اِنجیلِ یوحنا 21 - گیله ماز

عیسی خودشه هَفت تا شاگِردانِ ظاهِر هَبا

¹ بعدِ این اِتِّفاقان، عیسی یِدَفِه دیگه ”تیبِریِه یه دَریا کنارِ“ ور که هَمون ”جَلیلِ دَریا“ با، خودِش رهِ شاگِردانِ آشکار هَکُردِه. اون اینجور خودِش رهِ آشکار هکُردِه:

² ایتا روز شَمعونِ پِطرُس، توما که اونه دوقولو گونِه بان، نَتَنائیل قانایِ جَلیل جی، زِبِدی یه ریکا شان و دُتا شاگردِ دیگه با هَم دَبان.

³ شَمعونِ پِطرُس اوشانه باَگوته: «مَن دَرَم بوشوم ماهی گیری.» اوشان باگوتَن: «اَما هَم تی هَمرَه هَنیم.» پَس دِرگا بَشَن و لوتکا رِه سَوار هَبان. وَلی اون شُو هیچ ماهی ایی نِیتَن.

⁴ صُبِ سَر، عیسی دَریا کنار ایسَبا؛ وَلی شاگِردان نِفَهمِسَّن اون عیسائه.

⁵ عیسی اوشانه باَگوته: «وَچِه هان، هیچ ماهی ائی بِیتین؟» جَواب هَدَن: «نه!»

⁶ عیسی باَگوته: «سالی رِه لوتکایِه راسِ طَرف تُووادین که گیرِنید.» اوشان اینجور هَکُردَن. وَ آنقَدَر ماهی زیاد با که نَتَّنِسَّن سالی رِه لوتکایِ دِلِه بَکِشَن.

⁷ اون شاگِردی که عیسی اونه دوس داشتِه پِطرُسِ باَگوته: «خُداوَندِ!» شَمعونِ پِطرُس وَختی بِشنَوِسِّه خُداوَندِ، خودشه پیرَنِ رِه دَکُردِه، - چون پیرَن رِه کارِ وَسین خودشه تَنِ جی دَر بیاردِه با- و خودِشِ دَریایِ دِلِه تُووادَه.

⁸ بقیه شاگِردان هَمونجوری که دامِ پُر از ماهی رِه خودِشانِه دُمّال کَشِنِه بان، لوتکایِ هَمرَه بومَن، چون اوشان دَریا کِنارِ جی دور نَبان و حدودِ صَد مِتر فاصِلِه داشتِن.

⁹ وَختی دَریا کنار بَرسیِیَن، بَدییَن ایتا تَش زغالِ هَمرَه روشنِ و اونه سَر ماهی دَرِه و نان هَم دَرِه.

¹⁰ عیسی اوشانه باَگوته: «اون ماهی یه جی که اَلآن بِیتین، بیارین.»

¹¹ شَمعونِ پِطرُس لوتکایِ دِلِه بَشَه و سالی رِه دَریا کنار بَکِشییَه. سالی گَتِ ماهی یه جی مَشت با، صد و پَنجاه و سِه تا ماهی سالی یه دِلِه دَبا، با اینکه سالی یه دِلِه خِیلی ماهی دَبا، وَلی سالی پاره نَبا.

¹² عیسی اوشانه باَگوته: «بیئِین صُبانِه بُخارین.» شاگِردانِ جی هیچکِدام جُرأت نَکُردَن اونه جی بَپُرسَن، «تو کی هیسی؟» چونکه دَانِسَّن خُداوَندِ.

¹³ عیسی پِیش بوما، نان و ماهی رِه بِیته و اوشانه هَدَه.

¹⁴ این سِوّمین دفه با که عیسی بعدِ زندهِ هَبوسَّن، خودِش رِه شاگِردانِ ظاهِر کانِبا.

عیسی و پِطرُس

¹⁵ بعدِ صُبانِه، عیسی شَمعونِ پِطرُسِ جی بَپُرسیِه: «اِی شَمعون، یوحَنایِ ریکا، مَرِه ایشانِه جی بیشتر دوس داری؟» اون جَواب هَدَه: «آرِه آقا؛ تو که دانی تِره دوس دارَم.» عیسی اونه باَگوته: «می وَرِّه شانِه جی مراقبت هَکُن.»

¹⁶ دُوّمین دفه عیسی اونه جی بَپُرسیِه: «اِی شَمعون، یوحَنایِ ریکا، مَرِه دوس داری؟» شَمعونِ پِطرُس جَواب هَدَه: «آرِه آقا؛ تو که دانی تِرِه دوس دارَم.» عیسی باَگوته: «می گوسِندِشانِه گالِشی هَکُن.»

¹⁷ سِوّمین دفه عیسی اونه باَگوته: «اِی شَمعون، یوحَنایِ ریکا، مَرِه دوس داری؟» پِطرُس اَز اینکه عیسیِ سِه دفعه اونه جی بَپُرسییَه مَرِه دوس داری؟» ناراحَت هَبا و باَگوته: «آقا، تو هَمِه چیرِه دانی؛ تو که دانی تِرِه دوس دارَم.» عیسی باَگوته: «می گوسندِشانِه جی مراقبت هَکُن.

¹⁸ راس راسی تِرِه گونَم، وَختی که جَوانتَر بِیی تیِ کَمَرِ دَبِسِّنِه بِی و هَر جا که خَسّی شونِه بِی، وَلی وَختی پیر هَبی، تیِ دَس واز کانی و یِنَفر دیگه تی کَمَرِ دَبِدِنِه و تِرِه به جایی که نَخَنی بیشی بَرنِه.»

¹⁹ عیسی اینه باَگوته تا پِطرُس بِدانه چِطور میرنِه و خُدا رِه جَلال دَنِه. ایما عیسی اونه باَگوته: «می دُمّال بیِه.»

²⁰ ایما پِطرُس وَگِرِسِّه و بَدییِه اون شاگِرد که عیسی اونه دوس داشتِه اوشانه دُمّالسَر هَنِه. اون هَمونی با که شامِ سَر عیسی یِه تَکِ وَر لَم هَدَه با و اونه جی بَپُرسیه با، «آقا، کی تِرهِ دُشمَنِ دَس تَسلیم کانه؟»

²¹ وَختی پِطرُس اونه بَدییَه، عیسی یِه جی بَپُرسیِه: «آقا، پس اونه سَر چی هَنه؟»

²² عیسی پِطرُسِ باَگوته: «اَگه بِخوام تا می وَگَرِسَّن موقِه اون زندهِ بِمانه، تِرهِ چیِه؟ تو می دُمّال بیِه!»

²³ پَس این گَب اَداشانِ دِلِه دَپیتِه که اون شاگِرد نَمیرنِه، اَسِه اینکه عیسی پِطرُسِ نَگوته با اون نَمیرنِه، بلکه باَگوته «اگه بِخوام تا می وَگَرِسَّن موقِه زندهِ بُمانه، تِرِه چیِه؟»

²⁴ این همون شاگِردِ که این چیزانِ شَهادَت دَنه و ایشان رِه بَنوِیشته. اَما دانیم که اونه شَهادَت راسِه.

²⁵ عیسی خِیلی کارایِ دیگر هَم هَکُردِه که اَگه ایتا ایتا بَنوِشتِه بونِه با، گَمان نُکانَم حَتّی تمام دُنیایِ کِتابِشان هَم تانِسِّه بون اون نِوِشتِه شانِ خودِشانِه دِلِه جا هَدَن.