لوقا 18 - گیله مازایتا سِمِجِ بیوِه زِنایِ مَثَل 1 عیسی خودشه شاگِردانِ وَسین مَثَلی بیاردِه تا اوشانه نِشان هَدِه بایسّی هَمِش دُعا هَکُنَن و هیچ وَخت دِلسَرد نَبون. 2 عیسی باگوته: «ایتا شَهرِ دِلِه ایتا قاضی دَبا که نه خُدایِ جی تَرسِنِه با و نه مَردُمِ مَهَل کانه با. 3 همون شَهرِ دِلِه ایتا بیوِه زِنا دَبا، که یِسَرِه اونه وَرجه هَنِبا و گونه با می حَقِّ می دُشمَنِ جی هَگیر. 4 قاضی چن وَختی اونه مَهَل نَکُردِه. وَلی سَرآخَر خودشه هَمرَه باَگوته: ”هر چَن خُدایِ جی نَترسِنَم و مَردُمِ رِه هَم مَهَل نُکانَم، 5 وَلی چون این بیوِه زِنا هَمِش می مُزاحِم بونه، اونه داد رَسِنَم، نَکُنِه هَمِش بیه و مَرِه وازِدِه بیارِه!“» 6 ایما عیسی یه خُداوند باگوته: «بِشنَوِسّین این بی انصافِ قاضی چی باگوته؟ 7 اَسِه، مَگِه خُدا به دادِ خودشه اِنتخاب هَبوسِّه شان که شُو و روز اونه پیشگاه اِلتِماس کانَن، نَرِسِنِه؟ این کارِ هَمینجور عَقب تووادِنِه؟ 8 شِمِره گونَم به زودی اوشانه داد رَسِنه. وَلی وَختی انسانِ ریکا بییِه، زَمینِ سَر ایمانی پیدا کانه؟» ایتا فَریسی و خراجگیرِ مَثَل 9 ایما عیسی بَعضیانِ وَسین که خودِشانِه دُرسکاری یه جی مُطمَئِن بان و بَقیِه رِه کوچِک شُماردِنِه بان، این مَثَلِ بیاردِه: 10 «دو نَفَر عِبادتِ وَسین بَشَن مَعبَد، ایتا عُلَمایِ فَریسی جی و ایتا دیگه خراجگیر. 11 فَریسی وَرِسَه و خودشه هَمرَه اینجور دُعا هَکُردِه: ”خُدایا تِرِه شُکر کانَم كه دیگر مَردُمانِ مِثان دُزد و ظالِم و زَنا کار نییَم، حتّی این خراجگیر مِثان هَم نییَم. 12 هَفتِه یِه دِلِه دو دفه روزِه گیرنَم و هَر چیزی بِدَس هارنَم، می اَموالِ دَه به یِکِ خُدا رِه هِدیِه دَنَم.“ 13 وَلی اون خراجگیر، دور ایسَبا و نَخَسِّه حتّی خودشه سَرِ آسِمانِ سَمت بُلَند هَکونه، بلکه خودشه دِلِ سَر زَنِه با و گونِبا: ”خُدایا مَنِه گُناهکارِ رَحم هَکُن.“ 14 شِمِره گونَم این مَردَای بَخشیدِه هَبا و خودشه سِرِه بَشَه، وَلی اون فَریسی نه، چون هر کی خودِش رهِ گَته هَکونه، کوچِک بونه، هَر کی خودِش رهِ فروتَن هَکونه، سَر بلَن بونه.» عیسی وَچِه هان رِه بَركَت دَنه 15 مَردُم حتّی تَرِه وَچِه هان رِه عیسی یه وَرجه هارنِه بان تا اوشانه سَر دَس بَنه. وَختی شاگِردان اینه بَدییَن، اوشانه زَمتُل بَزَن. 16 وَلی عیسی شاگِردانِ خودِشِه وَر دُخوانِسِّه و باگوته: «بَنین وَچِه هان می وَر بییَن، اوشانه جُلوهِ نگیرین، چون خُدایِ پادشاهی اینجور کَسانِ شیه. 17 راس راسی شِمِره گونَم، هَر کی خُدایِ پادشاهِی رِه وَچِه هانِ مِثان قبول نَکُنِه، هیچ وَخت اونه دِلِه نَشونِه.» ایتا پولدارِ رَئیس 18 ایتا از رئیسان، عیسی یه جی بَپُرسییَه: «اِی خُجیرِ اُسّا، چه هَکُنَم تا زِندگی اَبَدی یِه وارِث هَبوُم؟ 19 عیسی باگوته: «چِرا مَرِه خُجیر دُخواندِنی؟ هیچکَس جُز خُدا خُجیر نیِه. 20 اَحکامِ دانی: زَنا نَکُن، قَتل نَکُن، دُزّی نَکُن، دِروئی شَهادَت نَدِه، تی پیَر و مآرِ اِحتِرامِ بِدار.» 21 اون مَردَای باگوته: «تمام ایشانِ جَوانی جی بِجا بیاردِم.» 22 عیسی وَختی اینه بِشنَوِسِّه، باگوته: «هَلَه یِچّی کَم داری؛ تمام اونچه که دَاری رِه بَروش و فَقیرانِ میَن قسمَت هَکُن، كه آسِمانِ میَن گَنج دَاری. ایما بیِه مَرِه پِیرَوی هَکُن.» 23 اون مَردَای وَختی اینه بِشنَوِسِّه، اونه غُصِّه بِیته، چون خِیلی پولدار با. 24 عیسی اونه بِیشییِه و باگوته: «چَنّی سَختِه پولداران خُدایِ پادشاهی یه دِلِه بوشون! 25 شُتر رَد هَبوسَّن دَرزَنِ لوکایِ جی آسانتَرِ تا ایتا پولدار خُدایِ پادشاهی یه دِلِه بوشو.» 26 اوشانیکه این گَبِ بِشنَوِسَّن، باگوتَن: «پَس کی تانه نِجات هَگیرِه؟» 27 عیسی باگوته: «اون کاری که آدَم نَتَّنِه هَکونه رِه، خُدا تانِه اَنجام هَدِه.» 28 پِطرُس باگوته: «اَما که اَمی سِرِه و زندگی رِه وِل هَکُردیم تا تی جی پِیرَوی هَکُنیم!» 29 عیسی اوشانه باگوته: «راس راسی شِمِره گونَم، هیچکی دَنیِه که سِرِه یا زِنا یا اَداشان یا خودِشِه پیَر و مآر یا وَچِه شانِ رِه خُدای پادشاهی یه خاطِری وِل هَکونه، 30 و این دُنیایِ دِلِه چَن برابر بِدَس نیارِه، وَ اون دُنیایِ دِلِه هَم اَبَدی زندگی اونه قِسمَت نَبوُ.» عیسی سِوّمین دَفِه خودشه بَمِردَنِ پیشگویی کانه 31 ایما عیسی خودشه دَوازدَه شاگردِ ایتا گوشِه بَکِشیِیَه و اوشانه باگوته: «اَلآن شونیم اورشلیم. اوجِه هر چی پِیغمبَران انسانِ ریکای بارِه بَنویشتِن، اتّفاق دَکِنه. 32 چون اونه غیرِ یَهودیِانِ دَس تَسلیم کانَن، اوشان اونه مسخره و توهین کانَن و اونه دیمِ سَر فیلی تووادِنَن و اونه شَلّاق زَنَن و کُشِنَن. 33 وَلی سِوّمین روز دِلِه زنده بونه.» 34 وَلی شاگِردان اونه گَبِ نِفَهمِسَّن. اونه گَبِ مَعنی اوشانِ جی پِنهان با و نِفَهمِسَّن چیه باره گَب زَنه. ایتا کورِ شَفا 35 وَختی اَریحایِ شهرِ نَزیکی بَرِسییَه، ایتا کورِ مَردَای رایِسَر نیشته با و گدائی کانِبا. 36 وَختی اون جَماعتِ صِدا که اوجِه یه جی رَد بونِه بان رِه بِشنَوِسِّه، بَپُرسیِه: «چه خَبَرِ؟» 37 اونه باگوتَن: «عیسی یه ناصِری دَرِه رَد بونه.» 38 اون داد بَزَه: «اِی عیسی، داوود ریکا، مَرِه رَحم هَکُن!» 39 اوشانیکه جَماعتِ پیشاپیش شونه بان، اونه زَمتُل بَزَن و باگوتَن ساکِت هَبو. وَلی اون بیشتر داد زنه با: «اِی داوود ریکا، مَرِه رَحم هَکُن!» 40 ایما عیسی بییَسَه و دَستور هَدَه اون مَردَای رِه اونه وَر بیارِن. وَختی نَزدیک هَبا، عیسی اونه جی بَپُرسیِه: 41 «چی خَنیی تِرِه هَکُنِم؟» اون مَردَای باگوته: «اِی آقا، خَنِم می چِش، بِینه.» 42 عیسی اونه باگوته: «تی چِش بِینه! تی ایمان تِرِه شَفا هَدَه.» 43 اون کورِ مَردَایِ چِشم دَرجا بَدییَه و هَمونجوری که خُدا رِه شُکر کانِبا عیسی یِه دُمّالسر بَشَه. وَختی تمام مَردُم اینه بَدییَن، خُدا رِه شُکر هَکُردَن. |
@ 2024 Korpu Company