اِنجیلِ مَتّی 20 - گیله مازاَنگور باغِ کارگَران 1 «آسِمانِ پادشاهی صاب باغی رِه ماندِنِه که صُبِ سَر سِرِه یه جی دِرگا بَشَه تا خودشه اَنگور باغِ وَسین کارگَر هَگیره. 2 او کارگَرانِ هَمرَه طِی هَکُردِه هَر کُدامِ یه دینار که ایتا روز دَسمُزد با، هَدِه. ایما اوشانه کار هَکُردَن وَسین اَنگور باغِ سَر روانه هَکوردِه. 3 ساعَت نُه صُب دو مَرتِبِه دِرگا بَشَه و بَدییِه چَن نَفَر شَهرِ مِیدانِ سَر بیکار ایسَن. 4 اوشانه باگوتِه: ”شُما هَم بیشین می اَنگور باغِ سَر و هَر چی شیمی حَقِّ شِمِره دَنَم.“ 5 پس اوشان هَم بَشَن. باز هَم ظُهر موقه و حُدودِ ساعت سِه بَعد اَز ظُهر دِرگا بَشَه و اینجور هَکُردِه. 6 بازهَم ساعَت پَنجِ بَعد اَز ظهر دِرگا بَشَه و چَن نَفَرِ بَدییِه بیکار ایسَن، باگوتِه ”چِرا تمام روز ایجه بیکار ایسَین؟“ 7 اوشان جَواب هَدَن: ”هیچکی اَمَرِه كار نَده.“ صاب باغ اوشانه باگوتِه: ”شُما هَم می اَنگور باغِ سَربیشین وکار هَکونید.“ 8 «وَختِ مِهال، صاب باغ خودشه سَرکارگَرِ باگوتِه: کارگرانِ دُخوان اوشانه دَسمُزدِ اوشانه هَدِه، آخَرِ جی شروع هَکُن بیه اَوَّل.“ 9 اوشانیکه ساعَت پَنج بَعد اَز ظُهر خودِشانِ کارِ شروع هَکُردهِ بان هَر کُدام یه دینار بِیتَن. 10 اون کارگَرانی که اَوَّل بوما بان خیال هَکُردَن بیشتر مُزد گیرنَن، وَلی اوشان هَم هَر کُدام یه دینار بِیتَن. 11 وَختی خودِشانِه دَسمُزدِ بِیتَن غُرغُر هکُردَن و صاب باغِ باگوتَن: 12 ”ایشان که سَر آخَر بومَن و یِه ساعَت کار هَکُردَن، اوشانه اَمیِ هَمرَه که تمام روز آفتو زیر جان بَکِّندیم قَدَر دَسمُزد هَدَیی!“ 13 وَلی صاب باغ ایتا اَز اوشان جَواب هَده و باگوته: ”اِی رَفیق، مَن که تِرهِ بَدی نَکُردَم. مَگِه قَبول نَکُردی یه دینار وَسین کار هَکُنی؟ 14 پَس تیِ حَقِ بَگیر و بوشو! می دِل خَنِه این آخرین کارگَر رِه هَم تی مِثان دَسمُزد هَدَم. 15 مَگِه مَن حَق نِدارَم اونجور که می دِل خَنِهِ می مالِ هَمرَه هَکُنَم؟ چِشم نِداری می دَس و دِل بازی رِه بِینی؟“ 16 «آرِه، اینجورِی یه که اوشانیکه آخَرَن، اَوَّل بونَن و اوشانیکه اَوَّلَن، آخَر.» عیسی یه سِوّمین پیشگویی خودشه بَمِردَن و زندهِ هَبوسَّن باره. 17 اورشَلیمِ راهِ دِلِه عیسی خودشه دَوازدَه شاگِردِ کِنار بَکِشیِه و اوشانه باَگوته: 18 «اَما دَرِیم بیشیم اورشَلیم، اوجِه انسانِ ریکا رِه دَسگیر کانَن و مَعبَدِ گَتِه کاهِنان و توراتِ مُعَلِّمینِ دَس دَنِن و اوشان انسانِ ریکا رِه به مرگ مَحکوم کانَن 19 اوشان انسانِ ریکا رِه بُت پَرَسِ قومِ دَس تَحویل دَنِن. اوشان اونِه مسخره کانَن، شَلّاق زَنِن و صَلیب کَشِنَن. وَ اون سِوّمین روزِ دِلِه زندهِ بونه.» ایتا مآره خواسِّه 20 زِبدی یه ریکاشانِ مآر، خودشه دُتا ریکای هَمرَه عیسی یه ورجه بوما، اونه پیش زانو بَزَه و اونه جی بِخَسِّه اونه وَسین یِکاری هَکونه. 21 عیسی اونه باَگوته: «چی خَنیی؟» اوشانه مآر باَگوته: «باگو تی پادشاهِی یه دِله می این دو تا ریکا ایتا تی راسِ دَس و اون یِدانه تی چَپِ دَس بِنیشَن.» 22 عیسی باَگوته: «شُما نِدانین چی خَنید، شما تانید جامی رِه که مَن بِزودی نوشَنَم رِه بَنوشین؟» اوشان جَواب هَدَن: «آرِه، تانیم.» 23 عیسی اوشانه باَگوته: «دُرسِّه شُما می جامِ جی نوشِنِین، وَلی مَن این اِختیارِه نِدارم که باگوُم کی می راسِ دَس و چَپِ دَسه ور نیشِنِه، این جاها اوشانِ شیِه که می آسِمانی پیَر اوشانه وَسین حاضِر هَکُردِه.» 24 وَختی دَه شاگردِ دیگه اینِ بِشنَوِسَّن، اون دُتا اَداشِ سَرغیظ هَکُردَن. 25 وَلی عیسی تمام شاگِردانِ خودشه وَر دُخوانِسِّه و باَگوته: «شُما دانید دیگر قومِشانِ حاکِمان مَردم سَرحُکمرانی کانَن و رَئیسِان اوشانیکه خودِشانِه دَستِ جیر دارَن رِه زور گونَن. 26 وَلی شیمی میَن اینجور نبو. هر کی خَنِهِ شِیمی میَن گَته هَبو، بایسّی شیمی پاکار هَبو. 27 وَ هر کی خَنِهِ شیمی میَن اَوَّل هَبو، بایسّی شیمی پاکار هَبو. 28 حتّی انسانِ ریکا هَم نومَه تا اونه خِدمَت هَکُنَن، بلکه بوما خِدمَت هَکونه و خودشه جان خِیلیانِ نِجاتِ وَسین فَدا هَکونه. عیسی دُتا کورِ شَفا دَنه 29 وَختی عیسی و اونه شاگِردان اَریحایِ شَهرِ جی شونِه بان، اِزدِحامِ زیادی اونه دُمّال رادَکِتَن. 30 راهِ دِلِه دُتا کورِ مَردَای نیشته بان. وَختی بِشنَوِسَّن عیسی اوجِه یه جی رَد بونه، داد بَزَن: «اِی آقا، داوود ریکا، اَمَرِه رَحم هَکُن!» 31 مَردُم اوشانِ زَمتُل بَزَن و بِخَسَّن ساکِت هَبون. وَلی اوشان بیشتر داد زَنه بان که: «اِی آقا، داوود ریکا، اَمَرِه رَحم هَکُن!» 32 عیسی بییَسَه و اون دُتا مَردَای رِه خودشه وَر دُخوانِسِّه و باَگوته: «چی خَنید شِمِرِه هَکُنم؟» 33 اوشان باگوتَن: «اِی آقا، خَنیم اَمیِ چِشم سو دَکِه.» 34 عیسی دِل اوشانه رَه بَسوتِه و خودشه دَسِ اوشانه چِشمِ سَر بَنَه و دَرجا اوشانه چِشم شفا بِیتِه و بَتَّنِسَّن بِینَن. ایما عیسی یِه دُمّالسَر بَشَن. |
@ 2024 Korpu Company