یعقوبِ نامه 5 - گیله مازپولدارانِ هُشدار 1 شُما اِی پولداران، برمِه و زاری هَکُنید، چون مُصیبَت شِیمی اِنتظارِه کَشِنِه. 2 شِیمی مال و مَنال نابود هَبا و شِیمی لِواسِشانِه بید بَزَه! 3 شِیمی طِلا و نُقرِه جِرم بَزَه و اوشانِ جِرم شیمی علیِه گَواهی دَنه، وَ ایتا تَشِ مِثان شِیمی تَنِ گوشتِ خارنِه. شُما آخرین روزانِ دِلِه، هَمینجور مال و منال جَم هَکُردین! 4 اَسِه اون کارگَرانِ دَسمزد که شِیمی زَمینِ سَر دِرُو هَکُردَن و شُما حیله یه هَمرَه اوشانه دَسمزد نَدَین، شیمی علیه داد زَنه. آرِه، دِرُوگَران داد خُداوندِ لَشگَرهایِ گوش بَرِسیِه. 5 شُما زَمینِ سَر ناز و نِعمت و عیش و نوشِ دِلِه زندگی هَکُردین و شیمی دِلِ کُشتارِ روز وَسین پَروار هَکُردین 6 شُما اون صالِحِ محکوم هَکُردین و بَکوشتین، اون شیمی پیش مقاوِمت نَکوردِه. مصیبَتِ دِلِه یه صبر 7 پَس اِی اَداشان، تا خُداوندِ بَموئن صَبر هَکُنید. بِیشین چِطور کِشاوَرز اِنتِظار کَشِنِه تا زَمین خودشه با اَرزِشِ مَحصول به بار بیارِه؛ چِطور صَبر کانه تا پاییز و بهاری وارِش زَمینِ سَر بِوارِه. 8 پَس شُما هَم صبور هَبین و شِیمی دِل قرص هَبو، چون اَمیی خُداوندِ بَموُئن نَزیکِه! 9 اَداشان، هَمدِیگرِ جی گِلِه نَکنید، تا شِمِرِه هَم داوَری نَبو، بِیشین ’داوَر‘ دَرِ وَر هیسَه. 10 اَداشان، پِیغَمبران جی که خُداوندِ اِسمِ هَمرَه گَب زنه بان، صَبرِ دَرسِ مُصیبَت دِلِه یاد هَگیرین. 11 اَما اوشانیکه صبر و تحمل دارَن ره خوشبَخت دانیم. شُما ایوبِ صبر و تحمل بارِه بِشنوَسّین، وَ دانید خداوند سَرآخَر اونه هَمرَه چه هَکُردِه، چون خداوند بی نهایت مِهرَبان و بَخشَندِئِه. 12 می اَداشان، وَلی هَمِه جی مهمتَر، قَسَم نُخارین؛ نه آسِمان و نه زَمین و نه هیچی یه دیگَرِ، وَلی بَنین شِیمی ’آرِه‘ همون آرِه هَبو و شیمی ’نه‘ همون نه، نَکُنِه مَحکوم هَبین. دُعا ایمان هَمرَه 13 شِیمی میَن کسی عَذاب کَشِنِه؟ بَنی دُعا هَکونه. شیمی میَن کسی خُشحالِه؟ بَنی حَمد و ثنایه سرودِ بُخوانهِ. 14 شِیمی میَن کَسی مَریضِ؟ بَنی کلیسای گَتِه رِه دُخوانهِ و اوشان اونِه وَسین دُعا هَکُنَن و خُداوندِ اِسمِ هَمره اونه روغَنِ هَمرَه مَسح هَکُنَن. 15 ایمان هَمرَه دُعا هَکُردَن، مَریضِ نِجات دَنه و خداوند اونه وَرِساندِنِه، وَ اَگه گُناهی هَکِردهِ بو، بَخشیدِه بونه. 16 اینِه وَسین، هَمدیگَرِ وَرجه شیمی گناهانِ اعتراف هَکُنید و هَمدِیگَرِ وَسین دُعا هَکُنید تا شَفا هَگیرین. صالِح آدَمی یه دُعا، خیلی قُوَّت هَمرَه عمل کانه. 17 ایلیایه پِیغمبر ایتا آدَم، اَمیِ مِثان با، وَلی وَختی تمام خودشه وِجودِ هَمرَه دُعا هَکُردِه که وارِش نیِه، سِه سال و نیم زَمینِ سَر وارِش نَوارِسِّه؛ 18 وَ باز هم دُعا هَکُردِه و آسِمانِ جی وارِش بِوارِسِّه و زَمین خودشه مَحصولِ به بار بیاردِه. 19 می اَداشان، اَگه شیمی میَن کسی حَقیقَتِ جی مُنحرف هَبو، وَ یِنَفر دیگه اونه وَگِردانِه، 20 بِدانه که هر کی ایتا گُناهکارِ گمراهی یه جی وَگِردانِه، اونه جانِ مَرگِ جی نِجات دَنه و خِیلی گُناهانِ پوشاندِنِه. |
@ 2024 Korpu Company