مَرقُس 10 - گیله ماز1 عیسی کفرناحومِ شَهرِ جی دِرگا بوما و یهودیه یه منطقه و اُردن روخانِه یه اوتَکِه بَشَه. باز هَم جَماعَت اونه دُور جَمع هبان، اون طِبقِ خودِشِه عادَت، اوشانه تَعلیم هَدَه. اِزدواج و طلاقِ تعلیم 2 عُلَمایِ فِرقِه فَریسی عیسی یِه وَرجه بومَن و اونه آزمون هَکُردَن وَسین، بَپُرسیَن: «شَرعاً دُرسِّه ایتا مَردَای خودشه زِنا رِه طَلاق هَدِه؟» 3 عیسی اوشانه جَواب باَگوته: «موسی یِه پیغَمبَر شِمِره چه حُکمی هَدَه؟» 4 اوشان باگوتَن: «موسی اِجازه هَدَه که مَرد ایتا طَلاق نامه بَنویسِه و خودشه زِنا رِه وِل هَکونه.» 5 عیسی اوشانه باَگوته: «موسی شِیمی سَنگدِلی یه وَسین با کِه این حُکمِ شِمِره بَنویشتِه. 6 وَلی از همون اوَّل که دُنیا به وجود بوما، ”خُدا اوشانِه زِنا مَردَای بِساته.“ 7 وَ ”اینه وَسین، مَرد خودِشه پیَر و مارِ جی سیفا بونه و خودشه زِنایِ هَمرَه جُفت بونه، 8 واون دُتا یِه تَن بونَن.“ پَس دِ اوشان نه دو تَن بلکه یِه تَن هیسَن. 9 اینِه وَسین اونچه که خُدا جُفت هَکُردِه، آدَم نباید سیفا هَکونه.» 10 وَختی سِرِه یه میَن دَبان، یِدَفِه دیگه شاگِردان این موضوع بارِه عیسی یِه جی سوال هَکُردَن. 11 عیسی اوشانه باَگوته: «هر کی خودشه زِنا رِه طَلاق هَدِه و ایتا دیگه زَن بَبِره، خودشه زِنایِ حَق، زَنا هَکُردِه. 12 وَ اَگه ایتا زِنا خودشه شو یه جی طَلاق هَگیرِه و ایتا دیگه شوُ هَکونه، زَنا هَکُردِه.» عیسی و وَچِه هان 13 مَردُم وَچِه هان رِه عیسی یِه وَرجه هارنِه بان تا خودشه دَسِ اوشانه سَر بَنِه و اوشانه بَرکَت هَدِه. وَلی شاگِردان مَردُمِ سَرامکو هَکوردَن. 14 عیسی وَختی این بَدییَه، عصبانی هَبا و خودشه شاگِردان باَگوته: «بَنین وَچِه هان می وَرجه بییَن؛ اوشانه جُلوهِ نِگیرین، چون خُدایِ پادشاهی اینجور کَسانِ شی هیسه. 15 راس راسی شِمِره گونَم، هر کی خُدایِ پادشاهی رِه ایتا وَچِه یه مِثان قَبول نَکُنِه، هیچ وَخت اونه دِلِه نَشونِه.» 16 ایما وَچِه هان رِه کَشهِ بَزَه، خودشه دَسِ اوشانه سَر بَنَه و اوشانه بَرکَت هَدَه. جوان پولدار 17 وَختی عیسی رادَکِته، ایتا مَردَای دُو هَکُرده بوما، عیسی یِه پِیش زانو بَزَه و اونه جی بَپُرسیَه: «اِی خُجیرِ اُسّا، چه بایسّی هَکُنَم تا اَبدی زندگی یه وارِث هَبوُم؟» 18 عیسی اونه باَگوته: «چِرا مَرِه خُجیر دُخواندنی؟ هیچکس بِجز خُدا خُجیر نیِه. 19 اَحکامِ دانی: ”قَتل نَکُن، زَنا نَکُن، دُزی نَکُن، دِروئی شَهادَت نَدِه، حُقِّه بازی دَر نیار، تی پیر و مارِ احترامِ بِدار.“» 20 اون مَردَای عیسی یِه جَواب باَگوته: «اُسّا، تمام ایشان رِه از جَوانی بِجا بیاردِم.» 21 عیسی محبَتِ هَمرَه اونه بِیشییِه و باَگوته: «تو یِچی کَم داری؛ بوشو هر چی داری رِه بَروش و اونه پولِ فَقیرِانِ هَدِه که آسِمانِ دِلِه گنج داری، ایما بیه و مَرِه پیروی هَکُن.» 22 اون مَردَای این گَبِ جی دِلسَرد هَبا و غُصِّه یه هَمرَه اوجِه یه جی بَشَه، چون خِیلی پولدار با. 23 عیسی دور و وَرِ بِیشییِه، خودشه شاگِردانِ باَگوته: «چقدر سَختِ پولداران خدایِ پادشاهی یه دِلِه بوشون!» 24 شاگِردان اونه این گَبانِ جی تَعجب هَکُردَن. وَلی عیسی یِدَفِه دیگه اوشانه باَگوته: «وَچِه هان، خُدایِ پادشاهی یه دِلِه بَشَئن چَنّی سَختِه! 25 شُتر رَد هَبوسَّن دَرزَنِ لوکا یه جی آسانتَر از پولدارِ رَد هَبوسَّن خُدایِ پادشاهِی دِلِه هیسِه.» 26 شاگِردان خِیلی بُهت هَکُردَن و عیسی رِه باگوتَن: «پَس کی تانِه نِجات هَگیره؟» 27 عیسی اوشانه بِیشییِه و باَگوته: «این آدَمی یه وَسین مَحالِه، وَلی خُدایِ وَسین اینجور نیِه؛ چون خُدایِ وَسین هیچی مَحال نیِه.» 28 ایما پِطرُس عیسی رِه باَگوته: «بِیِش، اَما هَمِه چی یه جی دَس بَکشییَیم و تی دُمّال بومَیم.» 29 عیسی باَگوته: «راس راسی شِمِره گونَم، هیچکی دَنیِه که می خاطری و اِنجیلِ خاطری، سِرِه یا اَداش یا خاخُر یا مآر یا پیَر یا وَچِه یا خودشه مِلکِ جی دَس بِیته بو، 30 و این دُنیایِ دِلِه رَنج و زَحمتی که دینه یه عَوَض صد بَرابَر بیشتر سِرِه و اَداش و خاخُر و مآر و وَچِه و مِلک بِدَس نیارِه، وَ اون دُنیایِ دِلِه هَم اَبَدی زندگی اونه قِسمت نَبوُ. 31 وَلی خِیلیان که اوَّلین هیسَن آخَرین بونَن، وَ آخرینشان اوَّلین بونَن!» عیسی سومین دفِه خودشه بَمِردَن و زندهِ هَبوسَّن پیشگویی کانه 32 اوشان اورشلیمِ راهِ دِلِه دَبان و عیسی اوشانه جی پیشتَر راه شونه با. شاگِردان تَعَجُب هَکُردَن و کسایی که اوشانه دُمّال سَر شونه بان، بَتِرسیه بان. یِدَفِه دیگه عیسی اون دَوازدَه شاگِردِ ایتا گوشِه بَبِرده و اونچه که خَسِّه اونه سَر بیه رِه، اوشانه وَسین باَگوته. 33 عیسی باَگوته: «اَسِه به اورشَلیمِ شونیم، اوجه انسانِ ریکا رِه مَعبدِ گَتِه کاهِنان و توراتِ مُعَلِّمینِ دَس تَسلیم کانَن. اوشان اونه بَمِردَنِ وَسین مَحکوم کانَن و غیر یَهودیِانِ دَس اِسپاردِنَن. 34 اوشان اونه مسخره کانَن، اونِه سَر فیلی تووادِنَن اونه شَلّاق زَنِن و کُشِنِن، وَ بعد از سِه روز اون زندهِ بونه.» یعقوب و یوحنایِ خواسِّه 35 یعقوب و یوحنا زِبدی یه ریکاشان، عیسی یِه وَرجه بومَن و باگوتَن: «اُسّا، خواهِش کانیم اونچه تی جی خَنیم رِه اَمی وَسین هَکنی!» 36 عیسی اوشانه باَگوته: «چی خَنید شِمِره هَکُنَم؟» 37 اوشان باگوتَن: «اجازِه هَدِه تی جَلالِ دِلِه ایتا تی راسِ دَس و ایتا دیگه تی چَپِ دَسِ وَر بَنیشیم.» 38 عیسی اوشانه باَگوته: «شُما نِدانید چی خَنید. شُما تانید اون پیالِه یه جی که مَن نوشِنَم، بَنوشین؟ وَ غُسلِ تَعمیدی که مَن گیرنَم رِه، بَگیرین؟» 39 باگوتَن: «آرِه، تانیم.» عیسی باَگوته: «اون پیالِه یه جی که مَن نوشِنَم، نوشِنِین و تَعمیدی که مَن گیرنَم رِه، گیرِنید. 40 وَلی می دَس نیِه که باگوُم کی می راسِ دَس و کی می چَپِ دَسِّ ور بَنیشِه. این جاها اوشانِ شیهِ که اوشانه وَسین حاضِر هَبا.» 41 وَختی دَه تا شاگِردِ دیگه این جریانِ جی خَبَردار هَبان، یعقوب و یوحنایِ جی خیلی عَصبانی هَبان. 42 عیسی اوشانه خودشه ور دُخوانِسِّه و باَگوته: «شُما دانید اوشانیکه دیگر قومِشانِ حاکِمان دُخوانِسِّه بونَن، مَردُمِ سَر حُکمرانی کانَن، وَ رَئیسِان اوشانیکه خودِشانِه دَستِ جیر دارَن رِه زور گونَن. 43 وَلی شِیمی میَن اینجور نبو. هر کی خَنِه شِیمی میَن گَت هَبو، بایسّی شِیمی پاکار هَبو. 44 وَ هر کی خَنِه شِیمی میَن اوَّل هَبو، بایسّی هَمِه یه پاکار هَبو. 45 چون حتّی انسانِ ریکا نومَه تا اونه خِدمَت هَکُنَن، بلکه بوما تا خِدمَت هَکونه و خودشه جان خِیلیانِ آزادی یه وَسین فَدا هَکونه.» عیسی کورِ بارتیمائوسِ شَفا دَنه 46 اوشان اَریحایِ شهر دِلِه بومَن. وَختی عیسی خودشه شاگِردان و اِزدِحامِ هَمرَه اَریحایِ جی دِرگا شونه با، ایتا کورِ گدا که اونه اِسم بارتیمائوس با، رایِسَر نیشته با. بارتیمائوس، تیمائوسِ ریکا با. 47 بارتیمائوس وَختی بِشنَوِسِّه عیسی یِه ناصری یِه، داد بَکشیِه و باَگوته: «اِی عیسی، داوودِ پادشاهِ ریکا، مَرِه رَحم هَکُن!» 48 خِیلیان اونه زَمتُل بَزَن گونه بان که ساکِت هَبو، وَلی اون بیشتر داد زنه با که: «اِی داوودِ پادشاهِ ریکا، مَرِه رَحم هَکُن!» 49 عیسی بییَسَه و باَگوته: «اونه دُخوانید.» پَس اون کورِ مَردَای رِه دُخواندَن و اونه باگوتَن: «تی دِل قُرص هَبو! وَرِس که دَرِه تِرِه دُخواندِنِه.» 50 بارتیمائوس خودشه قَوا رهِ ایتا گوشِه تُووادَه بَپِرِسِّه و عیسی یِه ورجه بوما. 51 عیسی اونه جی بَپُرسیِه: «چی خَنی تِرِه هَکُنَم؟» کورِ مَردَای جَواب هَدَه: «اُسّا، خَنَم می چِشم سو دَکِه.» 52 عیسی اونه باَگوته: «بوشو که تی ایمان تِره شَفا هَدَه.» دَرجا اون مَردَای یه چِش سو دَکِته و عیسی یِه دُمّالسَر رادَکِته. |
@ 2024 Korpu Company