مَرقُس 3 - گیله مازایتا مَردایِ شَفا که اونه دَس خُشک هَبا با 1 عیسی یِدَفِه دیگه یَهودیانِ عبادتگاهِ دِلِه بَشَه. اوجِه ایتا مَردَای دَبا که اونه ایتا دَس خُشک هَبا با. 2 بعضیان عیسی رِه پآنه بان تا بِیِشَن مُقَدَّس شَنبِه یه دِلِه اون مَردَای رِه شَفا دَنه یا نه، تا اینجوری اونه تُهمَت بَزَئن وَسین ایتا بَهانِه پیدا هَکونَن. 3 عیسی اون مَردَای که اونه دَس خُشک هَبا با رِه باَگوته: «همه یه وَر بییَس.» 4 ایما اوشانه جی بَپُرسیِه: «مُقَدَسِ شَنبِه یه دِلِه خوبی هَکُردَن جایزِ یا بَدی هَکُردَن؟ یِنَفرِ جان نِجات هَدَئن یا بَکوشتَن؟» وَلی اوشان هیچی نَگوتَن. 5 عیسی، اوشانیکه اونه دُور و وَر دَبان رِه عصبانیَّتِ هَمرَه بِیشییِه و اوشانه سَنگ دِلی یه جی نارحت هَبا. ایما اون مَردَای رِه باَگوته: «تی دَسِ دِراز هَکُن.» اون خودِشِه دَسِ دِراز هَکُردِه و اونه دَس خُجیر هَبا. 6 عُلَمایِ فِرقِه فَریسی دِرگا بَشَن و دَرجا هیرودیسِ پادشاهِ هَوادارانِ هَمرَه نخشه بَکِشییَن که چِطور عیسی رِه بَکوشَن. جماعَتِ زیادی عیسیِ یه دُمّال شونَن 7 ایما عیسی خودشه شاگِردانِ هَمرَه دَریایِ سَمت بَشَه. ایتا گَتِ جماعَت هم جلیلِ منطقه یه جی اونه دُمّال بَشَن. 8 وَ هَمینجور یه دَسِّه یَهودیه منطقه مردم و اورشلیم و اَدومیِه یه منطقه و اُردُنِ روخِانه یه اوتَکِه و صور و صیدونِ دور و وَر جی، وَختی عیسی یِه تمام کارانِ خَبَرِ بِشنَوِسَّن، اونه وَرجه بومَن. 9 اون اِزدحامِ خاطری که اوجِه دَبان، عیسی خودشه شاگِردانِ باَگوته تا مَردُم اونه سَر نَکِتَن ایتا لوتکا اونه وَسین آمادِه هَکُنَن. 10 چون عیسی خِیلیان رِه شَفا هَدَه با، اینِه وَسین تمام مَریضان اونه سَمت هجوم هارنه بان تا اونه لَمس هَکُنَن. 11 هر وَخت پَلیدِ اَرواح عیسی رِه دینِه بان، اونه پِیش زمین سَر کَنِه بان و داد زَنه بان: «تو خدای ریکائی!» 12 وَ عیسی اوشانه قَدغَن کانِبا تا هیچ کَسِ وَرجه نَگوون اون کیِه. دَوازدَه رَسول 13 عیسی ایتا کوهِ سَر بَشَه و اوشانیکه خَسِّه رِه خودشه وَر دُخوانِسِّه، اوشان هَم اونه وَر بومَن. 14 اون دَوازدَه نَفَرِ اِنتِخاب هَکُردِه و اوشانه اِسمِ رَسول بَنَه، تا اونه هَمرَه دَبون و اوشانه روانه هَکونه تا مَردُمِ تعلیم هَدِن، 15 وَ این قدرت و اِختیارِه بِدارِن که آلِشان رِه دِرگا هَکُنَن. 16 اون دَوازدَه نَفرِ که انتخاب هَکُردِه ایشان بان: شَمعون که عیسی اونه اِسمِ پِطرُس بَنَه؛ 17 یعقوب و یوحنا، زِبِدی یه ریکاشان که اوشانه اِسمِ ’بوآنِرجِس‘، یَعنی ’رَعد ریکاشان‘ بَنَه؛ 18 آندریاس، فیلیپُس، بَرتولْما، مَتّی، توما، یعقوب حَلْفایِ ریکا، تَدّای، وَطَن پَرَستِ شَمعون، 19 وَ یَهودای اَسخَریوطی که عیسی رِه دُشمَنِ تَسلیم هَکُردِه. 20 ایما عیسی سِرِه بَشَه و باز جَماعَت جَمع هَبان، جوریکه حتّی اون و اونه شاگِردان نَتَّنِسَّن غذا بُخارِن. 21 وَختی عیسیِ فامیلان اینه بِشنَوِسَّن، بَشَن تا اونه خودِشانِه هَمرَه بَبِرَن، چون گونهِ بان: «تور هَبا.» روح القُدُسِ کُفر باگوتَن 22 توراتِ مُعَلِمین که اورشلیمِ جی بوما بان گونه بان: «بِعِلزِبول دارِه،» و «آلِشانِ رِه، آلِشانه رَئیسِ کُمَکِ هَمرَه دِرگا کانه.» 23 پس عیسی اوشانه خودشه وَر دُخوانِسِّه و مَثَلِ هَمره اوشانه باَگوته: «چِطور شیطان تانه شِیطانِ دِرگا هَکونه؟ 24 اَگه ایتا مملکتِ دِلِه دو دَسِگی هَبو، اون مملکت نَتَّنِه دَوام بیارِه. 25 وَ اگه ایتا سِرِه یه دِلِه دو دَسِّگی هَبو، اون سِرِه نَتَّنِه دَوام بیارِه. 26 وَ اَگه شِیطان هم خودش علیِه وَرِسه و دو دَسِّه هَبو، نَتَّنِه دَوام بیارِه، بلکه نابود بونه. 27 هیچکی نَتَّنِه ایتا رَسدارِ مَردَای یه سِرِه یه دلِه بوشو و اونه مال و اموالِ غارت هَکونه، مَگِه اینکه اَوَّل اون رَسدارِ مَردَای رِه دَبِدِه. ایما تانِه اونه سِرِه رِه غارت هَکونه. 28 «راس راسی شِمِره گونَم آدَمیزاد تمام گُناهان و هر کُفری که باگو آمُرزیدِه بونه؛ 29 وَلی هر کی روح القُدُسِ کُفر باگو، هیچ وَخت آمُرزیده نَبونه، بلکه اونه گُناه تا اَبَد اونه سَر ماندِنه.» 30 عیسی اینِه وَسین این گَبِ بَزَه که گونهِ بان: «اون پَلیدِ روح دارِه.» عیسی یِه مآر و اَداشان 31 ایما عیسی یِه مآر و اَداشان بومَن. اوشان دِرگا بییَسَن، یِنَفَرِ روانه هَکوردَن تا عیسی رِه دُخوانِه 32 جَماعَتی که عیسی یِه دور و ور نیشته بان، اونه باگوتَن: «تی مآر و اَداشان دِرگا دَرِن و تی دُمّال گَردِنِن.» 33 عیسی اوشانِه باَگوته: «می مآر و اَداشان کییَن؟» 34 ایما اوشانیکه اونه دور و ور نیشته بان رِه بِیشییِه و باَگوته: «ایشان می مآر و اَداشانَن! 35 چون هر کی که خُدایِ خواسِّه رِه بجا بیارِه، می اَداش و خاخُرِ و مآرِه.» |
@ 2024 Korpu Company