لوقا 9 - گیله مازعیسی دوازدَه رَسولِ روانه کانه 1 عیسی اون دَوازدَه رَسولِ خودشه دُور جَم هَکُردِه و اوشانه قُوَّت و اِقتدار هَدَه تا تمام آلِشان رِه دِرگا هَکُنَن و مَریضیها رِه شَفا هَدِن؛ 2 وَ اوشانه روانه هَکوردِه تا خُدایِ پادشاهی یِه خَبَرِ خُوشِ اِعلام هَکُنَن و مَریضانِ شَفا هَدَن. 3 اوشانه باگوته: «سَفَرِ وَسین هیچ چی نَگیرین، نه بال دَسِّی، نه بُقچه، نه نان و نه پول و نه اِضافِه پیرَن. 4 هَر سِرِه یه دِلِه که بَشَین، تا وَختی اون مُحَلِ جی نَشَین، اون سِرِه یه دِلِه بُمانید. 5 اَگه مَردُم شِمِره تَن نِیتَن، وَختی اوشانِ شَهرِ جی شونید، شیمی لِنگِ خاکِ بِتِکانین تا ایتا گَواهی اوشانه علیه هَبو.» 6 رَسولان را دَکِتَن و ایتا آبادی یه جی ایتا دیگه آبادی شونه بان و هر جا رَسِنه بان، خُدایِ پادشاهِی یه خَبَرِ خُوشِ اِعلام کانه بان و مَریضانِ شَفا دَنِه بان. 7 تمام این جَریانانِ خَبِر هیرودیسِ پادشاهِ گوش بَرِسییَه. هیرودیس حِیران و سَرگَردان هَبا با، چونکه بَعضیان گونه بان عیسی همون یَحیی یه که مُردِگانِ جی وَرِسَه. 8 بَعضی دیگر گونهِ بان ایلیا یه پیغمبر ظهور هَکُردِه، بَعضیان هَم گونه بان ایتا از قَدیمی پِیغَمبَران زندهِ هَبا. 9 ولی هیرودیس باگوته: «مَن یَحیی یه کَلِّه رِه اونه تَنِ جی سیفا هَکُردَم. پَس این کیِه که مَن این چیزان رِه اونه بارِه اِشنَوِنَم؟» وَ تَقَلّا کانِبا عیسی رِه بِینِه. عیسی پَنج هزار نَفَرِ غَذا دَنه 10 وَختی رَسولان وَگَرِسَّن، هَر چی هَکُردهِ بان رِه عیسی یه وَسین تعریف هَکُردَن. ایما اوشان رِه خودشه هَمرَه بِه شَهرِ بِیت صِیدا بَبِرده تا اوجِه تَنها هَبون. 11 وَختی جَماعت اینه بِفَهمِسَّن عیسی یه دُمّال رادَکِتَن. عیسی هم اوشانه قَبول هَکُردِه و اوشانه هَمرَه خُدایِ پادشاهِی یه باره گَب بَزَه و اوشانیکه نیاز به شَفا داشتِن رِه شَفا هَدَه. 12 وَختِ مِهال سَر، دَوازدَه رَسول عیسی یه وَرجه بومَن و باگوتَن: «جَماعَتِ مُرخَص هَکُن تا به دِهات و این دور و وَر زَمینِانِ سَر بوشون و غَذا و سَر پَناه پیدا هَکُنَن، چون ایجه ایتاَ دُور افتادِه جائِه.» 13 عیسی اوشانه جَوابِ باگوته: شُما خودِتان اوشانه غَذا هَدین.» اوشان باگوتَن: «اَما بِجُز پَنج تا نان و دُتا ماهی هیچی نِداریم، مَگِه اینکه بیشیم و تمام این مَردُم وَسین غَذا بَهینیم.» 14 اوجِه حدودِ پَنج هزارتا مَرد دَبان. عیسی خودشه شاگردانِ باگوته: «مَردُمِ پَنجاه تا پَنجاه تا تَخسیم هَکُنید و بِنیشانین.» 15 شاگِردان هَم هَمونجور هَکُردَن و هَمِه رِه بِنیشاندِن. 16 ایما عیسی پَنج تا نان و دُتا ماهی رِه بِیته، آسِمانِ بِیشییَه وشُکر هَکُردِه، اون نانِ شانه تیکِّه هَکوردِه و خودشه شاگِردانِ هَدَه تا مَردُمِ پِیش بَنَن. 17 هَمِه بُخاردَن و سیر هَبان و دَوازدَه تا زَمّیل اون تیکِه هایی جی که بُمانِسّه با رِه جَمع هَکُردَن. پِطرُسِ اِعتراف 18 ایتا روز عیسی خَلوتِ دِلِه دُعا کانِبا، و فقط اونه شاگِردان اونه هَمرَه دَبان. عیسی اوشانه جی بَپُرسییَه: «مَردم گونَن مَن کییَم؟» 19 شاگِردان جَواب هَدَن: «بَعضیان گونَن یحیی یه تَعمید دَهَندِه ایی، بَعضی دیگر گونَن اِیلیایی، وَ بَعضیان هَم تِرِه ایتا از قَدیمی پِیغَمبَرِان دانَن که زندِه هَبا.» 20 عیسی اوشانه جی بَپُرسیِه: «شُما چی؟ شِیمی نَظَر مَن کییَم؟» پِطرُس جَواب هَدَه: «تو مَسیحِ موعودِ خُدایی.» عیسی یه اوَّلین پیشگویی خودشه بَمِردَن باره 21 ایما عیسی اوشانه قَدغَن هَکُردِه و دَستور هَدَه اینه هیچ کَسِ نَگُون. 22 وَ باگوته: «انسانِ ریکا بایسّی خِیلی رَنج بَکِشِه و یَهودیِانِ گَتِه و مَعبَدِ گَتِه کاهِنان و تورات مُعَلِمین اونه رَد هَکُنَن و بَکوشَن و سِوّمین روز دِلِه زندهِ هَبو.» 23 ایما هَمِه رِه باگوته: «اَگه كَسی خَنِه می دُمّال بیه، بایسّی خودشه جی بِگذَرِه، هر روز خودشه صَلیبِ دوش هَگیره و می دُمّال بیه. 24 چون هر کی بِخواد خودشه جان نِجات هَدِه، اونِه از دَس دَنه، وَلی هر که خودِشه جان می خاطِری از دَس هَدِه، اونِه نِجات دَنِه. 25 آدَمی یه وَسین چه فایدِه دارِه كه تمام دُنیا رِه بِدَس بیارِه، وَلی خودشه جان از دَس هَدِه یا اونِه تَلَف هَکونه؟ 26 چون هر کی می جی و می گَبِ جی عار بِدارِه، انسانِ ریکا وَختی خودشه جَلال و خودشه پیَره جَلالِ دِلِه مُقَدَّسِ فِرشتِگانِ هَمرَه بیه، اونه جی عار دارِه. 27 راس راسی شِمِره گونَم، بَعضیان ایجه هیسَن تا خُدایِ پادشاهِی رِه نِینَن، نَمیرنَن.» عیسی یه دیم دِگرگون بونه 28 حُدوداً هَشت روز بعد از این گَب عیسی، پِطرُس، یوحَنا و یَعقوبِ بِیته و ایتا کوهِ سَر بَشَه تا دُعا هَکونه. 29 همون موقه که دُعا کانِبا، اونه دیمِ وَضع وَگَرِسِّه و اونه لِواس اِسبی و نورانی هَبا. 30 یِدَفِه دُتا مَردِای، موسی و ایلیا یه پیغمبر ظاهِر هَبان اونه هَمرَه گَب بَزَن. 31 اوشان باشکوه و نورانی ظاهِر هَبان و عیسی یه هَمرَه اونه بَمِردَن باره كه بایسّی اورشلیمِ دِلِه اتّفاق دَکِه گَب بَزَن. 32 پِطرُس و اونه هَمراهان خواب بَشَه بان، وَلی وَختی بیدار هَبان، عیسیِ جَلال و اون دُتا مَردِکانی که اونه وَر ایسَبان رِه بَدییَن. 33 وَختی اون دو نَفَر عیسی یه وَرِ جی شونه بان، پِطرُس عیسیِ رِه باگوته: «اُسّا، چَنِّی خُبِ اَما ایجه دَریم! بَنی سه تا سایِبان بِسازیم، ایتا تِرِه، ایتا موسایه وَسین، ایتا دیگه هَم ایلیایه وَسین.» اون نِدانِسِّه که دَرِه چی گونه. 34 پِطرُسِ گَب هَلَه تَمام نَبا با كه ایتا اَبر بوما و اوشانه سَر سایه تووادَه وَختی اَبر اوشانه دُورِه بِیته شاگِردان بَتِرسییَن. 35 اونوَخت اَبرِ جی ایتا صِدا در بوما که: «این می ریکائِه که اونه اِنتخاب هَکُردَم، اونه گَبِ گوش هَدین.» 36 وَختی صِدا قَطع هَبا، عیسی رِه تَنها بَدییَن. شاگِردان اون موقه اونچه جی که بَدیه بان، هیچکسِ هیچی نُگُوتَن. شَفایِ ایتا آلبَزِه ریکا 37 فَردَئی، وَختی عیسی کوهِ جی جیر بومَه، جَماعَتِ زیادی اونه بَدییَنِ وَسین بومَن. 38 یِدَفِه ایتا مَردای ازدِحامِ دِلِه داد بَزَه «اُسّا، تی جی اِلتِماس کانَم می ریکا که می تَنها وَچِه هیسه رِه بِیِشی و کُمَک هَکُنی. 39 یِدَفِه روح اونه گیرنِه و اون دَرجا نَعرِه کَشِنِه وپَرکَنِش گیرنه، اونجور که اونه دَهِن کَف کانه اونه تَن لَرزِه دَکِنِه و سَختی یه هَمرَه اونه وِل کانه. 40 تی شاگِردانِ جی اِلتِماس هَکُردَم اونه دِرگا هَکُنَن، وَلی نَتَّنِسَّن.» 41 عیسی جَواب هَدَه: «اِی منحرف و بی ایمانِ نَسل، تا كِی شِیمی هَمرَه دَبوم و شِمِره تَحَمِل هَکُنَم؟ تی ریکا رِه ایجه بیار.» 42 همون موقه که ریکا عیسی یِه وَر هَنِبا، آل اونه زمین بَزَه و اون پَرکَنِش بِیتِه. وَلی عیسی آلِ زَمتُل بَزَه و ریکارِه شَفا هَدَه و اونه پیَرِه دَس بِسپارِسِّه. 43 تمام مَردُم خُدایِ بُزِرگی یه جی حِیرَت هَکُردَن. وَلی هَمونجور که هَمِه عیسی یه کارانِ جی هاج و واج بُمانِسّه بان، اون خودشه شاگِردانِ باگوته: عیسی یه دُوّمین پیشگویی خودشه بَمِردَن بارِه 44 «اونچه که خَنِم شِمِره باگوم خوُب شیمی خاطِر بِسپارین: انسانِ ریکا مَردُمِ دَس تَسلیم بونه.» 45 وَلی اوشان اونه مَنظورِ نِفَهمِسَّن، چونکه اوشانه جی مَخفی بُمانِسِّه با تا نِفَهمَن. وَ تَرسِنه بان اینِ باره هَم اونه جی سوال هَکُنَن. کی هَمِه جی گَتِ تَرَه؟ 46 ایتا روز شاگِردانِ میَن بَحث هَبا که اوشانه دِلِه کی هَمِه یه جی گَتِ تَرِه. 47 عیسی اونچه یه جی که اوشانه دِلِ مین دَبا خَبِر داشتِه ایتا کوچِ وَچِه رِه بِیته و خودشه وَر بَنَه، 48 و اوشانه باگوته: «هر کی این وَچِه رِه می اسمِ خاطِری قَبول هَکونه، مَرِه قَبول هَکُردِه، وَ هر که مَرِه قبول هَکونه، اونیکِه مَرِه روانه هَکوردِه رِه قَبول هَکُردِه. چون شِیمی میَن اونی گَتِ تَرِه که هَمِه یه جی کوچِکتَر هَبو.» هر کی شیمی علیه نَبوُ شِیمی هَمرَئِه 49 یوحَنا باگوته: «اِی اُسّا، یِنَفَرِ بَدییَیم که تی اسمِ هَمرَه آل دِرگا کانِبا، وَلی چونکه اَمی جی نَبا، اونه جُلوهِ بِیتیم.» 50 وَلی عیسی اونه باگوته: «اونه جُلوهِ نِگیرین، چونکه هَر کی شیمی علیه نَبو، شِیمی هَمرَئِه.» عیسی رِه رَد کانَن 51 وَختی اون روزا بَرِسییَه که قَرار با عیسی به آسِمان وَگِرده، او مُصَمَم با که بوشو اورشلیم. 52 اون قَبل ازاینکه بوشو چَن نَفَرِ روانه هَکوردِه تا ایتا از سامریِانِ آبادی یه دِلِه بوشون و یِجارِه اونه وَسین تَدارک بِینَن. 53 وَلی اوجِه یِه مَردُم اونه قَبول نَکُردِن، چون دَبا بوشو اورشَلیم. 54 وَختی اونه شاگِردان، یَعقوب و یوحَنا، اینه بَدییَن، عیسی رِه باگوتَن: «اِی آقا، خَنیی باگوییم آسِمانِ جی تَش بِبارِه و تمام اوشانه هَلاک هَکونه؟» 55 وَلی عیسی وَگِرِسِّه و اوشانه زَمتُل بَزَه و باگوته: «شُما نِدانین کُدام روحِ جی هیسین! 56 چونکه انسانِ ریکا نومَه تا مَردُم جان هَلاک هَکونه بلکه بوما تا اونه نِجات هَدِه.» ایما عیسی و اونه شاگِردان ایتا دیگه آبادی بَشَن. عیسی یه دُمّالرَویی بها 57 راهِ دِلِه یِنَفَر عیسی رِه باگوته: «هَر جا بیشی تی دُمّال هَنَم.» 58 عیسی اونه جَواب باگوته: «شوآلِاشان لانه و پَرَندِه شان فَک دارَن، وَلی انسان ریکا حَتّی جایی نِداره خودشه سَرِ بَنه.» 59 عیسی یِنَفَر دیگَرِ باگوته: «مَرِه پیرَوی هَکُن.» وَلی او جَواب هَدَه: «اِی آقا، بَنی اوَّل بوشوم و می پیَر دَفن هَکُنَم.» 60 عیسی اونه باگوته: «بَنی مُردِگان، خودِشانِ مُردِه شان رِه دَفن هَکونَن. تو بوشو و خُدایِ پادشاهِی یه خَبَرِ اِعلام هَکُن.» 61 یه نَفَر دیگه باگوته: «اِی آقا، مَن تی هَمرَه هَنَم، وَلی اِجازه هَدِه اوَّل می خانواده یه هَمرَه خُدافِظی هَکُنَم.» 62 عیسی اونه جِواب باگوته: «کَسی که شُخم بَزَئن شُروع هَکُرده و خودِشه دُمّالسَرِ بِیشِه، خُدایِ پادشاهِی یه لیاقَتِ نِداره.» |
@ 2024 Korpu Company