مَرقُس 16 - گیله ماز

عیسی یِه زندهِ هَبوسَّن

¹ وَختی مُقَدَّس شَنبِه روز تَمام هَبا، مریم مَجْدَلیّه و مریم، یَعقوبِ مآر و سالومِه، عَطرِی روغَن بَهیَّن تا بوشون و عیسی یِه جِنازِه رِه عطری روغَن بَزِنِن.

² پَس اوَّلین روزهفته، صُبِ سَر، موقِه ای که خورشید دَبا دَر بیِه، زِناکان مَقبَرِه یه سَمت رادَکِتَن.

³ اوشان هَمدِیگَرِ گونهِ بان: «کی خَنِهِ اَمی وَسین سَنگ رِه، مَقبَره یه دَهَنِه یه جی غَلت هَدِه؟»

⁴ وَلی وَختی مقبَرِه یه پِیش بَرِسییَن، بَدییَن اون سَنگ که خِیلی هَم گَت با، مَقبَره یه دَهَنِه یه جی ایتا گوشِه غَلت هَدَئن.

⁵ وَختی مَقبَره یه دِلِه بَشَن، بَدییَن ایتا جَوان مَردَای اِسبی قَوای هَمرَه راسِ طَرَف نیشتِه. زِناکان اونه بَدییَنِ جی هَراسان هَبان.

⁶ اون جَوان اوشانه باَگوته: «نَتِرسین. شُما عیسی یه ناصِری یه دُمّال گَردِنین، همون که اونه مَصلوب هَکُردَن. اون زندهِ هَبا، ایجه دَنییِه. اوجِه ایی که اونه جِنازِه رِه بَنَ بان رِه بیشین.

⁷ اَسِه، بیشین و اونه شاگِردان و پِطرُسِ باگویید که اون شیمی جی پیشتر جَلیلِ مَنطقه شونِه؛ اونه اوجِه دینین، هَمونجور که پیشتَر شِمِره باگوتِه با.»

⁸ پَس زِناکان دِرگا بومَن، مَقبَره یه جی دَربَشن، چون اوشانه جان پَرکَنِه با و بُهت هَکُردهِ بان. اوشان هیچ کَسِ هیچی نَگوتَن، چون تَرسِنِه بان.

⁹ وَختی عیسی هفته یه اولین روز صب سر زندِه هَبا، اول مَریم مَجدَلیِه که اونه جی هَفتا آل دِرگا هَکُردهِ با رِه ظاهِر هَبا.

¹⁰ مَریم هَم بَشَه و اونه شاگِردان که ماتَم داشتِن و بِرمِه کانه بان رِه، خَبر هَدَه.

¹¹ وَلی اوشان وَختی بِشنَوِسَّن که عیسی زندهِ هَبا و مریم اونه بَدییَه، باور نَکُردِنِ.

¹² بعد ازین، عیسی خودِش رهِ یه شِکل دیگَرِ هَمرَه به دو نَفَر از اوشان که ایتا دِهاتِ سَمت شونه بان ظاهر هَکُردِه.

¹³ اون دو نَفَر وَگَرِسَّن و بَقیِه شاگِردانِ این جَریانِ جی باخَبَر هَکُردَن، وَلی اوشان ایشانه گَبِ باوَر نَکُردِن.

¹⁴ وختی که اون یازدَه شاگِرد سُفره یه سَر نیشته بان عیسی اوشانه ظاهِر هَبا. عیسی اوشانِ بی ایمانی و سَنگ دِلی یه وَسین سَرامکو هَکوردِه، چون اوشانه گَبِ که اونه بَعدِ زندهِ هَبوسَّن بَدیه بان رِه باوَر نَکُردِن.

¹⁵ ایما اوشانه باَگوته: «تمام دُنیایِ دِلِه بیشین و اِنجیلِ تمام مَردُم رَه اعلام هَکُنید.

¹⁶ هَر کی ایمان بیارِه و غُسلِ تَعمید هَگیره، نِجات گیرنِه. وَلی هَر کی ایمان نیارِه، مَحکوم بونه.

¹⁷ واین نشانه ها و معجزه ها اوشانِ شییِه که مَره ایمان دارَن: می اِسمِ هَمرَه آلِشانه دِرگا کانَن و جدیدِ زِبانِ هَمرَه گَب زَنِن.

¹⁸ وَ مارِشان رِه خودِشانِه دَسِ هَمرَه گیرنَن، اگه کُشَندِه زَهر هم بُخارَن، اوشانه هیچی نَبونِه، اوشان مَریضانِ سَر دَس نَنِن و مَریضان شَفا گیرِنَن.»

¹⁹ پس عیسی یِه خداوند بَعدِ اونکه این گَبان رِه اوشان بَزَه، آسِمانِ سَمت بَبِردِه هَبا و خُدایِ راسِ دَس بِنیشتهِ.

²⁰ شاگِردان هم دِرگا بَشَن و هَمِه جا تَعلیم دَنهِ بان. خداوند اوشانه هَمرَه کار کانِبا و خودشه کَلامِ اون نِشانه و معجزاتِ هَمرَه که شاگِردان انجام دَنهِ بان، ثابِت کانِبا.