اِنجیلِ یوحنا 17 - گیله ماز

عیسی دُعا کانه

¹ عیسی خودشه گَبِ تَمام هَکُردِه، آسِمان بِیشییِه و باَگوته: «پیَر، اونه موقِه بَرِسییَه. تیِ ریکا رِه جَلال هَدِه تا ریکا هَم تِرِه جَلال هَدِه.

² چون تمام آدَمان اختیارِه اونه هَدَیی، تا هَمه اوشانیکه تو اونه هَدَیی رِه اَبَدی زندگی هَدِه.

³ وَ اَبَدی زندِگی اینه که تِرِه تَنها حَقیقی خُدا و عیسی مَسیح که تو روانه هَکوردی رِه بِشناسَن.

⁴ مَن کاری که تو مَرِه بِسپارِسّی رِه اَنجام هَدَم و اینجوری زَمینِ سَر تِرِه جَلال هَدَم.

⁵ پس اِی پیَر، اَسِه تیِ وَرجه مَرِه جَلال هَدِه، همون جَلالِی که پیش اَز اونکه دُنیا به وجود بیِه تی وَرجه داشتِم.

⁶ «مَن تی اسمِ اوشانِ رَه که تو این دُنیایِ دِلِه مَرِه هَدَیی، آشکار هَکُردَم. اوشان تِی شین بان و تو اوشانه مَرِه هَدَیی، وَ اوشان تی کَلامِ بِجا بیاردِن.

⁷ اَسِه بِفَهمِسَّن اونچه که مَرِه هَدَیی راس راسی تی طَرفِ جی با.

⁸ چون کلامی رِه که مَرِه هَدَیی، اوشانه هَدَم، وَ اوشان اونِه قَبول هَکُردَن و راس راسی بِفَهمِسَّن تی طَرفِ جی بومَم، وَ باوَر هَکُردَن که تو مَرِه روانه هَکوردی.

⁹ مَن اوشانه وَسین دُعا کانَم؛ مَن این دُنیایِ وَسین دُعا نُکانَم، بلکِه اوشان وَسین که تو مَرِه هَدَیی دُعا کانَم؛ چون اوشان تی شیئَن.

¹⁰ هر چی مَن دارَم تِی شین هیسِه و هر چی تو داری می شین هیسِه؛ وَ مَن ایشانِ دِلِه جَلال بِیتَم.

¹¹ اینِ جی بیشتر دِ دُنیایِ دِلِه نُماندِنَم، وَلی اوشان هَلَه دُنیایِ دِلِه دَرِن؛ مَن تی وَرجه هَنَم. اِی قدّوسِ پیَر، اوشانیکه مَرِه هَدَیی رِه تیِ اسمِ هَمرَه حِفظ هَکُن، تا ایتا هَبون، همونجوری که اَما ایتاَ هیسیم.

¹² مَن تا وَختی که اوشانه هَمرَه دَبام اوشانیکه تو مَرِه هَدَیی رِه تی اسمِ هَمرَه حِفظ هَکُردَم، مَن اوشانه جی حِفاظَت هَکُردَم، اوشانِ جی هیچکدام هَلاک نَبان، جز اون هَلاکتی ریکا، تا اونچه مُقَدَّسِ نِوِشتِه های دِلِه بَنوِشتِ هَبا بِه حقیقَت بَرِسِه.

¹³ وَلی اَسِه تی وَرجه هَنَم و این گَبارِه موقِه ایی زَنَم که هَلَه این دُنیایِ دِلِه دَرِم، تا می خُشحالی رِه خودِشانِه دِلِ میَن کامِل بِدارِن.

¹⁴ مَن تی کَلامِ اوشانه هَدَم، وَلی دُنیا اوشانه جی بیزار با، چون این دُنیایِ جی نییَن، هَمونجور که مَن این دُنیایِ جی نییَم.

¹⁵ مَن نَخَنَم اوشانه این دُنیایِ جی بَبِری، بلکه خَنِم اوشانه اون شَریرِ جی حِفظ هَکُنی.

¹⁶ اوشان این دُنیایِ جی نییَن، هَمونجور که مَن این دُنیایِ جی نییَم.

¹⁷ حَقیقَتِ اوشانه یاد هَدِه تا مُقَدَّس هَبون، تی کَلام حَقیقَتِ.

¹⁸ هَمونجور که تو مَرِه دُنیایِ دِلِه روانه هَکوردی، مَنَم اوشانه دُنیایِ دِلِه روانه هَکوردَم.

¹⁹ مَن خودَم رِه اوشان وَقف کانَم تا اوشان هَم خودشانِ حقیقَت وَقف هَکُنَن.

²⁰ «می دَرخواس فقط اوشانِ وَسین نییِه، بلکه کَسانی رِه هَم که تَوسطِ اوشانه پِیغِام مَرِه ایمان هارنَن،

²¹ تا هَمه ایتا هَبون، هَمونجوری که تو اِی پیَر می دِلِه دَری و مَن تی دِلِه. جوری هَکُن که اوشان هَم اَمی دِلِه دَبون، تا دُنیا باوَر هَکونه که تو مَرِه روانه هَکوردی.

²² مَن جَلالِی که مَرِه هَدَیی رِه اوشانه هَدَم تا ایتا هَبون، هَمونجور که اَما ایتا هیسیم؛

²³ مَن اوشانِ دِلِه و تومی دِلِه دَری. جوری هَکُن تا اوشان هَم کامِلاً ایتاَ هَبون تا دُنیا بِدانه که تو مَرِه روانه هَکوردی، وَ اوشان رِه هَمونجوری دوس داشتی که مَرِه دوس داشتی.

²⁴ اِی پیَر، خَنَم اوشانی که مَرِه هَدَیی می هَمرَه دَبون، هَموجِه که مَن دَرَم، تا می جَلالِ بِینَن، جَلالِی که تو مَرِه هَدَیی؛ چون قبل اَز اینکه دُنیا شِروع هَبو مَرِه دوس داشتی.

²⁵ «اِی صالِحِ پیَر، هر چَن دُنیا تِرهِ نِشناسِنِه، وَلی مَن تِرِه اِشناسِنَم، وَ ایشان دانَن که تو مَرِه روانه هَکوردی.

²⁶ مَن تی اسم اوشانه بِشناساندَم و باز هَم شناساندِنَم، تا مُحَبَتی که تو مَرِه داشتی، اوشانه دِلِه هَم دَبو و مَنَم اوشانه دِلِه دَبوم.»