشنَوِنَن، شِیطان هَنه و کلامی که اوشانه دِلِه کاشتهِ هَبا رِه، دُزِّنه. 16 بَعضی مَردُم، ایتا سَنگلاخ زَمینِ دِلِه بِکاشتِه تُمِشانِ مِثانَن، اوشان وَختی که کَلامِ اِشنَوِنَن دَرجا اونِه خُشحالی یه هَمرَه قبول کانَن، 17 وَلی چون بَنِه نِدارَن، فقط یِذرِه دَوام هارنَن. ایما وَختی که خُدایِ کلامِ خاطِری، اذیت و آزار دِلِه دَکِنَن، دَرجا خودِشانِ ایمان جی دَکِنَن. 18 بَعضی دیگه، تیفِشانِ دِلِه یه بِکاشتِه تُمِشانِ مِثانَن؛ ایشان اوشانیِیَن که خُدایِ کَلامِ اِشنَوِنَن، 19 وَلی چون اوشان دُنیا رِه دِل دَبِسَّن و اوشانه چِشم مال و مَنالِ دُمّال دَرِه و چیزای دیگَرِ هَوَسِ خودِشانِ دِلِ میَن دارَن، ایشان خدای کلامِ خَفِه کانه و کلام بار نیارنِه. 20 وَلی تُمایی که خُجیرِ زَمینِ دِلِه بِکاشتهِ هَبان، اوشانیِیَن که خُدایِ کَلامِ اِشنَوِنَن، اونِه قبول کانَن و سی، شَصت و صد بَرابَر بار هارنَن.» لَمپایِ مَثَل 21 عیسی اوشانه باَگوته: «مَگِه لَمپا رِه هارنین تا اونه کاسه جیر یا تَختِ جیر بَنین؟ مَگِه اونِه چراغدانِ سَر نُزارنین؟ 22 چون هیچ جا هَدَه چی ائی دَنیِه که مَعلوم نَبوُ، وَ هیچ قائِم هَکُرده ایی دَنیِه که بَرمَلا نَبوُ. 23 هر کی گوش شِنَوا دارِه، بِشنوئه.» 24 ایما عیسی اوشانه باَگوته: «مُواظب هَبین چی اِشنَوِنید. هر کیلِه یِه هَمرَه که هَدین، همون کیله هَمرَه، حتّی بیشتر هَم عوض گیرنید. 25 چون اونیکه دارِه رِه، بیشتر هَدَه بونه و اونِ جی که نِداره، حتّی اونچه که دارِه هَم هَگیته بونه.» سَربَکِشیِه تُمِ مَثَل 26 عیسی اوشانه باَگوته: «خُدایِ پادشاهی ایتا مَردَای رِه ماندِنه که زَمینِ سَر توُم پاشِنِه. 27 شُو و روز، چه اون مَردَای خاته بو و چه بیدار هَبو، توُم نُروک زَنِه و سَر کَشِنِه. وَلی اون مَردَای نِدانِه چِطور این اِتفاق دَکِنه. 28 زَمین خود به خود بار دَنه: اَوَّل ساقِه سَر کَشِنِه، ایما خوشِه دُرس بونه و ایما خوشِه تُمِ جی پُر بونه. 29 ولی وختی توُم بَرِسِه، برزگر دَرجا خودشه داز گیرنِه، چون دِرُویه موقِه بَرسییَه.» خَردَل تُمِ مَثَل 30 عیسی اوشانه باگوتِه: «خُدایِ پادشاهی چی رِه ماندِنه، یا چه مَثَلِ هَمرَه اونِه توضی هَدیم؟ 31 خدایِ پادشاهی ایتا خَردَلِ تُمِ ماندِنِه. خَردَل کوچیکتَرین تُمی هیسِه که اونِه زَمینِ دِلِه کارنَن. 32 وَلی وَختی بِکاشتهِ هَبا، سَر کَشِنِه و باغِ تمام گیاهانِ جی گَت تَر بونه و گَتِه شاخِه هارنه، جوریکه آسِمانِ پَرندِه شان تانَن اونه سایه یه جیر فَک بِسازَن.» 33 عیسی تا اوجِه که تانِسَّن بِفَهمَن خیلی اینجور مَثَلایِ هَمرَه، خُدایِ کَلامِ اوشانه وَسین گونه با. 34 اون بِجُز مَثَلِ هَمرَه جورِ دیگه اوشانه هَمرَه گَب نَزَنِه با؛ وَلی وَختی خودشه شاگِردانِ هَمرَه خَلوَتِ دِلِه دَبا، هَمِه چیرهِ اوشانه وَسین توضی دَنهِ با. عیسی دَریایِ کولاکِ آرام کانه 35 اون روز، وَختی نِمایِ سَر بَرِسییَه، عیسی خودشه شاگِردانِ باَگوته: «بیئِین دَریایِ اوتَکِه بیشیم.» 36 اوشان جَماعَتِ تَرک هَکُردَن و عیسی رِه همون لوتکایِ هَمرَه که اونه دِلِه نیشته با، خودِشانِه هَمرَه بَبِردَن. چَن تا لوتکا دیگه هم اوشانه هَمرَه شونه با. 37 یِدَفه دَریا رِه گَتِه کولاک بِیته. موجِشان جوری لوتکایِ کَشِ خارنِه با که نَزیک با لوتکا اُویه جی پُر هَبو. 38 وَلی عیسی لوتکایِ پُشِّسَر، خودشه سَرِ، مُتَکایِ سَر بَنَ با و خاتِه با. شاگِردان اونه بیدار هَکُردَن و باگوتَن: «اُسّا، تِرِه مهِم نیِه، هَلاک هَبیم؟» 39 عیسی ورِسَه و وا رِه زَمتُل بَزَه و دَریا رِه باَگوته: «ساکت هَبو! آرام بَگیر!» ایما وا بییَسَه و همه جا کامِلاً آرام هَبا. 40 ایما خودشه شاگِردانِ باَگوته: «چِرا اینجور بَتِرسییَین؟ هَلَه ایمان نِدارین؟» 41 اوشانه دِل بَدجور تَرس دَکِتِ با، هَمدیگَرِ گونهِ بان: «این کیِه که حتّی وا و دَریا هم اونه جی اطاعَت کانَن!» |
@ 2024 Korpu Company