اِنجیلِ مَتّی 1 - گیله ماز

عیسی مَسیح شَجَرِه نامه

¹ عیسی یه مَسیح شَجَرِه نامه داوود پادشاه نسلِ جی و ابراهیم پیغمبرِ نَسلِ جی:

² ابراهیم، اِسحاقِ پیَر با، اِسحاق، یعقوبِ پیَر، و یعقوب، یَهودا و اونه اَداشانِ پیَر با.

³ یَهودا، فِرِص و زِراحِ پیَر و اوشانه مآر تامار با. فِرِص، حِصرونِ پیَر، و حِصرون، رامِ پیَربا.

⁴ رام، عَمینادابِ پیَر، و عَمیناداب، نَحشونِ پیَر، و نَحشون، سَلمونِ پیَربا.

⁵ سَلمون، بوعَزِ پیَر و اونه مآر راحاب با، بوعَز، عوبِیدِ پیَر و اونه مآر روت با. عوبِید، یَسا یه پیَر،

⁶ و یَسا، داوودِ پادشاهِ پیَر با. وداوود، سُلِیمان پیَر، اوریا یِه زِنایِ جی با.

⁷ سُلیمان، رِحُبعامِ پیَر، رِحُبعام، اَبیّا یِه پیَر، و اَبیّا، آسا یه پیَربا.

⁸ آسا، یَهوشافاطِ پیَر، یَهوشافاط، یورامِ پیَر، و یورام، عُزیا یِه پیَربا.

⁹ عُزیا، یوتامِ پیَر، یوتام، آحازِ پیَر، و آحاز، حِزِقیا یِه پیَربا.

¹⁰ حِزِقیا، مَنَسی یه پیَر، مَنَسی، آمونِ پیَر، و آمون، یوشیا یِه پیَربا.

¹¹ یوشیا، یِکُنیا و اونه اَداشانِ پیَر با. این دورِه یَهودیِان به بابِل تَبعید هَبان.

¹² بَعدِ اینکه یَهودیِان به بابِل تَبعید هَبان: یِكُنیا، شِئَلتیئیل پیَربا، و شِئَلتیئیل، زِروبابِلِ پیَربا.

¹³ زِروبابِل، اَبیهودِ پیَر، اَبیهود، اِلیاقیمِ پیر، و اِلیاقیم، عازورِ پیَربا.

¹⁴ عازور، صادوقِ پیَر، صادوق، اَخیم پیَر، و اَخیم، اِلیودِ پیَربا.

¹⁵ اِلیود، اِلعازارِ پیَر، اِلعازار، مَتّانِ پیَر، و مَتّان، یَعقوبِ پیَربا.

¹⁶ یَعقوب، یوسِفِ پیَر و یوسِف، مَریَمِ شوُ با، مریم عیسی یه مُلَقَّب به مَسیح رِه دُنیا بیاردِه.

¹⁷ پس تمام نَسلِشان، ابراهیم جی تا داوود چهاردَه نسل و داوود جی تا یَهودیِانِ تَبعید به بابِل چهاردَه نسل و تَبعیدِ دورِه تا عیسی یه مَسیح چهاردَه نسل با.

عیسی یه دنیا بَموئَن

¹⁸ عیسی یه مَسیح دنیا بَموئَن اینجور با: مریم، عیسی مآر، یوسِفِ نامزد با. ولی پیش از اینکه خودِشهِ شویه سِرِه بوشو، معلوم هَبا که مریم روح القُدُسِ جی شِکَمدار هیسِه.

¹⁹ اوجه یه جی که یوسِف صالح مَردای با و نَخَسِّه مریم رِه مَردُمِ وَرجه رُسوا هَکونه، تصمیم بِیته یَواشَکی اونه جی سیفا هَبو.

²⁰ یوسِف هَلَه این فِکرِ میَن دَبا که خُداوَندِ ایتا از فِرِشتِگان خوابِ میَن اونه ظاهِر هَبا و باگوته: «اِی یوسِف داوود ریکا، اینه جی نَتِرس که مریمِ رِه تیِ زِنا هَکُنی، چون اونچه که اونه شیکَمِ میَن دَرِه روح القُدُسِ جی هیسه، همون خُدایِ روح.

²¹ اون ایتا ریکا زانه و تو اونه اسمِ عیسی نَنی، چونکه اون خودشه قومِ اوشانه گُناهانِ جی نِجات دَنه.»

²² تمام ایشان اتّفاق دَکِته تا اونچه که خداوند اِشعیایِ پِیغَمبِر زبانِ جی باگوته با به اَنجام بَرِسِه که:

²³ «ایتا اَذَب کیجا شِکَمدار بونه، ایتا ریکا زانِه که اونه عِمانوئیل گونَن،» که اونه مَعنی خُدا اَمیِ هَمرَه هیسه.

²⁴ یوسِف خوابِ جی بیدار هَبا و هَمونجورکه خُداوَندِ فِرِشتِه اونه دَستورهَدَه با هَکُردِه و مریم رِه به زِنی بِیته.

²⁵ وَلی تا وَختی مریم خودشه ریکارِه به دُنیا نیاردِه، اونه هَمرَه همبَستَر نَبا و وَچِه یه اِسمِ عیسی بَنَه.