اِنجیلِ مَتّی 15 - گیله مازدِلِ پاکی 1 ایما عُلَمایِ فِرقِه فَریسی و توراتِ مُعَلِمین اورشلیمِ جی عیسیِ یه وَرجه بومَن وباگوتَن: 2 «چِرا تی شاگِردان اَمی مَشایِخِ رَسم و رُسومِ نَدید گیرنَن؟ اوشان پیش از اینکه غَذا بُخارِن خودِشانِه دَسِ نَشورنَن!» 3 عیسی اوشانه جَواب هَدَه: «چِرا شُما خودِتان اینه خاطِری که شیمی رَسم و رُسومِ حِفظ هَکُنید خُدایِ حُکمِ نَدید گیرنید؟ 4 چون خُدا دَستور هَده: ”تی پیر و مارِ اِحتِرامِ بِدار،“ وَ ”هر کی خودشه پیَر و مارِ ناسِزا باگو، حتماً بایسّی بَکوشتِه هَبو.“ 5 وَلی شُما گونین اَگه کَسی خودشه پیر و مارِ باگو: ”کُمَکی که خسَّم شِمِره هَکُنَم خُدای کارِ وَسین وَقف هَکُردَم،“ 6 در این صورَت، دِ اونه واجِب نیِه خودشه پیَرِ کُمَک هَکونه. اینجوری شُما خُدایِ کَلامِ شیمی رَسم و رُسومِ هَمرَه نَدید بِیتین. 7 اِی دورویان! اِشعیا یه پیغمبر چقدر خوُب شیمی باره پیشگویی هَکُردِه، اونموقِه که باَگوته: 8 «”این قوم خودِشانِ زِبانه هَمرَه مَرِه حُرمَت نَنِن، وَلی اوشانه دِل می جی دورِ. 9 اوشان بیخُدی مَرِه پَرَسِش کانَن و اوشانه تَعلیم فقط آدَمی یه حُکمِ“» چی آدَمی رِه نَجِس کانه 10 ایما عیسی مَردُمِ خودشه وَر دُخوانِسِّه و باَگوته: «می گَبِ گوش هَدین و بِفَهمین. 11 اونچه که آدَم دَهنِ جی جیر شونِه اونه نَجِس نُکانه، بلکه اونچه آدَم دَهنِ جی دِرگا هَنه، اونِه کِه آدَمی رِه نَجِس کانِه.» 12 ایما شاگِردان عیسی یِه وَرجه بومَن و باگوتَن: «دانی فَریسیان وَختی تی این گَبِ بِشنَوِسَّن ناراحت هَبان؟» 13 عیسی جَواب هَدَه: «هر نَهالی که می آسِمانی پیَر نِکاشتِ بو، بَنِه یه جی بَکِّندِه بونه. 14 اوشانِ کار نِدارین. اوشان رابَلَدانی هیسَن که خودشان کورَن. وَ اگه ایتا کور ایتا کورِ دیگرِ عَصاکَش هَبو، هَر دُتاشان چاهِ دِلِه دَکِنَن.» 15 پِطرُس اونه باَگوته: «این مَثَلِ اَمرِه توضی هَدِه.» 16 عیسی جَواب هَدَه: «شُما هَم هَلَه دَرک نُکانید؟ 17 مَگِه نِدانین هَر چی آدَم دَهِنِ جی جیر شونه اونه شِکَمِ دِلِه شونِه و دَفع بونه؟ 18 وَلی اونچه که دَهنِ جی دِرگا هَنه، دِلِ جی سَرچِشمِه گیرنِه و این اونیِه که آدَمی رِه نَجِس کانِه. 19 چون دِل جی یه که پَلیدِ خیال، قَتل، زَنا، فاسِقی، دُزّی، دِروئی شَهادت و تُهمَت، سَرچِشمِه گیرنِه. 20 ایشان آدَمی رِه نَجِس کانَن، وَلی نَشوردِه دَسِ هَمرَه غَذا بُخاردَن هیچکَسِ نَجِس نُکانه!» ایتا کَنعانی زِنایِ ایمان 21 عیسی اوجِه رِه تَرک هَکوردِه و صور و صیدونِ منطقه یه دِلِه بَشَه. 22 ایتا کَنعانی زِنا که اون منطقه یه دِلِه زندگی کانِبا، عیسیِ یه وَرجه بوما و دادِ همرَه باَگوته: «اِی آقا، اِی داوود ریکا، مَرِه رَحم هَکُن! می کیجا بَدجور آلبَزِه هَبا.» 23 وَلی عیسی هیچ جِوابی نَدَه، تا اینکه شاگِردان پیش بومَن و عیسی یِه جی خواهِش هَکُردَن، باگوتَن: «اونه مُرخَص هَکُن بوشو، چون دَرِه شولِ شیوَنِ هَمرَه اَمیی دُمّالسَر هَنِه.» 24 عیسی باَگوته: «مَن فَقَط اِسراییلِ قومِ گُم هَبوسِّه گُوسَندِشانِ وَسین روانه هَبام.» 25 وَلی اون زِنا پیش بوما و عیسی یِه لِنگِ وَر زانو بَزَه و باَگوته: «اِی آقا، مَرِه کُمَک هَکُن!» 26 عیسی جَواب هَدَه: «دُرُس نیِه وَچِه هان نانِ اوشانِ دَسِ جی هَگیریم و سَگِشانِ پیش تُووادَم.» 27 وَلی اون زِنا باَگوته: «دُرِسِّ آقا، وَلی حتّی سَگِشان هَم نان تیکِه ایی که خودِشانِه اَرباب سُفرِه یه جی کَلنِه رِه، خارنَن!» 28 ایما عیسی باَگوته: «اِی زَن، تی ایمان خِیلی زیادِه! تی خواسِّه بَرآوَرده بونه!» همون دَم اونه کیجا شَفا بِیته. عیسی خِیلیان رِه شَفا دَنه 29 عیسی اوجِه یه جی رادَکِته و جَلیلِ دَریایِ ور بوما. اوجِه ایتا کوتی یه سَر بَشَه و بنیشتهِ. 30 ازدِحامِ زیادی عیسی یِه وَر بومَن و خودِشانِه هَمرَه شَلان، کوران، چُلاقان و لالِشان و خِیلی مَریضانِ دیگر رِه هَم بیاردِن عیسی یه لِنگِ پیش بَنَن و اون اوشانه شَفا هَدَه. 31 مَردُم وَختی بَدییَن لالِشان گَب زَنَن، چُلاقان خُجیر هَبان، شَلان راه شونِن و کوران دینَن، بُهت هَکُردَن و اِسراییلِ خُدا رِه حَمد باگوتَن. عیسی چهار هِزار تَنِ غذا دَنه 32 عیسی شاگِردانِ خودشه وَر دُخوانِسِّه و باَگوته: «می دِل این مَردُمِ رَه سوزِنِه. اَلآن سِه روزِ می هَمرَه دَرِن و دِ هیچی بُخاردَنِ وَسین نِدارَن. نَخَنَم اوشانه وَشنا راهی هَکُنَم، چون اِمکان داره راه دِلِه ضَعف هَکُنَن.» 33 شاگِردان باگوتَن: «کوجه یه جی تانیم این صَحرایِ دِلِه این گَتِه اِزدِحامِ وَسین نان تهیِّه هَکُنیم؟» 34 عیسی باَگوته: «چَن تا نان دارید؟» جَواب هَدَن: «هفت تا نان و چَن تا کوچِ ماهی.» 35 عیسی مَردُمِ باَگوته زِمین سَر بِنیشَن. 36 ایما هَفت تا نان و چَن تا ماهی رِه بِیته و بَعدِ شُکر هَکُردَن اوشانِ تیکه هَکُردِه و خودشه شاگِردانِ هَدَه و شاگِردان هَم اوشانِ اِزدِحامِ هَدَن. 37 هَمِه بُخاردَن و سیر هَبان، اونه شاگِردان هَفتا زَمّیلِ پُر، نان تیکِه جَمع هَکُردَن. 38 اوشانیکه اوجِه غَذا بُخاردَن، بِجُز زِناکان و وَچِه هان، چهار هِزار تا مَرد بان. 39 بَعدِ اینکه عیسی مَردُمِ مُرخَص هَکُردِه، لوتکا رِه سَوار هَبا و مَجَدانِ منطقه بَشَه. |
@ 2024 Korpu Company