اِنجیلِ یوحنا 11 - گیله مازایلعازَر بَمِردَن 1 ایتا مَردَای که اونه اِسم ایلعازَر با مَریض با، اون اَهلِ بیت عَنیا با، همون دِهاتی که مریم و اونه خاخُر مارتا اونه دِلِه زندگی کانه بان. 2 مریم همون زَنی با که خُداوَندِ عَطرِ هَمرَه عَطرپاشی هَکُردِه و خودشه گیسِ هَمرَه اونه لنگِ خُشک هَکُردِه. اَسِه اونه اَداش ایلعازَر ناخوش با. 3 پَس ایلعازَر خاخُرِان عیسی یه وَسین پِیغِام روانِه هَکوردَن و باگوتَن: «آقا، تی عَزیزِ رَفیق ناخوشِ.» 4 وَختی عیسی این خَبَرِ بِشنَوِسِّه باَگوته: «این ناخوشی بَمِردَنِ هَمرَه تَمام نَبونه، بلکه خُدایِ جَلالِ وَسین هیسه، تا خُدایِ ریکا اونِ طَریقِ جی جَلال هَگیره.» 5 عیسی، مارتا و اونه خاخُر و ایلعازَرِ دوس داشتِه. 6 پس وَختی بِشنَوِسِّه ایلعازَر ناخوشِ، دو روز دیگه هم اون جایی که دَبا، بُمانسِّه. 7 ایما خودشه شاگِردان باَگوته: «بییَن باز هم یَهودیِه منطَقِه یه سمت بیشیم.» 8 شاگِردان اونه باگوتَن: «اُسّا، خیلی وَخت نُگذَرنِه که یَهودیِان خَسِّن تِرِه سَنگسار هَکُنَن، تو باز هَم اوجِه خَنی بیشی؟» 9 عیسی جَواب هَدَه: «مَگِه روز، دَوازدَه ساعَت نیِه؟ اگه کسی روزِ دِلِه راه بوشو، سَر سُم نَزِنِه و زَمین نُخارنِه، چون این دُنیایِ نورِ دینِه. 10 وَلی اگه کسی شُو یه دِلِه راه بوشو، سَر سُم زَنِه و زِمین خارنِه، چون شو یه دِلِه نوری نِدارِه.» 11 بعد از این گَبا عیسی، شاگردانِ باَگوته: «اَمیِ رَفیق ایلعازَر خاتِه، وَلی شونَم تا اونه بیدار هَکُنَم.» 12 شاگِردان اونه باگوتَن: «آقا، اَگه خاتِه خوُب بونه.» 13 عیسی اونه بَمِردَنِ جی گَب زنه با، وَلی اونه شاگِردان خیال کانه بان عیسی یه مَنظور اینه که ایلعازَر خاتِه تا اِستراحَت هَکونه. 14 ایما عیسی عَلَنی اوشانه باَگوته: «ایلعازَر بَمِردِه. 15 وَ شیمی وَسین خُشحالَم که اوجِه دَنِبام تا ایمان بیارین. وَلی اَلآن بیئِین اونه وَرجه بیشیم.» 16 پس توما که اونه دوقولو هم گونه بان دیگر شاگِردِانِ باَگوته: «بیئِین اَما هَم بیشیم تا اونه هَمرَه بَمیریم.» من قیامَت و زندِگی هیسَم 17 وَختی عیسی اوجِه بَرِسییَه، بِفَهمِسِّه چهار روزِ که ایلعازَرِ قَبر دِلِه بَنَن. 18 بِیت‌عَنْیا اورشلیم نَزّیکی با وحدود سه کیلومتر اورشلیمِ جی فاصِلِه داشتِه. 19 یَهودیِانِ جی خیلییان مریم و مارتایِ وَرجه بوما بان تا اوشان رِه، اوشانه اَداشِ مَرگِ خاطری تَسلی هَدِن. 20 پس وَختی مارتا بِشنَوِسِّه عیسی اوجِه هَنه اونه پیشواز بَشه، وَلی مریم سِرِه یه دِلِه نیشتِه با. 21 مارتا عیسی رِه باَگوته: «آقا، اَگه ایجه دَبِیی می اَداش نَمیرنِه با. 22 وَلی دانَم که اَلآن هم هر چی خُدایِ جی بِخوای، خُدا تِرِه دَنه.» 23 عیسی اونه باَگوته: «تی اَداش باز هَم زندهِ بونه.» 24 مارتا اونه باَگوته: «دانَم که باز قیامَتِ روز دِلِه زندهِ بونه.» 25 عیسی اونه باَگوته: «قیامَت و زندگی مَن هیسَم. اونیکه مَرِه ایمان بیارِه حَتّی اَگه بَمیرِه، باز هَم زندهِ بونه. 26 وَ هر کی زندهِ هیسِه و مَرِه ایمان داره هیچ وَخت نَمیرنِه؛ اینه باوَر کانی؟» 27 مارتا باَگوته: «آرِه آقا، مَن ایمان دارَم که تو مسیحِ موعودی، خُدایِ ریکا، هَمونی که بایسّی این دُنیایِ دِلِه هَنِه با.» 28 مارتا اینه باَگوته و بَشه خودشه خاخُر مریمِ دُخوانِسّه و خَلوتِ جایِ دِلِه اونه باَگوته: «اُسّا ایجه دَرِه و تِرِه دُخواندِنِه 29 مریم وَختی اینه بِشنَوِسِّه دَرجا ورسَه و عیسی یِه وَرجه بَشَه. 30 عیسی هَلَه دِهاتِ دِلِه نَشَه با، بلکه هَلَه هَموجِه ایی دَبا که مارتا اونه بَدییَنِ وَسین بَشَه با. 31 یَهودیانی که مریمِ هَمرَه سِرِه یه دِلِه دَبان و اونه تسلی دَنهِ بان وَختی بَدییَن مریم عَجله یه هَمرَه ورِسَه و دِرگا بَشَه اونه دُمّال رادَکِتَن. گَمان کانه بان مَقَبرِه سَر شونِه تا اوجِه بِرمِه هَکونه. 32 وَختی مریم اوجِه ایی که عیسی دَبا بَرِسییَه و اونه بَدییَه، اونه لِنگ دَکِته و باگوته: «آقا، اَگه ایجه دَبِیی می اَداش نَمیرنه با.» 33 وَختی عیسی مریمِ بِرمِه و یَهودیِانِی که اونه هَمرَه دَبان بِرمِه رِه بَدییَه، روح دِلِه خِیلی ناراحَت و پَریشان هَبا. 34 عیسی بَپُرسیِه: «ایلعاذَرِ کوجهِ بَنَین؟» اوشان اونه باگوتَن: «آقا، بیِه و بَوین.» 35 عیسی بِرمِه هَکُردِه. 36 پس یَهودیِان باگوتَن: «بِیِشین چقدر اونه دوس داشتِه؟» 37 وَلی اوشانِ جی بَعضیان باگوتَن: «کَسی که اون کورِ مَردَای یه چِشمِ واز هَکُردِه نَتَّنِسِّه ایلعازَر بَمِردَنِ جُلوهِ هَگیرِه؟» عیسی ایلعازَرِ زندهِ کانه 38 ایما عیسی یِدَفِه دیگه ناراحَت هَبا و مقَبرِه سَر بوما. مَقَبره ایتا غار با که اونه دَهَنِه یه سَر ایتا سَنگ بَنَ بان. 39 عیسی باَگوته: «سَنگِ بَگیرین.» مارتا، اون بَمِردِه مَردَای یه خاخُر باَگوته: «آقا اَلآن دِ بَدِ بو کانه، چون چهار روز بونه که بَمِردِه.» 40 عیسی اونه باَگوته: «مَگِه تِرهِ نگوتَم اَگه ایمان بِداری خُدایِ جلالِ دینی؟» 41 پس سَنگِ بِیتَن. ایما عیسی آسِمانِ بِیشییِه و باَگوته: «پیَر، تِرِه شُکر کانَم که می دعا رِه بِشنَوِسّی. 42 مَن دانِسَّم که هَمَش می دُعا رِه اِشنَوِنی. وَلی اینه اوشانه خاطِری باگوتَم که ایجه ایسَن، تا ایمان بیارِن که تو مَرِه روانه هَکوردی.» 43 اینِه باَگوته و ایما بُلَندِ صِدایِ هَمرَه داد بَزَه: «ایلعازَر، دِرگا بییِه!» 44 پس اون مُرده که اونه دَس و لِنگ کَفَنِ دِلِه دَپیتِه با و ایتا جِل اونه دیمِ دُور دَپیتِه با، دِرگا بوما. عیسی اوشانه باَگوته: «اونه واز هَکُنین و بَنین بوشو.» عیسی یه قَتلِ نخشِه 45 پس خِیلی اَز یَهودیِان که مریمِ هَمرَه بوما بان و عیسی یه کارِ بَدیه بان اونِ ایمان بیاردِن. 46 وَلی اوشان جی بعضیان عُلَمایِ فِرقِه فَریسی یه وَرجه بَشَن و اوشانه باگوتَن که عیسی چه هَکُردِه. 47 پَس مَعبَدِ گَتِه کاهنان و عُلَمایِ فِرقِه فَریسی جَلَسِه بِیتَن، باگوتَن: «چه هَکُنیم؟ این مَردَای خِیلی مُعجِزِه ونِشانه دَرِه هَکونه. 48 اَگه بَنیم هَمینجور پِیش بوشو هَمِه اونه ایمان هارنَن و رومیان هَنِن اَمیِ مَعبَد و اَمیِ قومِ اَمیی دَسِّ جی گیرنَن.» 49 وَلی ایتا از اوشان که اونه اِسم قیافا و اون سال کاهِنِ اعظم با، بَقیِه رِه باَگوته: «شُما هیچی نِدانین 50 و فِکر نُکانید شیمی صَلاح اینه که یِنَفر مَردُمِ وَسین بَمیرِه تا اینکه تمام قوم نابود هَبون.» 51 وَلی این اونه دَهنِ گَب نَبا، بلکه چون اون سال کاهِنِ اعظم با اینجور پیشگویی هَکُردِه که عیسی قومِ وَسین میرنِه، 52 وَ نه فقط قومِ وَسین، بلکه خُدایِ وَچِه شان رِه یِجا جم هَکوردَنِ وَسین که تمام دُنیایِ دِلِه پَخش و پَلا هیسَن. 53 پس، از همون روز نَخشه بَکِشییَن عیسی رِه بَکوشِن. 54 اینِه وَسین عیسی دِ عَلَنی یَهودیِانِ دِلِه رَفت و آمَد نُکانِه با، بلکه اوجِه یه جی بِه ایتا شَهر بِه اِسم اِفرایِم که صَحرایِ نَزیکی با بَشَه و خودشه شاگِردانِ هَمرَه اوجِه بُمانسِّه. 55 یَهودیِانِ پِسَخِ عیدِ نَزّیک هَبا، پِیش از عید خِیلیانِ دُور و اطراف جی بَشَن اورشَلیم تا پِیش از اینکه عید بَرسِه خودِشانِه رَسم و رُسومِ پاکی رِه بِجا بیارِن. 56 اوشان عیسی یه دُمّال گَردِنه بان، هَمونجور که مَعبَدِ دِلِه ایسَبان، هَمدِیگَرِ گونه بان: «چی گُمان کانید؟ یعنی اصلاً عیدِ وَسین نییَنِه؟» 57 وَلی مَعبَدِ گَتِه کاهِنان و عُلَمایِ فِرقِه فَریسی دَستور هَدَه بان هر کی که دانِه عیسی کوجهِ دَرِه خَبِر هَدِه، تا اونه دَسگیر هَکُنَن. |
@ 2024 Korpu Company