لوقا 3 - گیله مازیَحیی راه رِه آمادِه کانه 1 تیبریوس فرمانروایی پونزدَهمین سالِ دِلِه، رومِ امپراطور، وَختی پِنتیوس پیلاتُس یَهودیِه فَرمانداربا، وَ هیرودیس جَلیلِ مَنطَقِه یه حاکِم با، و اونه اَداش فیلیپُس ایتوریِه و تَراخونیتیس مَنطَقِه یه حاکِم با، وَ لیسانیوس، آبیلینی یه مَنطَقِه حاکِمِ با، 2 وَ حَنّا و قیافا یَهودیِانِ مَعبَدِ گَتِه کاهِنان بان، خُدایِ کَلام صَحرایِ دِلِه، زَكَریایِ ریکا، یحیی رِه، نازِل هَبا. 3 پس یحیی تمام اُردُنِ روخانه یه دور و وَرشونه با و مَردُمِ گونه با خودِشانِه گُناهانِ آمُرزِشِ وَسین توبِه هَکُنَن و غُسل تَعمید هَگیرَن. 4 هَمونجور که اِشعیایِ پِیغَمبَرِ کتابِ دِلِه بوما: «یِنَفر صَحرایِ دِلِه داد زَنِه ”خُداوَندِ راه رِه آمادِه هَکُنید! وَ اونه راهان رِه هَموار هَکونید! 5 تمام دَرِّه شان پُر و تمام کوه و کوتی شان هَموار بونَن؛ وَلِ راهِشان راس و چالِه چولِه شان هَموار بونَن. 6 اونوَخت تمام مَردُم خُدایِ نِجات رِه دینَن“» 7 یَحیی اون جَماعَتی که تَعمید بِیتَنِ وَسین اونه وَرجه هَنِه بان رِهِ گونه با: «اِی اَفعی زادگان، كی شِمِره خَبِر هَدَه تا اون غَضَبی که دره هَنِه جی دَربیشید؟ 8 اَعمالی که نِشان دَنه شُما توبِه هَکُردین رِه اَنجام هَدین و شیمی هَمرَه نَگین که: ”اَمِی جَد ابراهیمِ.“ چون شِمِره گونَم، خُدا تانه این سَنگِ جی اِبراهیمِ وَسین وَچِه هان دُرس هکونِه. 9 اَلَان تُوار دارِ ریشِه یه سَر دَرِه و هر داری كه خُجیرِ میوِه نیارِه، بَبیه و تَشِ دِلِه تُووادِه بونه.» 10 مَردُم اونه جی بَپُرسیَن: «پس چه هَکونیم؟» 11 یحیی جَواب هَدَه: «اونیکه دُتا پیرَن دَاره، ایتا رِه به اونیکه نِدارِه هَدِه، وَ اونیکه غَذا داره هَم هَمینجور هَکونه.» 12 خَراجگیران هَم بومَن تا تَعمید هَگیرَن. اوشان اونه جی بَپُرسیَن: «اُسّا، اَما چه هَکُنیم؟» 13 یحیی اوشانه باگوته: اونچه که شِمِره باگوتَنِ جی بیشتَر خَراج نِگیرین.» 14 سَربازان هم اونه جی بَپُرسیَن: «اَما چه هَکُنیم؟» یحیی اوشانه باگوته: «هیچکَسِ جی زور هَمره پول نِگیرین و هیچکَسِ تُهمَت نَزِنین وبه شیمی دَسمُزِد قانِع هَبین.» 15 مَردُم چِش بِرا بان و خودِشانِه هَمرَه گونه بان بونه یحیی همون مَسیح موعود هَبو؟ 16 یحیی همه اوشانه اینجور جَواب هَدَه و گونِه با: «مَن شِمِره اُویه هَمرَه تَعمید دَنَم، وَلی كسی می جی رَسدارتر هَنه که حَتّی من لایق نیِیَم اونه چَمیشِ بَندِ واز هَکُنَم. اون شِمِره روح القُدُس و تَشِ هَمرَه تَعمید دَنه. 17 اون خودشه چَنگَک رِه خودشه دَس دَاره تا خودشه خَرمَنگاهِ تَمیز هَکونه و گَندُم رِه خودشه کَندوجِ دِلِه جَم کانه. وَلی کمِل اون تَشِ دِلِه که هیچ وَخت دَکوشانی نَبونه سوزاندِنِه.» 18 وَ یحیی اینجور نَصیحَتهای هَمرَه خُدایِ کَلام رِه مَردُمِ اعلام کانِبا. 19 وَلی چون هیرودیسِ حاکِم، خودشه زن بِرَر، هیرودیایِ جَریانِ سَر و دیگر شِرارَتی که هَکِردهِ با، یحیی یه جی توبیخ هَبا با، 20 اونه زِندانِ دِلِه تووادَه و این کارِ هَمرَه خودشه شِرارَتِ بیشتر هَکُردِه. 21 موقه ایی که هَمه یه مَردُم تَعمید گیرنه بان و عیسی هَم تَعمید بِیتهِ با و دُعا کانِبا، آسِمان واز هَبا 22 و روح القُدُس جِسم دِلِه، ایتا کَفترمثان اونه سَر جیر بوما و ایتا صِدا آسِمانِ جی بوما که: «تو می عزیزِ ریکایی، مَن تی جی راضییَم.» عیسی شَجَرِه نامِه 23 عیسی حدودِ سی سال داشتِه که خودشه خِدمَت شِروع هَکُردِه. اون مَردُمانِ گُمان یوسِفِ ریکا با و یوسِف هِلی یه ریکا، 24 هِلی مَتّاتِ ریکا، مَتّات لاوی یه ریکا، لاوی مِلکی یه ریکا، مِلکی یَنّا یِه ریکا، یَنّا یوسِفِ ریکا، 25 یوسِفِ مَتّاتیا یه ریکا، مَتّاتیا عاموسِ ریکا، عاموس ناحومِ ریکا، ناحومِ حِسلی یه ریکا، حِسلی نَجَّی یه ریکا، 26 نَجَّی مَعَتِ ریکا، مَعَت مَتّاتیا یه ریکا، مَتّاتیا سِمِعین ریکا، سِمِعین یُسِکِ ریکا، یُسِک یَهودا یِه ریکا، 27 یَهودا یوحَنانِ ریکا، یوحَنان ریسا یِه ریکا، ریسا زَروبابلِ ریکا، زَروبابل شِئِلتیئیلِ ریکا، شِئِلتیئیل نیری یه ریکا، 28 نیری مِلکی یه ریکا، مِلکی اَدّی یِه ریکا، اَدّیِ قوصامِ ریکا، قوصام اِلمادامِ ریکا، اِلمادام عیرِ ریکا، 29 عیر یوشَعِ ریکا، یوشَع اِلعازارِ ریکا، اِلعازار یوریمِ ریکا، یوریم مَتّاتِ ریکا، مَتّات لاوی یه ریکا، 30 لاوی شَمعونِ ریکا، شَمعون یَهودا یِه ریکا، یَهودا یوسِفِ ریکا، یوسِف یونامِ ریکا، یونام اِلیاقیمِ ریکا، 31 اِلیاقیمِ مِلیا یه ریکا، مِلیا مِنّا یه ریکا، مِنّا مَتّاتا یِه ریکا، مَتّاتا ناتانِ ریکا، ناتان داوود ریکا، 32 داوود یَسا یِه ریکا، یَسا عوبیدِ ریکا، عوبید بوعَزِ ریکا، بوعَز سَلمونِ ریکا، سَلمون نَحشونِ ریکا، 33 نَحشون عمّینادابِ ریکا، عمّیناداب رامِ ریکا، رام حِصرونِ ریکا، حِصرون فِرِصِ ریکا، فِرِص یَهودا یِه ریکا، 34 یَهودا یعقوبِ ریکا، یعقوب اسحاقِ ریکا، اسحاق ابراهیمِ ریکا، ابراهیم تارَحِ ریکا، تارَح ناحورِ ریکا، 35 ناحور سِروجِ ریکا، سِروج رِعو یِه ریکا، رِعو فِلِجِ ریکا، فِلِج عِبِرِ ریکا، عِبِر شِلَخِ ریکا، 36 شِلَخ قینانِ ریکا، قینان اَرفَکشادِ ریکا، اَرفَکشاد سامِ ریکا، سام نوحِ ریکا، نوح لَمِکِ ریکا، 37 لَمِک مَتوشالَحِ ریکا، مَتوشالَح خَنوخِ ریکا، خَنوخ یارِدِ ریکا، یارِد مَهَلَلئیلِ ریکا، مَهَلَلئیل قینانِ ریکا، 38 قینان اَنوشِ ریکا، اَنوش شِیثِ ریکا، شِیث آدَمِ ریکا، وَ آدَم خُدایِ ریکا با. |
@ 2024 Korpu Company