اِنجیلِ یوحنا 20 - گیله مازعیسی زندهِ بونه 1 هَفتِه اوَّلین روز، صُبِ سَر، موقِه ایی که هَلَه هَوا تاریک با، مریم مَجْدَلیّه مَقبَرِه یه سَر بوما و بَدییَه که سَنگ، مَقبَرِه یه دَرِ وَر کِنار بَشَه. 2 پَس دُویِه هَمرَه شَمعونِ پِطرُس و اون شاگِردی که عیسی اونه دوس داشتِه یه وَر بَشَه و اوشانه باَگوته: «اَمیِ سَروَرِ مَقبَرِه یه جی بَبِردَن و نِدانیم کوجِه بَنَن.» 3 پس پِطرُس و اون ایتا شاگِرد دِرگا بومَن و مَقبَرِه یه سَمت رادَکِتَن. 4 هر دُتا با هم دُو کانه بان؛ وَلی اون ایتاَ شاگِرد پِطرُسِ پِیش دَکِته و اوَّل مَقبَرِه وَر بَرِسیَه. 5 دُلّا هَبا و مَقبَرِه یه دِلِه رِه بِیشییِه، بَدییِه که کَفَن جِل اوجِه دَرِه، وَلی دِلِه نَشَه. 6 ایما شَمعونِ پِطرُس هَم اونه دُمّال بوما و مَقبَرِه یه دِلِه بَشَه، بَدییَه که کَفَنِ جِل اوجِه دَرِه، 7 ولی دَسمالی که عیسی یِه سرِ دُورِه دَبِسِّه بان کَفَنِ ور دَنِبا، بلکه سیفا تاهَکُرده یِجا دیگه دَبا. 8 پس اون ایتاَ شاگِرد که اَوَّل مَقبَرِه سَر بَرِسیه با هَم دِلِه بَشَه و بَدییِه و ایمان بیاردِه. 9 چون هَلَه مُقَدَّس نِوِشتِه رِه نِفَهمِسِّه بان که عیسی بایسّی مُردِگانِ جی زنده هَبو. 10 ایما اون دُتا شاگِرد خودِشانِه سِرِه وَگَرِسَّن. 11 وَلی مریم، مَقبَرِه یه دِرگا ایسَبا و بِرمِه کانِبا. اون هَمونجور که بِرمِه کانِبا دُلّا هَبا تا مَقبَرِه یه دِلِه رِه بِیشِه. 12 همون موقِه دُتا فِرِشتِه رِه اِسبی لِواسِ هَمرَه اوجِه ایی که عیسی یِه جَسَدِ بَنَ بان بَدییَه، ایتا اونه سَرِ جایِ وَر و ایتا دیگه اونه لِنگِ جایِ وَر نیشته بان. 13 اوشان اونه باگوتَن: «اِی زِنا، چِرا بِرمِه کانی؟» مریم جواب هَدَه: «می سَروَرِ بَبِردَن و نِدانم اونه کوجهِ بَنَن.» 14 وَختی اینه باَگوته وَگِرِسِّه و بَدییِه عیسی اوجِه ایسَا، وَلی نِفَهمِسِّه که اون عیسائِه. 15 عیسی اونه باَگوته: «اِی زِنا، چِرا بِرمِه کانی؟ کِیه دُمّال گَردِنی؟» مریم خیال هَکُردِه باغبانِ، باَگوته: «آقا، اَگه تو اونه بِیتی مَرِه باگو کوجِه بَنَیی تا بوشوم و اونه بَگیرَم.» 16 عیسی اونه باَگوته: «مریم!» مریم وَگِرِسِّه و به زِبانِ آرامی باَگوته: «رَبّونی! یَعنی اُسّا. 17 عیسی اونه باَگوته: «مَرِه دَس نَزِن، چون هَلَه پیَرِ وَرجه جآر نَشَم. وَلی می اَداشانِ وَرجه بوشو و اوشانه باگو که مَن می پیَر و شیمی پیَر و می خُدا و شیمی خُدای یِه وَرجه جآر شونَم.» 18 مریمِ مَجْدَلیّه بَشَه و شاگِردانِ خَبَر هَدَه که «خُداوَندِ بَدییَم!» وَ اون چیزایی که عیسی اونه باگوتِه با رِه اوشانه باَگوته. عیسی شاگِردانِ ظاهِر بونه 19 همون روز نِمایِ سَر، که هَفتِه اوَّلین روز با، وقتیکه شاگِردان دُورِ هَم جَم بان و یَهودیانِ تَرسِ جی دَرِشانِ کیلیت هَکُردِه بان، عیسی بوما و اوشانِ میَن بییَسَه و باَگوته: «سَلام بر شُما!» 20 وَختی اینه باَگوته، خودشِ دَس و تَکِ اوشانِ نِشان هَدَه. شاگِردان وَختی خُداوَندِ بَدیَن خوشحال هَبان. 21 عیسی باز هَم اوشانِ باَگوته: «سَلام بر شُما! هَمونجور که پیَر مَرِه روانه هَکوردِه، مَنَم شِمِره روانه کانَم.» 22 وَختی اینه باَگوته، فو هَکوردِه و باَگوته: «روح القُدُسِ هَگیرین. 23 اَگه یِنَفر گُناهانِ بِبَخشین، اوشانِه بَخشیدِه بونِه؛ وَ اَگه یِنَفرگُناهانِ نِبَخشین، بَخشیده نَبونِه.» عیسی و توما 24 موقِه ایی که عیسی بوما، توما ایتا از دَوازدَه شاگِردان، که اونه دوقولو گونهِ بان، اوشانه هَمرَه دَنِبا. 25 پس بَقیِه شاگِردان اونه باگوتَن: «خُداوَندِ بَدییَیم!» وَلی توما اوشانه باَگوته: «تا خودَم میخِشانِ جا رِه اونه دَسِّ سَر نِینَم و می اَنگوشتِ میخِشانِ جایِ سَر نَنَم و می دَسِّ اونه تَکِ لوکایِه دِلِه نَنَم، باوَر نُکانَم.» 26 هَشت روز دیگه عیسی یه شاگِردان باز هَم سِرِه یه دِلِه دَبان و توما اوشانه هَمرَه دَبا. با اینکه دَرِشان کیلیت بان عیسی بوما و اوشانه میَن بیَیِسَه و باَگوته: «سَلام بر شُما!» 27 ایما توما رِه باَگوته: «تیِ اَنگوشتِ ایجه بَنی و می دَسِ بَوین، تیِ دَسِ پِیش بیار و می تَکِ لوکایِه دِلِه بَنی. بی ایمان نَبو، بلکه ایمان بِدار.» 28 توما اونه باَگوته: «می خداوند و می خُدا!» 29 عیسی باَگوته: «چون مَرِه بِدیِیَی ایمان بیاردی؟ خوش بِحالِ اوشان که نَدیه ایمان بیاردِن.» این کِتابِ هَدف 30 عیسی خِیلی نِشانه و مُعجِزهای دیگر هَم شاگِردانِ وَرجه هَکُردِه که این کتابِ دِلِه بَنِویشته نَبا. 31 وَلی ایشان بَنِویشته هَبا تا باوَر هَکُنید که عیسی، همون مَسیحِ موعود، خُدایِ ریکائِه، تا این ایمان هَمرَه، اونه اِسمِ دِلِه اَبَدی زندگی بِدارین. |
@ 2024 Korpu Company