اِنجیلِ مَتّی 10 - گیله مازدَوازدَه رَسول 1 عیسی خودِشه دَوازدِه شاگِردِ خودشه وَر دُخوانِسِّه و اوشانه اِقتدار هَدَه تا پَلیدِ اَرواح رِه دِرگا هَکُنَن و هر نوع ناخُشی و مَرَض رِه شَفا هَدَن. 2 این اون دَوازدَه رَسولِ اِسمِ: اوَّل شَمعون که اونه پِطرُس هم گونه بان و اونه اَداش آندریاس، یَعقوب زِبِدی ریکا و اونه اَداش یوحَنا، 3 فیلیپُس و بَرتولما، توما و مَتّی یه خَراجگیر، یَعقوب حَلفایِ ریکا و تَدّای، 4 شَمعونِ وَطَن پَرَست و یَهودای اَسخَریوطی که عیسی رِه دُشمَن دَس تَسلیم هَکوردِه. عیسی دَوازدَه رَسولِ رَوانه کانه 5 عیسی این دَوازدِه شاگِردِ رَوانه هَکورده و اوشانه باَگوته: «غیرِ یَهودیانِ مِلکِ دِلِه نیشین و سامریانِ هیچکدام از شَهرانِ دِلِه شیمی لِنگ نَنین. 6 بلکه اِسراییلِ قومِ گُم هَبوسِّه گُوسِندِشانِ وَر بیشیِن. 7 وقتیکه شونید جار بَزِنین و باگُویید، آسِمانِ پادشاهی که خُدا اونه حاکِمِ نَزّیکِه. 8 مَریضان رِه شَفا هَدین، مُردِگان رِه زندهِ هَکُنید، جُذامیان رِه شفا هَدین وآلِشانه درگا هَکُنید. مُفت هَیتین، مُفت هَم هَدین. 9 هیچ طَلا و نُقرِه و مِرس شیمی غِیشِشانِ دِلِه شیمی هَمرَه نَبِرین. 10 و سفر وَسین، بُقچه یا اِضافهِ پیرَن و چَمیش و بال دسّی نگیرین؛ چون كارگَر مُستَحَقِ خودشه مُزدِ. 11 هر شَهر و دِهی که دِلِه شونِید، ایتا لایِقِ آدَمِ واموجین و تا وَختی که اوجِه دَرین اونه سِرِه یه دِلِه بییَسید. 12 وَختی ایتا سِرِه یه دِلِه شونِید ”سَلام هَکُنید.“ 13 اَگه اون سِرِه لایِق هَبو، شِیمی سَلام اونه سَر ماندِنه، وَلی اَگه لایق نبو، شیمی سَلام شِمِره وَگِردنِه. 14 اَگه هر کی شِمِره قَبول نَکُردِه و اونچِه که گونید رِه گوش نَدَه، وَختی که اون سِرِه یا اون شَهر جی شونید، شیمی لِنگِ خاک بِتِکانید. 15 راس راسی شِمِره گونَم، قیامتِ روز، مجازاتِ تحمل سُدوم وغُمورَّه یه شَهرِ وَسین آسانتَرِ تا اون شهر وَسین. ظُلم و سِتَم هَنه 16 «مَن شِمِره گُوسَندِشانِ مِثان، وِرکِشانِ دِلِه روانه کانَم. پس مارِ مِثان با هوش و کَفتر مِثان بی آزار هَبین. 17 شیمی حواس به مَردُمِ هَبو، چونکه اوشان شِمِره مَحکَمِه یه تَحویل دَنِن و شِمِره خودِشانِه عِبادتگاه دِلِه شَلّاق زَنِن. 18 شِمِره می خاطِری فرمانداران و پادِشاهانِ وَرجه بَرنِن تا اوشان و غیرِ یَهودیِانِ وَرجه گَواهی هَدین. 19 وَختی شِمِره دَسگیر کانَن، نِگَران نَبین که چی و چِطور باگویین. چون اون موقه اونچه بایسّی باگویین شِمِره هَدَه بونه. 20 چون اونیکه گَب زَنه شُما نیَین، بلکه شیمی آسِمانی پیَره روحِ که شیمی زبان هَمرَه گَب زَنه. 21 «اَداش، اَداشِ و پیَر، وَچِه رِه مَرگِ تَسلیم کانه. وَچِه شان خودِشانِه پیَر و مآر عَلِیه وَرِسِنَن و اوشانه مَرگِ تَسلیم کانَن. 22 تمام مَردُم می اِسمِ خاطِری شیمی جی بیزار بونَن. وَلی هَر کَس تا آخَر دَوام بیارِه و بُمانه، نِجات گیرنِه. 23 هَر وَخت شِمِره ایتا شَهرِ دِلِه ظُلم بَرِساندِن ایتا شَهر دیگه دَر بیشین. چون راس راسی شِمِره گونَم، پیش اَز اینکه اِسراییلِ تمام شَهرانِ بیشین، انسانِ ریکا هَنه. 24 «شاگِرد خودشه مُعَلِّمِ جی سَرتَر نیِه و پاکار خودشه اَرباب جی سَرتر نیِه. 25 شاگِرد خودشه مُعَلِّمِ مِثان هَبو اونه بَسِه و پاکار خودشه اَرباب مِثان. اَگه سِرِه اَرباب رِه بِعِلزِبول، که اِبلیسِ دُخواندَن، اونِ اهل سِرِه رِه چی دُخواندِنِن؟ نَتِرسین 26 «پَس اوشانه جی نَتِرسین. هیچ قایِم هَکورده ایی دَنییِه که بَرملا نَبو و هیچ جا هَدَه ایی دَنییِه که مَعلوم نَبو. 27 اونچه رِه مَن ظُلَماتِ دِلِه شِمِره باگوتَم، روشنایی یه دِلِه باگوئید و اونچه رِه که دَرِگوشی شِمِره باگوته هَبا، سِرِه یه بامِ سَر جار بَزِنین. 28 اوشانِ جی که تَنِ کُشِنِن وَلی نتَّنَن روح رِه بَکوشَن، نَتِرسین. اونه جی بَتَرسین که تانه هَم تَن وهَم روح رِه، جَهَنَمِ دِلِه هَلاک هَکونه. 29 مَگِه دُتا مَلیجَی یِشاهی بَروتِ نَبونِه؟ با این وجود، بی اِجازه شیمی آسِمانی پیَر حَتّی ایتا اَز اوشان زَمینِ سَرنَکَّنِه. 30 حتّی تمام شیمی سَرِ مو بِشمارِسِّه هیسِه. 31 پَس نَتِرسین؛ شیمی ارزش هزاران مَلیجی یه جی بیشتَرِه. 32 «پَس هر کی مَردُم وَرجه مَرِه موقور بییِه، من هَم می آسِمانی پیَره وَرجه اونه موقور هَنَم. 33 وَلی هر کی مَردُمِ وَرجه مَرِه حَشا هَکونه، مَنَم می آسِمانی پیَرهِ وَرجه اونه حَشا کانَم. آشتی نه شَمشیر 34 «گُمان نَکُنید بومَم تا آشتی زَمینِ سَر بیارِم. نومَم آشتی بیارِم، بلکه بومَم تا شَمشیر بیارِم! 35 مَن بَموئَم تا: «”ریکا و پیَره میَن، کیجا و مآر، عروس و شو مآره میَن جدایی تُووادَم. 36 هَر کَسِ دُشمَنان، خودشه اَهلِ سِرِه بونِه.“ 37 «هر کی خودشه پیَر و مارِ می جی بیشتر دوس بِدارِه، می لایِق نیِه و هَر کی خودشه کیجا یا ریکا رِه می جی بیشتر دوس بِدارِه، می لایِق نیِه. 38 هر کی خودشه صَلیبِ نِگیرِه ومی دُمّال نییِه، می لایِق نیِه. 39 هَر کی بخواد خودِشِه زندگی رِه حِفظ هَکونه اونِه اَز دَس دَنه؛ وَلی هَر کی می خاطِری خودشه زندگی رِه اَز دَس هَدِه، اونه زندگی دَر اَمان ماندِنه. 40 «هر کی شِمِره قَبول هَکونه، مَرِه قَبول هَکُردِه و هر کی مَرِه قَبول هَکونه، می بَرِساندِه رِه قَبول هَکُردِه. 41 هَر کی پِیغَمبَرِ اینه وَسین که پِیغَمبَر هیسه قَبول هَکونه، ایتا پِیغَمبَرِ اَجرِ گیرنه ولی هَر کی ایتا صالح آدَم رِه اینه وَسین که صالح هیسه قَبول هَکونه، ایتا صالحِ اَجرِ گیرنِه. 42 وَ هر کی ایتا اَزین کوچِکانِ اینه وَسین که می شاگِردِ حَتّی ایتا پیالِه سَردِ اُو هَدِه، بِه هیچ وَجه بی اَجر نُماندِنِه.» |
@ 2024 Korpu Company