لوقا 21 - گیله ماز

ایتا بیوِه زِنایِ هَدیِه

¹ عیسی خودِشه دورِوَرِ بِیشییِه و پولدارانی رِه بَدییِه که خودِشانِه هَدایا رِه مَعبدِ صِندوخِ دِلِه تووادِنِه بان.

² اوجِه ایتا فَقیرِ بیوِه زِنا رِه بَدییِه که دو قِران صِندوخِ دِلِه تووادَه

³ عیسی باگوته: «راس راسی شِمِره گُونَم، این فَقیرِ بیوِه زِنا تمام اوشانه جی بیشتر هَدَه.

⁴ چون تمام اوشان خودِشانِه مالِ زیادی یه جی هَدَن، وَلی این فَقیرِ زِنا تمام خودشه روزی رِه هَدَه.»

عیسی مَعبدِ خَرابی رِه پیشگویی کانه

⁵ بَعضیان گَتِه مَعبَدِ گَبِ زَنه بان و قَشنگِ سَنگ و هَدایایِ جی که اونه هَمرَه تَزئین هَبا با تَعریف کانه بان، عیسی باگوته:

⁶ «روزی رَسِنه تمام این چیزانِی که دینین، فور هَنِه و سَنگ، سَنگِ سَر نُماندِنِه.»

⁷ اوشان بَپُرسیَن: «اُسّا، این اتّفاق كِی دَکِنه و اونه نَزدیک هَبوسَّنِ نِشانه چیِه؟»

⁸ عیسی باگوته: «مُواظِب هَبین که گُمراه نَبین، چون خِیلیان می اِسمِ هَمرَه هَنِن اِدّعا کانَن: ”مَن همون مَسیحَم“ و گونَن ”دُنیا به آخَر بَرِسییَه.“ اوشانه جی پیروی نَکُنید.

⁹ «وَختی جَنگها و جِدال های خَبَرِ اِشنَوِنید، نَتِرسین. چون بایِسّی اَوَّل این چیزان اتّفاق دَکِه، وَلی دُنیا دَرجا به آخَر نَرِسِنِه.»

¹⁰ ایما اوشانه باگوته: «قومها و مَملِکَتها هَمدیگَر عَلیه جَنگ کانَن.

¹¹ گَتِه زِلزِلِه ها و قَحطی و طاعون خِیلی جاهان هَنه و اتفاقات وحشتناک دَکِنِه و آسِمانهِ دِلِه عجیب و غریب چیزان ظاهر بونه.

¹² «وَلی پِیش از این اتّفاق، شِمِره گیرنَن، اَذیَت کانَن و مُحاکِمه یه وَسین عبادتگاهِ دِلِه بَرنِن و شِمِره زِندانِ دِلِه تووادِنَن. می اِسمِ خاطِری شِمِره پادِشاهان و فرماندارانِ وَرجه بَرنِن

¹³ وَلی این فُرصَتی بونه تا بَتَّنین شَهادت هَدین.

¹⁴ اینه شیمی خاطِر بِدارین که پیش پیش دِلواپَس نَبین چطور شیمی جی دِفاع هَکُنید.

¹⁵ چون مَن شِمِره کَلام و حِکمَتی دَنَم که هیچ کُدام از شِیمی دُشمَنان نَتَّنَن شیمی جَوابِ هَدِن و شِیمی پَس بَربییَن.

¹⁶ حتّی شِیمی پیَر و مآر و اَداشان و فک و فامیلِان و شِیمی رَفیقِان شِمِره دُشمَنِ دَس تَسلیم کانَن و شیمی جی بَعضیان رِه کُشِنِن.

¹⁷ تمام مَردُم می اِسمِ خاطِری شیمی جی بیزار بونِن.

¹⁸ وَلی ایتا مو هَم شیمی سَرِ جی کَم نَبونه.

¹⁹ شیمی تَحَمُلِ هَمرَه، شیمی جان نِجات دَنید.

²⁰ «وَختی بَدییَین دُشمَن لَشگَر، اورشَلیمِ دورِه هَکُردِه، بِدانید اونه نابودی نَزّیکِه.

²¹ اونوَخت اوشانیکه یَهودیِه دِلِه دَرِن کوهِ سَمت دَربوشون و اوشانیکه شَهرِ دِلِه دَرِن شهرِ جی دِرگا بوشون، وَ اوشانیکه دَشت و صَحرایِ دِلِه دَرِن شَهرِ دِلِه نییَن.

²² چون اون روزان مُکافاتِ روزِ، که اونه دِله هر چی بَنویشتِه هَبا به اَنجام رَسِنه.

²³ وای بِحالِ زِناکانی که شِکَمدارَن و مآرانی که خودِشانِه وَچِه رِه اون روزان دِلِه شیر دَنِن! چون گَتِ مُصیبَتی این سَرزمینِ دِلِه اتّفاق دَکِنه و خُدایِ غَضَب این قومِ دامَنگیر بونه.

²⁴ اوشانه شَمشیر هَمرَه کُشِنِن و اَسیر کانَن و ایتا دیگه مِلکِ دِلِه تَبعید کانَن و اورشلیم هَم غیرِ یَهودیِانِ دَس دَکِنه و لَگَد دَموج بونه تا موقه ایی که غیرِ یَهودیانِ دورِه تُمام هَبو.

²⁵ «خورشید و ماه و سِتارِه شانه دِلِه نِشانه هایی ظاهِر بونه. زَمینِ سَرِ مَردُم دَریایِ کولاکِ جی پَریشان بونِن.

²⁶ مَردُم اونچه یه تَرسِ جی که خَنِه دُنیایِ سَر بیه، بیهوش بونَن، چون آسِمانِ قُوَّتان به لَرزِه دَکِنه.

²⁷ ایما انسانِ ریکا رِه دینَن که قُوَّت و گَتِه جَلالِ هَمرَه اَبرِ دِلِه هَنِه.

²⁸ وَختی این اِتِّفاقان دَکِنه، راس بییَسید و شیمی سَرِ بالا هَگیرین، چونکه شیمی آزادی نَزّیکِه!»

اَنجیل دار جی دَرس بِیتَن

²⁹ عیسی این مَثَلِ اوشانه وَسین بیاردِه و باگوته: «اَنجیل دار و تمام دارِشان رِه بِیشین.

³⁰ وَختی وَلگ دَنِن تانید بِینین و بِفَهمین تابِسّان نَزّیکِه.

³¹ اینه وَسّین، وَختی دینین این چیزان اتّفاق دَکِنه، فَهمِنِید خُدایِ پادشاهی نَزّیکِه.

³² راس راسی شِمِره گونَم، تا تمام ایشان اتّفاقان دَنِکه این نسل از بِین نَشونِه.

³³ آسِمان و زَمین از بِین شونِن، وَلی می گَب هیچ وَخت از بِین نَشونِه.

³⁴ «هوشیارهَبین، نَکُنِه عیش و نوش و مَسّی و زندگی یِه نِگَرانی شِیمی دِلِ سَخت هَکونه و اون روز ایتا دامِ مَثان یِدَفِه شِمِره غافلگیر هَکونه.

³⁵ چون این اتّفاق تمام دُنیایِ مَردُمانِ سَر هَنِه.

³⁶ پَس هَمَش مُواظِب هَبین و دُعا هَکُنید تا بِتَّنید تمام این چیزانِ جی که خِیلی زود اتّفاق دَکِنه، دَر اَمان دَبین و انسانِ ریکایِ وَرجه بییَسین.»

³⁷ عیسی هَر روز یَهودیانِ عبادَتگاهِ دِلِه تَعلیم دَنِه با و هَر شُو شَهرِ جی دِرگا شونه با و زِیتونِ کوه سَر شُو رِه صُب کانِبا.

³⁸ صُبِ سَر مَردُم اونِه گَبِ بِشنَوِسَّنِ وَسین مَعبَدِ دِلِه جَمع بونه بان.