اِنجیلِ مَتّی 26 - گیله مازعیسی یه بَکوشتَن توطئِه 1 وَختی عیسی تمام خودشه گَبِ تَمام هَکُردِه، خودشه شاگِردانِ باَگوته: 2 «دانید دو روز دیگه، پِسَخِ عیدِ و انسانِ ریکا رِه تَسلیم کانَن تا مَصلوب هَبو.» 3 پس گَتِه کاهِنان و قومِ مَشایخ، قیافایِ کاخِ دِلِه که کاهِنِ اَعظم با، جَمع هَبان. 4 هَمدیگَرِ هَمرَه نخشه بَکِشییَن که چِطور عیسی رِه کَلَکِ هَمرَه دَسگیر هَکُنَن و بَکوشَن. 5 وَلی گونه بان: «نه عیدِ روزِ میَن، نَکُنِه مَردُم شورِش هَکُنَن.» 6 وَختی عیسی بِیت‌عنیای دِلِه شَمعونِ جُذامی یه سِرِه دَبا، 7 ایتا زِنا ایتا شیشه سُمبُل عَطرِ هَمرَه که خیلی گران با عیسی یه ورجه بوما، اون موقه که اون سُفرِه سَر نیشته با، اون زِنا عَطرِ اونه سَر بَریختِه. 8 شاگِردان وَختی زِنای کارِه بَدییَن، اوشانه غیظ بِیتِه و باگوتَن: 9 «این اِسراف چیه وَسین هیسه؟ اَما تانِسّیم اون عَطرِ خیلی گِران بَروشیم و اونه پولِ نَدارِ شان رِه هَدیم.» 10 عیسی بِفَهمِسِّه و اوشانه باَگوته: «چِرا این زِنارِه رَنجاندِنید؟ اون خُجیرِ كار می وَسین هَکُردِه. 11 نَدارِ شان هَمَش شیمی هَمرَه دَرِن، وَلی مَن هَمَش شیمی هَمرَه دَنییَم. 12 این زِنا عَطر بَریختَن هَمرَه می تَنِ سَر، مَرِه دَفن هَکُردَن وَسین آمادِه هَکُردِه. 13 راس راسی شِمِره گونَم، تمام دُنیایِ دِلِه، هر جا که اِنجیل موعِظِه هَبو، این زِنایِ کار رِه هَم یاد هارنَن و گونَن.» یَهودایِ خیانَت 14 ایما یَهودای اَسخریوطی که ایتا اَزون دَوازدَه شاگرد با، گَتِه کاهِنانِ وَرجِه بَشَه 15 و باَگوته: «مَرِه چی دَنید اَگه عیسی رِه شِمِرِه تَسلیم هَکُنَم؟» پس اوشان سی تا سِكّه نُقرِه اونه هَدَن. 16 اَزون وَخت، یَهودا ایتا فُرصتِ دُمّال دَبا تا عیسی رِه تَسلیم هَکونه. آخَرِین شام 17 اوَّلین روزِعیدِ فَطیرِ، شاگِردان عیسی یه ورجه بومَن و بَپُرسیَن: «کوجه خَنی تی وَسین تَهَیِّه بِینیم تا پِسَخ شامِ رِه اوجِه بُخاری؟» 18 عیسی اوشانه باَگوته اون شَهرِ دِلِه فِلانی ور بیشیِن و اونه باگویید: «اُسّا گونه ”می وَخت بَرِسییَه. خَنَم پِسَخ رَسمِ می شاگِردانِ هَمرَه تی سِرِه یه دِلِه بِجا بیارم.“» 19 شاگِردان هَمونجور که عیسی باگوته با هَکُردَن و پِسَخ رِه تَهَیِّه بَدییَن. 20 وَختی شُو بَرِسییَه، عیسی خودشه دَوازدَه شاگِرد هَمرَه سُفرِه یه سَر بنیشته. 21 شام بُخاردَن موقه عیسی باَگوته: «راس راسی شِمِره گونَم، ایتا اَز شُما مَرِه دُشمَنِ دَس تَسلیم کانه.» 22 شاگِردان خِیلی ناراحَت هَبان و ایتا ایتا عیسی یه جی بَپُرسیَن: «اِی آقا، اون مَن هیسَم؟» 23 عیسی جَواب هَدَه: «اونکه خودشه دَسِّ می هَمرَه کاسِه یه دِلِه هارنِه، همون مَرِه تَسلیم کانه. 24 انسان ریکا هَمونجور که اونه باره بَنویشتِه هَبا، میرنِه، وَلی وای بِحالِ اون کَس که انسانِ ریکارِه دُشمَنِ دَس تَسلیم کانه. اونه رَه بِهتَر با که هیچ وَخت دُنیا نییَنِه با.» 25 ایما یَهودا، اونیکه خَسِّه اونه تَسلیم هَکونه، اونِه جِواب باَگوته: «اُسّا، اون مَن هیسَم؟» عیسی جَواب هَدَه: «تو خودِت اینجور باگوتی!» 26 هَلَه دَبان بُخارَن که عیسی نان بِیته، بَعد از شُکر هَکُردَن پاره هَکُردِه و شاگِردانِ هَدَه و باَگوته: «هَگیرین و بُخارین، این می تَنِ.» 27 ایما پیالِه رِه بِیته و بَعد اَز شُکر هَکُردَن اونِه شاگِردانِ هَدَه و باَگوته: «شُما هَمِه این پیالِه یه جی بَنوشین. 28 این می خونِ، عهدِ خون، که خیلیانِ گُناهان آمُرزشِ وَسین بَریخته بونه. 29 راس راسی شِمِره گونَم مین بَعد دِ مَحصولِ اَنگورِ جی نَنوشِنَم تا اون روزی که شِیمی هَمرَه می پیَره پادشاهِی یه دِلِه اونِه تازِه بَنوشَم.» 30 بعد از اون ایتا سُرود بُخوانِسَّن و زیتونِ كوهِ سَمت رادَکِتَن. 31 ایما عیسی اوشانه باَگوته: «اِمشو شُما هَمه مَرِه تنها نَنین. چونکه زَکَریای پیغمبر کِتابِ دِلِه بَنویشتِهِ هَبا، «”گالِشِ زَنَم و رَمِه گوسِندان پَخش و پَلا بونَن.“ 32 وَلی بَعدِ اینکه زندهِ هَبام، شیمی جی پیشتَر بِه جَلیل شونَم.» 33 پِطرُس عیسی یه جَواب باَگوته: «اَگه هَمه تِره تَنها بَنِن، مَن تِرِه هیچ وَخت تنها نُزارنَم.» 34 عیسی اونه باَگوته: «راس راسی تِره گونَم تو هَمین اِمشو، پِیش اَز تِلایِ دُخوانِسَّن، سه دَفه مَرِه حَشا کانی!» 35 پِطرُس، عیسی رِه باَگوته: «حتّی اَگه لازِم هَبو تی هَمرَه بَمیرم، تِره حَشا نُکانَم.» تمام شاگِردان هَم هَمینِه باگوتَن. عیسی جِتسیمانی یه باغِ دِلِه دُعا کانه 36 ایما عیسی خودشه شاگِردانِ هَمرَه یِجایی که اونِه اِسم جتسیمانی با بَشَه و اوشانه باَگوته: «ایجه بِنیشین تا مَن بوشوم اوجِه دُعا هَکُنَم.» 37 ایما پِطرُس و زِبدی یه دُتا ریکا رِه خودشه هَمرَه بَبِرده، غُصِّه دار و پَریشان هَبا، 38 اوشانه باَگوته: «غُصِّه یه جی دَرَم بَمیرَم. ایجه بُمانید و می هَمرَه بیدار بییَسید.» 39 عیسی یه میثقلی پیشتَر بَشَه و دیمِ هَمرَه زمین سَر بَکِتِه دُعا هَکُردِه: «اِی پیَر، اَگه بونِه این پیالِه رِه می جی دور هَکُن، وَلی نه می خواسِّه یه هَمرَه، بلکه تی خواسِّه هَبو.» 40 ایما خودِشِه شاگردانه ورجه وَگِرِسِّه و بَدییِه اوشان خاتَن. پَس پِطرُسِ باَگوته: «نَتَّنِسّین چَن ساعَت می هَمرَه بیدار بییَسید؟ 41 بیدار بییَسید و دُعا هَکُنید تا ”آزمونِ دِلِه“ دَنِکین. راس راسی روح مشتاقِ، وَلی تَن ناتَوانِ. 42 عیسی یِدَفه دیگه بَشَه و دُعا هَکُردِه: «اِی پیَر، اَگه راهِ دیگَرِی دَنیِه بِجَز اینکه مَن پیالِه رِه بَنوشَم، پَس تی اِرادِه هَبو.» 43 عیسی وَختی دوبارِه وَگرِسِّه، بَدییِه باز هَم اوشان خاتَن، چونکه اوشانه چِشم سَنگین هَبا با. 44 پَس یِدَفِه دیگه اوشانه به حال خودِشان بَنَه و بَشَه، سِوّمین دَفه همون دُعا رِه هَکُردِه. 45 ایما شاگِردانِ ورجه وَگِرِسِّه و اوشانه باَگوته: «هَلَه خاتین واستراحت کانید؟ اَلآن اون ساعَت بَرِسییَه که انسانِ ریکا گُناهکارانِ دَست تَسلیم هَبو. 46 وَرِسین بیشیم. اَلآن اونیکه خَنِه مَرِه تَسلیم هَکونه راه جی رَسِنه.» عیسی دَسگیر هَبوسَّن 47 عیسی هَلَه دَبا گَب زنه با که یَهودا ایتا اَز اون دَوازدَه شاگرد ایتا گته اِزدحام شَمشیر و بال دسّی هَمرَه که گتِه کاهِنان و قوم مَشایخِ طَرَف جی بان، راه جی بَرِسییَن. 48 اونیکه خَسِّه اونه تَسلیم هَکونه خودشه هَمراهانِه علامَت هَدَه و باگوته با: «کَسی رِه که خُش دَنَم، هَمونِه؛ اونه بَگیرین.» 49 یَهودا دَرجا عیسی یِه ورجه بوما و باَگوته: «سَلام، اُسّا!» وَ اونه خُش هَدَه. 50 عیسی یَهودا رِه باَگوته: «اِی رَفیق، تی کارِ اَنجام هَدِه.» ایما اون آدَمان پیش بومَن و عیسی یه سَر بَریختِن و اونه دَسگیر هَکُردَن. 51 همون دَم، ایتا اَز اوشان که عیسیِ یه هَمرَه دَبا خودشه شَمشیرِ بَکِشیِیهَ و ایتا ضَربِه یه هَمرَه کاهِنِ اَعظمِ پاکارِ گوشِ بَبییَه. 52 ایما عیسی اونه باَگوته: «تیِ شَمشیرِ غَلاف هَکُن. هر کی شَمشیر بَکِشِه، شَمشیر هَمرَه کُشتِه بونه. 53 مَگِه نِدانین مَن تانَم می پیَره جی بِخوام که بیشتر اَز دَوازدِه لَشکَر فِرشتِه رِه می کُمَک بَرِسانِه؟ 54 وَلی اگه اینطور هَکُنَم، اونوَخت نِوِشتِه های مُقَدَّسِ پیشگویی چِطور به حقیقَت رَسِنه؟» 55 همون موقه، عیسی جَماعَتِ باَگوته: «مَگِه من راهزَنَم که شَمشیر و بال دَسّی یه هَمرَه می بِیتَنِ وَسین بومَین؟ مَن تمام روز مَعبَدِ دِلِه نیشنِه بام و تعلیم دَنِه بام، مَرِه نِیتین. 56 وَلی این چیزان اتّفاق دَکِته تا پِیغَمبَرِان بَنویشتِه بِه اَنجام بَرِسِه.» ایما تمام شاگِردان اونه تنها بَنَن و دَر بَشَن. 57 اوشان که عیسی رِه بِیته بان، اونه قیافایِ ورجه که کاهِنِ اَعظَم با بَبِردَن. اوجِه توراتِ مُعَلِمین و مَشایخ جَم بان. 58 پِطرُس دورا دور عیسیِ یِه دُمّالسر بَشَه تا کاهِنِ اَعظَمِ سِرِه یه حیاطِ میَن بَرِسییَه. پس دِله بَشَه و نِگَهبانانِ هَمرَه بِنیشتهِ تا بَینهِ سَر آخَر چی بونه. 59 گَتِه کاهِنان و تمام شورا تَقَلّا کانه بان عیسی عَلِیه دُروئی گواهیِ پیدا هَکونَن تا اونه بَکوشَن، 60 هَرچَن خِیلیان بومَن دُروئی گواهی هَدَن، وَلی هیچی عیسی عَلِیه پیدا نَکوردَن. سرآخر دو نَفَر پِیش بومَن 61 باگوتَن: «این مَردَای باگوتِه ”مَن تانَم خُدایِ مَعبَدِ فور بیارَم و سِه روزِ سَر باز هَم اونه بِسازَم» 62 ایما کاهِنِ اَعظَم ورسَه و عیسی یِه جی بَپُرسیِه: «تو هیچی باگوتَن وَسین نِداری؟ این چیِه تی عَلِیه گَواهی دَنِن؟» 63 وَلی عیسی ساكت بُمانسِّه. کاهِنِ اَعظم اونه باَگوته: «تِره بِه خُدای زندهِ قَسَم دَنَم اَمَرِه باگو که تو مَسیحِ موعود، خُدایِ ریکا هیسی؟» 64 عیسی جَواب هَدَه: «تو خودِت اینجور گوُنی! شِمِره گونَم مین بَعد انسانِ ریکا رِه دینین که خُدایِ قادر راسِ دَس نیشتِه و آسِمانِ اَبرِشانِ سَر هَنه.» 65 ایما کاهِنِ اَعظم خودشه پیرَن رِه جِر هَدَه و باَگوته: «کُفر باَگوته! دِ چه اِحتیاجی به گَواه داریم؟ اَسِه که اونِ کُفرِ بِشنوَسّین، 66 شیمی حُکم چیِه؟» اوشان جِواب هَدَن: «اون مَرگِ مُستَحَقِ!» 67 ایما عیسیِ یِه دیمِ سَر فیلی تُووادَن و اونه بَزَن. بعضیان اونه چَک بَزِن، 68 گونه بان: «اِی مسیح، اگه پِیغَمبَرِی غِیبِ جی باگو کی تِرِه بَزَه.» پِطرُس عیسی رِه حَشا کانه 69 وَلی پِطرُس سِرِه یه دِرگا حیاطِ میَن نیشته با که ایتا کُلفَت اونه ورجه بوما و باَگوته: «تو هم عیسی یِه جَلیلِی یه هَمرَه دَبَیی!» 70 وَلی پِطرُس هَمِه یه وَر حَشا هَکوردِه و باَگوته: «نِدانُم چی گونی!» 71 یِکَم بَعد دَرِ ور ایتا کُلفَتِ دیگه اونه بَدییِه و باَگوته: «این مَردَای هَم عیسی یِه ناصِری یه هَمرَه دَبا!» 72 پِطرُس این دَفه هَم حَشا هَکورده و قَسَم بُخاردِه که «مَن این مَردَای رِه نِشناسِنَم.» 73 یِکَم بَعد، اِزدِحامی که ایسَبان پِیش بومَن پِطرُسِ باگوتَن: «شَک نِداریم تو هَم ایتا از اوشانی! تی گَب زَدَنِ جی مَعلومِه جَلیلِی هیسی!» 74 اونوَخت پِطرُس لَعنت هَکُردِنِ شُروع هَکوردِه و قَسَم بُخاردِه باَگوته: «مَن اصلاً این مَردَای رِه نِشناسِنَم!» همون دَم تِلا دُخوانِسِّه. 75 ایما پِطرُس عیسی یِه گَبِ یاد بیاردِه که باگوته با: «پِیش اَز اونکه تِلا دُخوانِه، تو سِه دَفه مَرِه حَشا کانی!» ایما دِرگا بَشَه و زار زار بِرمِه هَکُردِه. |
@ 2024 Korpu Company