لوقا 15 - گیله مازگُم هَبوسِّه گوسِند مَثَل 1 وَلی خَراجگیران و گُناهکاران همه عیسیِ یه دور جَمع بونه بان تا اونه گَبِ بِشنُئَن. 2 عُلَمایِ فِرقِه فَریسی و توراتِ مُعَلِمین، غُرغُر کانه بان و گونه بان: «این مَردای گُناهکارانِ قَبول کانه و اوشانه هَمرَه هَمسُفرِه بونه.» 3 پَس عیسی این مَثَلِ اوشانه وَسین بیاردِه: 4 «کُدام ایتا از شُما دَرِه که صد تا گوسِند بِدارِه و وَختی اوشان جی ایتا گُم هَبو، اون نَود و نُه تای دیگَرِ صَحرایِ میَن نُزارنه و اون گُم هَبوسِّه یه دُمبال نَشونه تا اونِه پیدا هَکونه؟ 5 وَختی گُم هَبوسِّه گوسِند پیدا هَکورده، اونِه خُشحالی یِه هَمرَه خودشه دوشِ سَر نَنِه 6 و سِرِه هَنه، خودشه رَفیقان و هَمسادِگانِ جَمع کانه و گونه ”می هَمرَه خُشحالی هَکُنید؛ چون می گُم هَبوسِّه گوسِندِ پیدا هَکوردَم.“ 7 شِمِره گونَم هَمینجور ایتا گُناهکار وَسین که توبِه کانه، آسِمانِ دِلِه جَشن و شادیِ گَته تَری بَرپا بونه تا اون نَود و نُه تا دُرسکارِ وَسین که نیاز به توبِه نِدارَن. گُم هَبوسِّه سِکِّه یِه مَثَل 8 «وَ یا کُدام زِنا هیسه که دَه تا سِکِّه نُقرِه بِدارِه و وَختی اوشان جی ایتا گُم هَبو، لَمپا رِه روشن نُکانِه و سِرِه رِه ساجِه نَزِنِه و تا اونِه پیدا نَکُنِه بَگرِسَّن جی نییَسِنِه؟ 9 وَختی اونِه پیدا هَکورده، خودشه رَفِیقان و هَمسادِگانِ جَمع کانه و گونه ”می هَمرَه خُشحالی هَکُنید؛ چون می گُم هَبوسِّه سِکِّه رِه پیداهَکوردَم.“ 10 شِمِره گونَم، هَمینجور ایتا گُناهکارِ توبه هَکُردَن وَسین، خُدایِ فِرِشتگانِ وَر جشن و شادی بَرپا بونه.» گُم هَبا ریکا یِه مَثَل 11 ایما عیسی اِدامِه هَدَه و باگوته: «ایتا مَردَای دُتا ریکا داشتِه. 12 یه روز کوچِ ریکا خودشه پیَرِ باگوته: ”اِی پیَر، سَهمی که تی دارایی یه جی مَرِه رَسِنه رِه اَلان مَرِه هَدِه.“ پَس پیَر خودِشه دارایی رِه اون دُتا ریکایِ میَن تخسیم هَکُردِه. 13 هَلَه خِیلی زمان نُگذَشتِ با که کوچِ ریکا هر چی که داشتِه رِه جَمع هَکُردِه و ایتا دور دَستِ دیار بَشَه، وَ اوجِه خودشه دارایی رِه عیاشی یه هَمرَه به باد هَدَه. 14 وَختی هر چی داشتِه رِه خَرج هَکُردِه، اون دیارِ دِلِه بَدجور قَحطی بوما و به تنگدَسّی دَکِته. 15 پس بَشَه و ایتا اون مَنطَقِه یه مَردُمِ پاکارهَبا. اون مَردَای هم اونه خودشه زَمینِ سَر روانه هَکوردِه تا اونه خو شانه غَذا هَدِه. 16 اون ریکا آرِزو داشتِه خو شانه غَذای هَمرَه خودِشِه شِکَمِ سیر هَکونه، وَلی هیچکی اونه هیچی نَدَنه با. 17 سَرآخَر خودِشِه وَر باگوته ”می پیَرِ پاکاران، اِضافِه غذا هم دارَن و مَن ایجه وَشنایی جی دَرَم تَلف هَبوم. 18 پس وَرِسِنَم و می پیَرِ وَر شونَم و اونه گونَم: ’پیَر، مَن تی حَق وخُدایِ حق گُناه هَکُردَم. 19 دِ لایق نییَم تی ریکا دُخواندِه هَبوم، می هَمرَه هَم ایتا از تیِ پاکارانِ مِثان رفتار هَکُن.“‘ 20 «پَس وَرِسَه و خودشه پیَرِ سِرِه یه سَمت رادَکِته. وَلی هَلَه سِرِه یه جی دور با که، اونه پیَر اونه بَدییِه و اونه دِل ریکایِ وَسین بَسوتِه دُویه هَمرَه اونه سَمت بَشَه و اونه کَشِه بِیتِه و خُش هَدَه. 21 ریکا خودِشه پیَرِ بَاگوته: ”پیَر، مَن تی حَق و خُدایِ حق گُناه هَکُردَم. دِ لایق نییَم تی ریکا دُخواندِه هَبوم.“ 22 وَلی پیَر خودشه پاکارانِ باگوته: ”زود بیشین و بِهترین قوا رِه بیارین و اونه تَن دَکُنین. ایتا مِچِک اونه اَنگوشت و ایتا چَمیش اونه لِنگ دَکُنین. 23 اون پَروارِ جانکا رِه بیارین، سَر بَبینین تا بُخاریم و جَشن بَگیریم. 24 چون می این ریکا بَمِرده با، باز زنده هَبا، گُم هَبا با، پیدا هَبا.“ پس جَشن بِیتَن و شادی هَکُردَن. 25 «وَلی گَتِ ریکا بِجار سَر دَبا. وَختی سِرِه یه نَزیکی بَرسییَه و رَقص و آوازِ صِدا رِه بِشنَوِسِّه، 26 ایتا از پاکارانِ دُخوانِسِّه و بَپُرسیِه: ”چه خَبَرهیسه؟ 27 پاکار جَواب هَدهَ: ”تی اَداش وَگَرِسِّه و تی پیَر اون پَروارِ جانکا رِه سَر بَبییَه، چون خودشه ریکا رِه صَحیح و سالِم پیدا هَکوردِه.“ 28 گَتِ ریکا وَختی اینه بِشنَوِسِّه، عَصبانی هَبا و نَخَسِّه سِرِه بییِه. اونه پیَر دِرگا بوما و اونه جی التماس هَکُردِه. 29 وَلی اون خودشه پیَرِ جِواب باگوته: ”بِیِش مَن اَلآن خِیلی سالِه ایتا پاکارِ مِثان تِرِه خِدمَت هَکوردَم و هیچ وَخت تی دَستورِ جی سَرپیچی نَکُردَم. وَلی تو هیچ وَخت حتّی ایتا بوزکوله هم مَرِه نَدَیی تا می رَفیقانِ هَمرَه ایتا مِهمانی بَگیرَم. 30 وَلی اَسِه تی این ریکا وَگَرِسِّه، ریکائی که تی دارایی رِه فایِشِه شانِ هَمرَه به باد هَدَه، اونه وَسین اون پَروارِ جانکا رِهِ سَر بَبییَی!“ 31 پیَر اونه باگوته: ”ریکا، تو هَمِش می هَمرَه دَری و هَر چی دارَم تی شینِه. 32 وَلی اَلآن بایسّی جَشن بَگیریم و شادی هَکُنیم، چون تی اَداش بَمِرده با، باز زنده هَبا؛ گُم هَبا با، پیدا هَبا.“» |
@ 2024 Korpu Company